Ihaate iyi yaasimbiilwe nu Yakobo, ye aali yumwinga va vanungʼuve va Yesu (Matayo 13:55; Maluko 6:3). Umusika pe aasimbile, aali mulongodzi va lukombeso lwa Yelusalemu (Malimo ga Vatume 12:17). Wiimila wa malimo gaakwe ga wulongodzi wa lukombeso, uYakobo aadzeelaniike ngita simbili (Vagalatya 2:9), kwe kutigila, umuunu ye iihuuvilwa nu lukombeso. Avakoola va madzwi ga Bibiliya viifuuwa ukutigila, ihaate ya Yakobo yaasimbiilwe mu myaka ngita makyumi gatayi ni gihaanu (45) ukufikila makyumi gahaanu (50), ukuhuma pe iiholwa uYesu Kilisiti. UYakobo aakomiilwe wiimila wa lufuuwo lwakwe ngita umwaka gwa makyumi mutanda ni givili (62), ukuhuma pe iiholwa uYesu Kilisiti.

UYakobo avasimbiye aVayahudi avafuuwa hiilo avaapalaangʼaniye ku nyi ya Yudeya, Samalya, Foyinike ni Silya wiimila wa mumuko (Malimo ga Vatume 8:1). Uwugulume wa Yakobo uwa kuvasimbila ihaate iyi, waali wa kuvakangadza mu lufuuwo nu kuvalagila amadzwi ga kulima umusika gwe vaapumuswaga (1:2-27; 5:7-12). Akuvawulanidza avafuuwa ukutigila, vawulekage uwubaagudzi, iisimiilidza ukutigila, ulufuuwo lwa ndakyene lwiheleengʼasa na malimo amanofu (2:1-26). Akuvawunga ulwa ngufu ya lulimi, ukutigila, vatanidzage indongele yaawo (3:1-12). Kangi vatanage ukuvedza ni giila, ikyoyo nu lwigiifyo (4:11–5:6). Akuvawulanidza ulwa luhalawukagudzi (3:13–4:10), na pa wusililo, ukuvalapangila avatamwa (5:13-16).