Ihaate iyi yaasimbiilwe nu mutume Yohana. Kangi, ye musimbi va Mola iNofu ya Yesu Kilisiti, ni haate iya kavili ni ya kadatu iyiitambulwa mu litaawa lyakwe, pamwinga nu Luvilatulo lwa Yesu Kilisiti. Nde avedze asikwitambudza ilitaawa lyakwe, imisimbile gya haate iyi gyakwe, kangi imola wuli mu haate iyi dziihwanana hiilo ni kitabu kyakwe ikya Mola iNofu ya Yesu Kilisiti. Ihaate iyi yaasimbiilwe ngita umwaka gwa makyumi ligondza (90), ukuhuma pe iiholwa uYesu Kilisiti.

UYohana aasimbile imola iyi ku vafuuwa vonda ukubeedza uwudesi wa kipuga kya vaanu aviikemeelaga Vanositiki. Avo vaafuuwaga ukutigila, uYesu ye Nguluvi ndakyene, neke kangi asaali nu wumuunu wonda pe aali pe naanyi. Wiimila wa ulo, uYohana akwitambudza ukutigila, ye yumwinga va vatume ye aalolile na miiho gaakwe imiikalile gya Yesu, na mawoko gaakwe gamupamiidze uYesu (1:1-3).

Uwugulume wa Yohana wa kusimba ihaate iyi, waali wa kukwilidza ulukeelo lwakwe yumwene (1:4), ukuvakaanidza avafuuwa vatanage ukuhoka (2:1), ukuvawunga viiyefyage ni mbulanidzo idza wudesi (2:26), nu kuvoolela ndakyene ukutigila, vápokiilwe (5:13).