Ihaate iyi ye ya kavili iyaasimbiilwe nu mutume Petulo. Uyo iilonga ukutigila, umwene ye muunu ye aalolile na miiho imiikalile gya Yesu, hiilo indolo dzaakwe pe aahambwike uluhwano (1:17-18; Matayo 17:5). UPetulo aasimbile ihaate iyi pe aali ku wudzenge wa Loma mu myaka gya makyumi mutanda ni gihaanu (65) ukufikila makyumi mutanda ni ginyigondza (69), ukuhuma pe iiholwa uYesu Kilisiti, umusika mudebe pe asinaa afuwa uPetulo.

UPetulo aasimbile ihaate iyi mu wugulume wa kuvakangadza inumbula avafuuwa ukutigila, viikalage imiikalile gya kumwidika uNguluvi. Akuviiwusa ukutigila, vápeeliilwe ingufu ya Nguluvi iya kuvatanga ukuniniila imigendele iminofu, kangi vakolaatidzage indakyene (1:3-21). Iigina ukuvawunga ukutigila, vatanage ukuvaniniila avawulanidzi va wudesi (2:1-22). Akuvalagidza vavabedalilage avaanu aviitigila, uYesu áfuvaliye ukupiluka. Akuvawulanidza ukutigila, uNguluvi asihaava ukukwilidza uluhuuvidzo lwakwe, neke kangi iisaka avaanu vonda vapokwage (3:1-16). Lwe lwene viisakulwa kwikala imiikalile minofu igikumukeeledza uNguluvi (3:14).