Ihaate iyi yaasimbiilwe nu Yuda, umaamiye va Yakobo. Ava vaali vanungʼuve va Yesu (Matayo 13:55; Maluko 6:3). UYuda avasimbiye ihaate iyi avafuuwa vonda. Ihaate iyi yaasimbiilwe biihi nu mwaka gwa makyumi mutanda (60), ukuhuma pe iiholwa uYesu Kilisiti.

Kwali na vaanu wuli mu lukombeso avasamwidikaga uNguluvi, kangi vaawulanidzaga uwudesi uwa kuvaheniya avaanu (4). Uwugulume wa Yuda waali wa kuvawunga avaanu pa kuvawoneesa imigendele na mahoodzo ga vaanu avo, ukuta vatanage ukudzangwa, kangi vakolaatidzage indakyene. Iilonga ifihwananidzo fya kataali ifya luhigo lwa Nguluvi ukuwoneesa indakyene ya luhigo ku vaanu avasikumwidika uNguluvi (5-19). Akuvawulanidza ngita kye viisakulwa kwikala wiimila wa mawungo ago (20-23). Kuli mahoodzo agiihwanana ni haate ya kavili iya Petulo: amawungo wiimila wa vawulanidzi va wudesi (2 Petulo 2:1), uwuhosi wa vanyamwandza (2 Petulo 2:4) nu wa vaanu va ku Sodoma na ku Gomola (2 Petulo 2:6).