Ukwiga ikyoledzi kya Yesu
12
1 Lino, pakuva túpiliimwe ni lilugu likomi lya vaanu avaawoneesiidze kye vamufuuviilwe uNguluvi, tuhedzage fyonda ifikututanidza mu lufuuwo, ni ndzanangifu idzikutungʼangʼaanila. Na yuufwe ngita umuunu ye iinyila mu ngwila iya lunyilo, tugimbage ukwigugumidza, ukuta tufike uwusililo wa dzonda dze aaviikile uNguluvi kuwutalo ukwesu. 2 Tunyilage umusika pe twikangadza amiiho geesu kwa Yesu, ye akutulongodza ukumufuuwa uNguluvi na ye iikwilidza ulufuuwo lwesu ukufikila ku wusililo. Wiimila wa lukeelo pa miiho gaakwe iigugumiidze, asaaweene kiinu inyoni iya fuwa pa kipindulihidzo, lwe lwene íikalile apoono pa luginiyo ku liwoko ilya kundiyo pa kideego kya wutwa kya Nguluvi.3 Muhoodzage uYesu kye iigugumiidze ulwa valima-ndzanangifu avamubeedzaga, ukuta mutane ukufulugala nambe kufuwa inumbula.
UNguluvi akuvawunga avaana vaakwe, ukuta vamwidikage
4 Umusika pe mwigimba ukudzilema indzanangifu, mwiwukage ukutigila, musinaa muhomana amagoha ukufikila pe mwikwita idanda yeenyo. 5 Ongo, múseemiilwe mbandu amadzwi agakuvasungʼanidza unyeenye, ngita udaada kye akumulongela umuswamuve? Amadzwi ago giitigila,
“Muswamu-vanguave, ngana uMutwa akuwundze, upulikidzage wunofu,
kangi utanage ukufuwa inumbula pe akukukenyela.
6 Pakuva uNguluvi akumuwundza umuunu ye avedzaga ye akumwenda,
kangi akumupedza yula ye akumwidikila ukutigila, muswamuve.”a
7 Lino mwigugumidzage umusika uNguluvi pe akuvawundza nu kumwidika. Akuvalimila ewo, pakuva unyeenye nye vaana vaakwe. Umwana yuki ye asiiwundzwa nu daadiye? 8 UNguluvi akuvawundza avaana vaakwe vonda ukumwidika. Ngana asikuvawundza, apo mudzeelage ukutigila, musili migendela pa luvandza nambe vaana vaakwe va ndakyene. 9 Pamwinga na idzo, uneefwe twavaginiyaga avadadiisu va mwe naanyi avatuwundzaga ukuviidika. Ongo, tusiivagila hiilo ukuwiidika uwutawulilwe wa Nguluvi uDadiisu ye ali kukyanya, ukuta tuvedzage nu wuumi uwa mbeepali? 10 Avadadiisu va pe naanyi vakutuwundza ukuviidika mu musika mudebe pe viiwona lwinogela. Neke kangi uNguluvi akutuwundza wiimila weesu, ukuta tuhange nave ku wiimike waakwe. 11 Sikwali umuunu ye iikeela pe iiwundzwa, ukuta iidikage, nda haamu, iihuguvala. Neke kangi pambele ku vala ávawundziidzwe nu kupulikidza, lukuvaleetela uwugolofu nu lutengamaso mu miikalile gyawo.
12 Neke lino, mukangadzage amawoko geenyo ágalelewiike na mafugamilo geenyo amatenda.b 13 “Mugendage mu ngʼaasi ídzigolwike,”c ukuta avanya wulemwa mu lufuuwo lwawo vatanage ukuguwa, nda haamu, vakangalage.
14 Mugimbage ukwikalasa na vaanu vonda mu lutengamaso. Kangi muvedzage viimike, pakuva sikwali ye alamuwona uNguluvi kitavedza mwimike. 15 Mwiyangalilage ukutigila, atanage ukuvedza pwali umuunu ye asikuluginiya ulusungu lwa Nguluvi nu kulwambudza. Kangi mwiyangalilage ukutigila, atanage ukuvedza pwali umuunu ye iikula ngita midela imikali. Uyu akuvaheniya nu kuvalamya avaanu voloofu. 16 Kangi mwiyangalilage ukutigila, atanage ukuvedza pwali umugoni, enewuli ye asikumuginiya uNguluvi ngita uEsawo. Uyo aagudziidze ilipwela lyakwe ilya wuvele wiimila wa kaliyo kamwinga hela.d 17 Pambele pe aasakaga ukwanukila ilipwela lyakwe ilya kufuunyililwa, ngita kye mwidzeela udaadiye aakaanile ukumufuunyilila. UEsawo asaafuunyiliilwe, nde luvedze aanyiliike hiilo nu kuvemba, pakuva umusika ugwa kupela gwali gúhelaniidze.e
Ikidunda ikiikoogofya ni kidunda kya lukeelo
18 Unyeenye musinaa mufika pa kidunda ikya kupamya, ikiikwaka umooto, kangi íkigubiikwe ni kiisi, ilyosi ni kipulavaana, ngita aVaisilaheli pe vaafikile pa kidunda Sinayi.f 19 Kangi musinaa mufika apoono aVaisilaheli pe vaapuliike isawuti dza lukwalimba, ni lidzwi likomi lya Nguluvi iliikoogofya.g Avakuhwesu pe vaapuliike, vamugongoolile uMose ukutigila, uNguluvi atane ukulonga navo kangi.h 20 Vaalongile ewo, pakuva uNguluvi aali álagiidze ukutigila, “Nde fivedze ifingʼooko enewuli umuunu ye iipamya ikidunda iki, iivagila ukutowa na maganga ukufikila pe iifuwa.”i Pe vaapuliike ululagi ulo, viibiitwe hiilo ni kitulo. 21 Dzonda idzo idzaahumiye, dzoogwifye hiilo, nayu Mose nave iitigilaga, “Ndiikoogopa nu kuhilila mbandu.”j
22 Nda haamu, unyeenye múfikile pa kidunda Sayuni, pa wudzenge wa Yelusalemu iya kukyanya. Uwo, we wudzenge wa Nguluvi ye ali muumi, kangi uko, kuli vanyamwandza mbilima mbilima ávalundiine mu lukeelo. 23 Unyeenye múfikile pa lukombesok lwa vaanu ve akuvakemeela uNguluvi ukutigila, avaana vaakwe vavele, amataawa gaawo gásimbiilwe kukyanya. Múfikile pa miiho ga Nguluvi umuhidzi va vaanu vonda. Múfikile kukyanya kwe koovali avaanu avagolofu, ve ávakwiliidze uNguluvi. 24 Kangi múfikile kwa Yesu ye iiteepudza avaanu nu Nguluvi mu lufingo ulupya. Múfikile ku danda ya Yesu iyiitiike pa kipindulihidzo, iyiileeta ulufuunyo hiilo ukulutila idanda ya Hebeli, iyiitiike nayo.l
25 Mwiyangalilage, mumupulikidzage uNguluvi pe iilonga. Avakuhwesu vasaasugile ulupedzom pe vaakaanile ukumupulikidza uNguluvi ye avawungile pe naanyi apa. Na yuufwe ndakyene, tusilaasuga ukupedzwa ngana twikaana ukumupulikidza uNguluvi ye akutuwunga ukuhuma kukyanya. 26 Umusika ugo uNguluvi pe iilonga,n ilidzwi lyakwe lyatendiimye inyi. Neke kangi lino, áhuuviidze ukutigila, “Ndihadza ndiitendemya inyi kangi, si nyi yeene hela, nda haamu, na kukyanya nako.”o 27 Ilidzwi ilyo “kangi,” liiwoneesa ukutigila, ifiinu fyonda ifyagaviilwe mu lidugulu, fihadza fiitendemywa nu kuhedzwa, ukuta fisigale fila ifisiitendemywa.