Ihaate iyi yaasimbiilwe nu mutume Petulo. Avasimbiye avafuuwa avaapalaangʼaniye imbali dzihaanu dza nyi iyaatambulwaga Asya Ndoodo, lino ye nyi iya Wutuluki. Avaanu avo akuvatambula vagendzi (1:1, 17; 2:11), ukuwoneesa ukutigila, pe naanyi apa vaheleli-ngʼaasi. UPetulo akuvasimbila ukuhuma ku wudzenge wa Loma, we aatambulaga Babeli pe iityedza apoono (5:13). Ihaate iyi yaasimbiilwe umwaka ngita gwa makyumi mutanda ni givili (62) wuli, ukuhuma pe iiholwa uYesu Kilisiti. USilivano ye mwene ye amutangile uPetulo ukusimba (5:12).

Lwiwoneka ukutigila, umusika ugo, avafuuwa avo vaapumwike wiimila wa lufuuwo lwawo ku vafudiingʼano vaawo avasamudzeeliye uNguluvi. Uwugulume wa Petulo waali wa kuvakangadza inumbula pa kuviiwusa ukutigila, ve vaanu va Nguluvi, ukuta vakolaatidzage ulufuuwo lwawo. Iivanga pa kumuhongedza uNguluvi wiimila wa wupoki waawo, kangi iilonga ikiganulo kya wupoki uwo mu miikalile gyawo (1:3–2:10). Iigina ukuvawulanidza ulwa migendele imiimike igiivagila kulingʼaana nu wupoki waawo, ukwilefya ku vanya wutawulilwe vonda, imigendele ku vamwadaada na vamwayuuva, avasutu na vakomi (2:11–4:11), avimiilidzi va lukombeso, avavaha na vavinano (5:1-5). Akuvasimbila ikihwano kya Kilisiti ye aapumwiswe nu kubedwa mu miikalile gyakwe pe naanyi nu kuvakangadza inumbula, ukuta viigugumidzage pe viipumuswa (4:12–5:11).