Vaebulaniya 9

Imigendzehedze gya lufingo ululovela

1 Lino ulufingo ululovela lwali ni migendzehedze gye viidikaga avaanu, umusika pe viifuunyaga kwa Nguluvi. Kangi ulufingo ulo, lwali lunya Piimike pa kwifuunyila kwa Nguluvi pe naanyi apa. 2 Apoono apo, paawuyiipwe iliheema lya kutaangʼanila wiimila wa kwifuunya kwa Nguluvi,^a ilyali ni fiyumba fivili. Ikiyumba ikya kutala, kyali ni kinenevekelo kya kuviikila imuli,^b ni kitagala ikya kuviikila imikaate pawutalo pa Nguluvi.^c Ikiyumba iki kyatambulwaga aPiimike. 3 Mu liheema liilyo, mwali ni libupa lya mwenda, ilyabaagulingʼiise ikiyumba ikya kutala ni kya wuvili. Ikiyumba ikya wuvili, kyatambulwaga aPiimike pa Piimike. 4 Mu kiyumba ikyo, mwali ni kiteekelelo kya sahabu ikya kufuungʼilihidza uwufumba,^e kangi yaali mooyili nayi sanduka iya lufingo iyaabakiilwe isahabu imbali dzonda.^f Mugati mu sanduka umo, mwali ni kiviya ikya sahabu ikyali ni mana,^d ulubiki lwa Aloni ulwali lúlembuwe amahamba,^g ni fibawo fivili fya maganga ifyasimbiilwe imilagililwe likyumi limwinga (10) igya lufingo.^h 5 Pakyanya pa sanduka iyo, paali ni fihwano fya figawa fivili ifyawoneesaga uwuli pwali wa Nguluvi. Ifigawa ifyo, fyali na mapiko agaasiikaga ikigubiko kya sanduka iyo apoono pe vaapyanidzwaga avaanu indzanangifu dzaawo.ⁱ Neke kangi umusika ugu si musika gwa koolela wunofu dzonda idzo ngita kye dzigenda.

6 Ifiinu fyonda ifyo pe fyaviye fíwuyiipwe nu kuviikwa nakila apaakwe, avateekedzi viingilaga ikigono ni kigono mu kiyumba ikya kutala ikyo ikya liheema lya kutaangʼanila nu Nguluvi mu kulima amalimo gaawo. 7 Neke kangi umuteekedzi umuvina mwene iidikwaga ukwingila ku kiyumba ikya wuvili kya Piimike pa Piimike, nave iingilaga nyakamwinga swe pa mwaka. Kangi aasakulwaga ukwingila ni danda ya ndiimwa ye váhindzile, ukuta ateekele kwa Nguluvi wiimila wa kwivaladza ukuhuma mu ndzanangifu dzaakwe, ni dza vaanu avangi vonda dze vaalimaga kitadzeela.^j 8 Wiimila wa migendzehedze igyo, uMubepo uMwimike akutuwoneesa ukutigila, ingʼaasi ya kwingilila aPiimike pa Piimike yaave yisinaa yisiikulwa, ngana iliheema ilya kutala ilyo, lyave liilima amalimo.

9 Amalimo gonda agaalimikaga mu liheema ilyo, kye kihwananidzo kya musika ugu. Pakuva uwusembe ni nambika ifiiteekelwa kwa Nguluvi, fisiivaladza ulwikagulo lwa vaanu avakwifuunya kwa Nguluvi. 10 Imigendzehedze igyo, gyali ulwa fyakuliya ni finyuwo nu lwa kukalava. Imigendzehedze igyo, gyali ulwa muvili hela, gyonda gihadza giisila umusika pe alaahambusa uNguluvi ingʼaani dzonda ukuvedza miya.

UYesu we wusembe uwukwilifu

11 Neke kangi uKilisiti aadzile, ukuta avedze Muteekedzi uMuvina va ngʼaani inofu ídzitwadziye. Umwene ye mwene ye ágendiye mu liheema ilingi ilili kukyanya, kangi likwilifu kulutila. Ilyo silyawuyiipwe na vaanu, kwe kutigila, si lya mwe naanyi umu. 12 Umwene iingiye aPiimike pa Piimike apo nyakamwinga mu musika gonda. Asiingiye ni danda ya mene enewuli ya ngwada, nda haamu, iingiye ni danda yaakwe yumwene, ukuta atukombole mbeepali na mbeepali. 13 Kulingʼaana nu lufingo ululovela, avaali lupumba vaahaanyililwaga idanda ya mene ni ya ngʼambako,^k ni lifindza lya ngwada,^l ukuta vavaladzwe imivili gyawo vatane ukuvedza lupumba. 14 Neke kangi idanda ya Kilisiti yili ni ngufu ukulutila iya ndiimwa! Wugendela mwa Mubepo va mbeepali, umwene iitawuwe kwa Nguluvi kuvedza wusembe uwukwilifu. Idanda yaakwe ye yeene iyikutuvaladza ukuhuma mu malimo agiihula ifuwa. Yikutupeela ulwikagulo lunofu, ukuta tumutovelage iligendwa uNguluvi ye ali muumi.

15 Wiimila wa ulo, uYesu ye mwene ye muteepudzi va vaanu nu Nguluvi mu lufingo ulupiya, ukuta avaanu ávahaaguliilwe nu Nguluvi, vaanukilage uwuumi uwa mbeepali na mbeepali we avahuuviidze ukuvapeela. UYesu aafuwe, ukuta avakombole avo ukuhuma mu ndzanangifu dzaawo dze vaalimaga umusika gwa lufingo ululovela.

16 Ngana umuunu asimbe uwulagidze wa lipwela lyakwe, lwisakulwa ukoolelwa ukutigila, áfuwe ndakyene. 17 Pakuva uwulagidze uwo wiilima amalimo ngana ndakyene uyo áfuwe, wusiilima amalimo ngana uyo ye ásimbile ali muumi. 18 Lwe lwene nambe lufingo ulwa kutala lusaalimile amalimo kingaya kwita idanda ya ndiimwa. 19 UMose umusika pe aaviye ámalile ukuviimbila aVaisilaheli vonda indagi dzonda ukuhuma kwa Nguluvi, aanyamuwe idanda ya ngwada ni ya mene, iitimbulingʼasaga nu lulenga. Aaviye álimile ewo, iihaanyililaga idanda iyo pa kitabu kya milagililwe na ku vaanu vonda wugendela wa hamba duungʼu iyaawopiilwe mu lihandzo lya mubiki gwe vaatambulaga hisopo. 20 Neke uMose avalongelage avaanu vonda atigilage, “Iyi ye danda iyiikwilidza ulufingo lwa Nguluvi lwe aalagiidze ukutigila, muluniniilage.”^m 21 Ndeeni, uMose iihaanyililaga idanda iliheema lya kutaangʼanila ni fiinu fyonda fye vaalimilaga umusika gwa kwifuunya kwa Nguluvi. 22 Kulingʼaana ni milagililwe gya Mose, idanda iyo, ye yeene iyiivaladza ifiinu fyonda. Ngana idanda yisiitiike, apo uNguluvi asiipyanila avaanu indzanangifu dzaawo.ⁿ

Ukwitawula kwa Kilisiti

23 Neke lino, iliheema lya kutaangʼanila nu Nguluvi lya mwe naanyi umu ni fiinu fyakwe umo, fyasakulwaga fivaladzwe wugendela wa wusembe wa danda ya ndiimwa. Ifiinu ifyo, fyali mwigisila gwa liheema ilya kukyanya, neke kangi ifiinu fya kukyanya fyasakulwaga fivaladzwe wugendela wa wusembe uwunofu ukulutila idanda ya ndiimwa. 24 UKilisiti asiingiye aPiimike pa Piimike ápawuyiipwe na vaanu, apali mwigisila hela ugwa poono apali uko kukyanya. Nda haamu, iingiye aPiimike pa Piimike kukyanya, kwe ali kwali lino pa miiho ga Nguluvi wiimila weesu. 25 Kangi asiingiye kukyanya, ukuta iitawule nyakoloofu. Asaalimile ndawuli umuteekedzi umuvina ye iikwingila aPiimike pa Piimike umwaka nu mwaka, ukuteekela idanda ya ndiimwa. 26 Ngana uKilisiti aali avedzage muteekedzi umuvina ngita uyo, ngali aasakulwaga ukupumuka nyakoloofu ukuvangila uNguluvi pe aagavile ilidugulu. Neke kangi lusili ewo! Aadzile ifigono fya wusililo ifi, ukuta awodze indzanangifu dza vaanu wugendela wa kwitawula yumwene nyakamwinga swe, ukuvedza wusembe. 27 Pakuva nayula alaafuwa nyakamwinga swe nu kuhigwa. 28 Ndeeni, uKilisiti nave aafuwe nyakamwinga swe ukwitawula ukuvedza wusembe, ukuta awodze indzanangifu dza vaanu voloofu. Kangi uKilisiti alaadza ulwa kavili, si kuwodza indzanangifu, nda haamu, ukuvaleetela uwupoki avaanu avakumudzindila.