UYesu mukomi ukulutila uMose
3
1 Neke lino, nye vafuuwa vayanguanye, nye viimike ye múkemeeliilwe nu Nguluvi pamwinga naafwe, muhoodzehedzage ulwa Yesu ye tukumufuuwa. Umwene aatumiilwe nu Nguluvi ukwesu, kangi ali Muteekedzi veesu uMuvina. 2 Uyo, aali muhuuvilwa ukulima dzonda dze amwimikiye uNguluvi alimage, ngita uMose nave kye aali muhuuvilwa ukuvalongodza avaanu vonda va nyumba ya Nguluvi, avo ve Vaisilaheli.a 3 Umudzenga-nyumba aaiginikwa ukulutila inyumba ye ádzengile, ndeeni uYesu nave iivagila ukuginikwa hiilo ukulutila uMose. 4 Pakuva nayila inyumba yiidzengwa nu munya kudzenga wuli, neke kangi uNguluvi ye mwene ye aagavile ifiinu fyonda.5 UMose aali muhuuvilwa ngita mulimila-vangi ku vaanu vonda va nyumba ya Nguluvi. Amalimo gaakwe gaali ga kuvoolela avaanu dzila dze aali águlwime uNguluvi ukuvalongela kuwutalo. 6 Neke kangi uKilisiti ali muhuuvilwa ngita uMwana ye iikwimiila inyumba ya Nguluvi. Na yuufwe tuli vaanu vaakwe, ngana twigina ukwima sipi mu wumasimike weesu nu luhuuvilo lwe tukwiginiya.
Amawungo ga kitafuuwa
7 Neke lino, tupulikidzage lwe iilonga uMubepo uMwimike mu Wusimbe uWiimike ukutigila,
“Ineengʼuli, ngana mupulike ilidzwi lya Nguluvi,
8 mutanage ukudzikiliitidza inumbula dzeenyo,
ngita avakuhwenyo, kye vamugalukaga uNguluvi,
umusika gwa kigono kila kye vaangemiidze ku lungʼalangʼala kula.b
9 Ku lungʼalangʼala uko, avakuhwenyo vaangemyaga nu kulugela ulwigugumidzo lwangu,
nde luvedze vagaweene amalimo gangu mu myaka makyumi gatayi (40).
10 Wiimila wa ulo, ndakiviipiye ikivegalo kila, ndiitigilaga,
‘Avaanu ava váhenile mu mahoodzo gaawo ifigono fyonda,
kangi vasiidzeela ingʼaasi dzangu.’
11 Neke lino, ndaaviipile ndiiyiigaga, ndiitigilaga,
‘Ndakyene avaanu avo vasiliingila apoono apangu pa kupolela.’ ”c
12 Nye vafuuwa vayanguanye! Mwiyangalilage, ukuta atanage ukuvedza pwali nambe yumwinga umwenyo ye ali ni numbula iyinya mahoodzo amaviifu, inumbula iyisiifuuwa, iyiikaana ukumuniniila uNguluvi ye ali muumi. 13 Mwikangadzage yuunye mwa yuunye ikigono ni kigono, pakuva amadzwi ago agiitigila, “Ineengʼuli,”d giilonga ulwa neefwe. Mwikangadzage, ukuta mutanage ukudzangwa ukulima indzanangifu wiimila wa kuvedza nu lukana mu numbula dzeenyo. 14 Pakuva twihangasa nu Kilisiti, ngana twikwima sipi mu lufuuwo lwe twali nalo ukuhuma pa wutalilo ukufikila pa wusililo. 15 Ngita kye wiilonga uWusimbe uWiimike ukutigila,
“Ineengʼuli, ngana mupulike ilidzwi lya Nguluvi,
mutanage ukudzikiliitidza inumbula dzeenyo,
ngita avakuhwenyo kye vamugalukaga uNguluvi.”e
16 Lino ve vaanu vaki avaapuliike amadzwi ga Nguluvi neke vakaanage ukulongodzwa nave? Ve avo avaalongwidzwe nu Mose ukuhuma ku nyi ya Misili.f 17 Kangi ve vaanu vaki ve avaviipiye uNguluvi imyaka makyumi gatayi? Ve avo avaalimile indzanangifu, neke vafuwage ku lungʼalangʼala. 18 Kangi ve vaanu vaki ve aayiigile uNguluvi ukutigila, vasiliingila apoono apaakwe pa kupolela? Ve avo avaakaanile ukumwidika. 19 Pa ulo twidzeela ukutigila, avaanu avo vaalemiilwe ukwingila apoono apo wiimila wa wukitamufuuwa uNguluvi.