Avaanu va Nguluvi viikolekelwa indonya
7
1 Pe dzíhelaniidze idzo, ndikuvawonaga avanyamwandza vatayi, nayula íimile pa lubali lumwinga lwa nyi. Navo vaatanidzaga ilivelo ukuhuma imbali dzonda dzitayi dza nyi, ukuta litane ukupugila ku nyi ingʼafu, ku nyandza, nambe ku libiki lilivedzaga. 2 Avanyamwandza avo vaapeeliilwe uwutawulilwe wa kwananga inyi ingʼafu ni nyandza. Neke ndimuwonage umunyamwandza uyungi iikwinuka ukuhuma kunena, ányamuwe ikihundo kya Nguluvi ye ali muumi. Akuvakemeelaga ni sawuti ngomi avanyamwandza vatayi avo 3 iitigilaga, “Mutane ukulemadza inyi ngʼafu, inyandza nambe mibiki, ukufikila pe twivedza túvakolekeliye indonya pa mbumila dza vatovela-ligendwa vonda va Nguluvi veesu.”4 Neke ndipulikage imbalilo ya vaanu avaali vákolekeliilwe indonya ya Nguluvi pa mbumila. Navo vaali ligana limwinga makyumi gatayi na vatayi mbilima (144,000) ukuhuma ifipelela fyonda finyikyumi ni fivili (12) fya Vaisilaheli. 5 Avaanu avaakolekeliilwe indonya, vaali vanyikyumi na vavili mbilima (12,000) pa kipelela.
Vanyikyumi na vavili mbilima va kipelela kya Yuda,
vanyikyumi na vavili mbilima va kipelela kya Lubeni,
vanyikyumi na vavili mbilima va kipelela kya Gadi.
6 Vanyikyumi na vavili mbilima va kipelela kya Aseli,
vanyikyumi na vavili mbilima va kipelela kya Nafutali,
vanyikyumi na vavili mbilima va kipelela kya Manasi.
7 Vanyikyumi na vavili mbilima va kipelela kya Simyoni,
vanyikyumi na vavili mbilima va kipelela kya Levi,
vanyikyumi na vavili mbilima va kipelela kya Isikali.
8 Vanyikyumi na vavili mbilima va kipelela kya Sabuloni,
vanyikyumi na vavili mbilima va kipelela kya Yosefu,
vanyikyumi na vavili mbilima va kipelela kya Benyamini.
Ililugu likomi lya vaanu va nyi dzonda
9 Pe dzíhelaniidze idzo ndiilolaga, ndikuliwonaga ililugu likomi lya vaanu avasiivalilika. Avaanu ukuhuma mu vaanu vonda, nyi dzonda, fipelela fyonda, ni ndongele dzonda, víimile pawutalo pa kideego kya wutwa na pawutalo pa Kaanangʼolo, váfwalile nayula umwingila muvalafu, kangi vákoleeliye amakindo. 10 Viikwinusaga isawuti viitigilaga,
“Uwupoki wiihuma kwa Nguluvi veesu,
umwene ye íikalile pa kideego kya wutwa,
nu kwa Kaanangʼolo.”
11 Avanyamwandza vonda viimile imbali dzonda dza kideego kya wutwa, avavaha avo pamwinga ni figawa ifyumi fitayi ifyo. Vonda vakwigwisaga kinyalileme pawutalo pa kideego ikyo, vakumugondamilaga uNguluvi, 12 viitigilaga,
“Eena!
Amalumbo ni ndolo,
uluhongedzo, uluhalawukagudzi nu luginiyo,
uludali ni ngufu, fivedzage ukwakwe uNguluvi veesu mbeepali na mbeepali.
Eena!”
13 Neke yumwinga va vavaha avo aambuudzage atigilage, “Úvadzeeliye avaanu avo ávafwalile imyenda minofu ve va ani, navo váhumile kwiya?”
14 Ndikumuhigaga ndiitigilaga, “Mutwave, uveeve wiidzeela.”
Akuundongelaga iitigilaga, “Avo ve vaanu avaalowiike ukuhuma mu mumuko ngomi dzila. Vákandziidze imyenda gyawo ni danda ya Kaanangʼolo, giivedzaga mivalafu mbandu. 15 Lwe lwene vali pawutalo pa kideego kya wutwa kya Nguluvi, vakumutovela iligendwa uNguluvi ikilo nu muunyi mu tembeli yaakwe. Nave ye íikalile pa kideego kya wutwa, aliikalasaga navo nu kuvaloleela. 16 'Navo vasilaavedza ni ndzala, nambe ngʼelo kangi, nambe kunyaanywa ni lidzuwa, nambe kunyaanywa nu luuya luluvedzaga.’a 17 Pakuva aKaanangʼolo akali pagatinagati pa kideego kya wutwa, kalavadiimaga nu ‘kuvasindika ku fidwiwuli fya lulenga ulwa wuumi.’b Kangi uNguluvi alaapolosa amoohodzi gonda mu miiho gaawo.”