Ihaate iyi yaasimbiilwe nu mutume Pawulo umusika pe aali mu ndinde ku Loma, ngita umwaka gwa makyumi mutanda (60) enewuli makyumi mutanda nu gumwinga (61), ukuhuma pe iiholwa uYesu Kilisiti. Amusimbiye muunu ye aatambulwaga Filimoni. Lwiwoneka ukutigila, uFilimoni aali Mugiliki ye iikalaga ku wudzenge wa Kolosayi (Vakolosayi 4:9). Umuunu uyo aali mufuuwa mu lukombeso, kangi aali nave umusutu. UPawulo nu Filimoni viidzeeliye wunofu.

UPawulo aasimbile ihaate iyi wiimila wa musutu va Filimoni, ye aatambulwaga Onesimo. Lwiwoneka umusutu uyo amwanguwe uFilimoni, neke anyile. Pambele iitaangʼanaga nu Pawulo ku Loma, uPawulo akumudalikilaga iMola iNofu, neke apitukage. Mu milagililwe igya Valoma, uFilimoni iidikiilwe ukumupedza uOnesimo, nambe kufikila ukumukoma. Uwugulume wa Pawulo uwa kusimba ihaate iyi waali wa kumunyilika uFilimoni atane ukumupedza uOnesimo, nda haamu, amupyanile nu kumwanukila ngita mufuuwa mwa Kilisiti. UPawulo aasimbile ihaate iyi wiimila wa kumukoofya uFilimoni ukulima ngita kye amunyiliike.