Ikiwoneko kya kideego kya wutwa kya Nguluvi
4
1 Pe dzíhelaniidze idzo, neke ndilolage, ndikiwonage ikiwoneko ikingi. Ndiiwonaga ulwidzi lúdindwike kukyanya. Isawuti iyo iyaali ngita ya lukwalimba ye ndaapuliike pa kutala yikuundongelaga yiitigilaga, “Waadze, wiinuke kukyanya kuno, ukuta ndikuwoneese amadzwi agiisakulwa gahumile, pe dziivedza dzíhelaniidze idzo.”2 Baaho na baaho, ndiimemedzwaga uMubepo uMwimike, ndiilolaga, ndikukiwonaga ikideego kya wutwa kukyanya, pakyanya apaakwe íikaliye yumwinga. 3 Uyo ye iikalile pa kideego ikyo, aangʼalitaga hiilo ngita maganga matalamu ganya luduungʼu. Ikideego ikyo kyali kípiliimwe ni likangigulu, ilyangʼalitaga hiilo ngita liganga litalamu ilinya lubogaboga kuhelela ku luduungʼu. 4 Ifideego ifingi fya wutwa makyumi gavili ni fitayi (24) fyakipiliime ikideego kya wutwa ikyo. Mu fideego ifyo, viikalile avavaha makyumi gavili na vatayi, váfwalile imyenda mivalafu ni ngeela dza sahabu ku mituwe gyawo. 5 Pa kideego kya wutwa ikyo, paahumaga imuli dza lipamba, ifyuyililo ni libalamusi. Pawutalo apaakwe paali ni muli mufungʼati (7) dza mooto idziikwaka. Imuli idzo gye Mibepo mufungʼati gya Nguluvi. 6 Pawutalo pa kideego apo, paali ni kiinu ngita nyandza ya kinyawiilole ikiilangala. Inyandza iyo yaali ngita liganga iliingʼaala hiilo.
Pagatinagati paali ni figawa ifyumi fitayi, ifyali na miiho kumbele nu kuwutalo, ífipiliime imbali dzonda dza kideego kya wutwa. 7 Ikigawa kya kutala kyahwaniine ni nyalupala, ikya wuvili kyahwaniine ni senga ingʼambako, ikya wudatu ku miiho kyahwaniine nu muunu, ikya wutayi kyahwaniine ni lingasimula iliiguluka. 8 Ifigawa ifyumi fyonda ifyo fyali na mapabatilo mutanda (6), kangi imivili gyawo gyonda gyamemile amiiho napa paanyi pa mapabatilo. Fisiipola ukulonga pakilo na pa muunyi fiitigila,
“Mwimike, Mwimike, Mwimike,
ye Mutwa Nguluvi uMunya Ngufu Dzonda.
Aali pwali, ali pwali, na ye iikwadza.”
9 Ifigawa fyumi ifyo pe fikumupeela indolo, uluginiyo nu luhongedzo uyo ye iikalile pa kideego kya wutwa, na ye ali muumi mbeepali, 10 avavaha makyumi gavili na vatayi avo, vakwigwisaga kinyalileme pawutalo apaakwe, kuno vakumugondamila uyo ye ali muumi mbeepali. Navo viiviikaga ingeela dzaawo pawutalo pa kideego kya wutwa, viitigilaga,
11 “Mutwa nu Nguluvi veesu, wiivagila ukwanukila indolo, uluginiyo ni ngufu.
Pakuva uveeve ye mwene ye waagavile ifiinu fyonda,
mu mikeelelele gyako fyagaviilwe, kangi poofili.”