Umusimbi va kitabu iki ye Yohana mutume, ye akwitambula mutovela-ligendwa va Nguluvi (1:1, 9). Iki kye kitabu ikya wusililo ukwakwe mu fye aasimbile. Uyo ye musimbi va Mola iNofu ya Yesu Kilisiti ni haate dzidatu idziitambulwa mu litaawa lyakwe. Ikitabu iki kyasimbiilwe ngita umwaka gwa makyumi ligondza ni gihaanu (95), ukuhuma pe iiholwa uYesu Kilisiti, umusika uYohana pe aadindiilwe mu ligunguli iliikemeelwa Patimo (1:9). Umusika ugo, uKayisali yumwinga ye aakemeelwaga Domityano aatemile ku Loma uko. Uyo aadzeelaniike wiimila wa wusali waakwe nu kuvapumusa hiilo avafuuwa. UYohana avasimbiye avafuuwa va ngʼombeso mufungʼati (7) mu mugoola gwa Asya Ndoodo, gwe gwene lino ye nyi iya Wutuluki. Vaawulaniidzwe ukutigila, viinatilage ulufuuwo lwawo nu kwigugumidza ukufikila uwusililo (13:10; 14:12), kangi vakolaatidzage uluhuuvilo ukutigila, uYesu alaapiluka kwave (22:20).

UNguluvi amupeeliye uYohana ifiwoneko, neke uYohana asimbage kye akiweene nu kupulika ngita madzwi ga wuvidzi. Aapeeliilwe imola ku ngʼombeso mufungʼati idzo ukuvawunga avafuuwa avo, ukuta vadeludzage uwuhosi (2:7, 11, 17, 26; 3:5, 12, 21). Kangi aapeeliilwe ukulola uwuhosi ngita kye wuhadza wiikoongelela mu lidugulu wugendela wa Setano (4:1–16:21), nu wusililo ndawuli uNguluvi kye ahadza iideludza uwuhosi uwo (17:1–20:15).