Umunyamwandza va wuhaanu iitova ulukwalimba lwakwe
9
1 Umunyamwandza va wuhaanu, nave iitovaga ulukwalimba lwakwe. Neke ndiluwonage ulutondwe ulwali lúguwe mu nyi ukuhuma kukyanya. Lwipeelwaga ikidindulilo kya lilindi ilya ku wulungu.a 2 Ikidindulilo ikyo kiidindulaga ililindi ilya ku wulungu ilyo, liihumilaga ilyosi ngita lya litende likomi. Ni lidzuwa ni kyanya fiitilivadzwaga wiimila wa lyosi ukuhuma mu lilindi ilya ku wulungu ilyo. 3 Mu lyosi ilyo, giihumilaga amadeede nu kutagalila mu nyi. Giipeelwaga ingufu ya kuluma ngita kimununi. 4 Amadeede ago giilagilwaga gatane ukwananga amasoli, ifimelo nambe mibiki gigivedzaga mu nyi. Nda haamu, gavalemadzage hela avaanu avasili ni ndonya ya Nguluvi pa mbumilab dzaawo. 5 Kangi amadeede ago gasaapeeliilwe ingufu dza kukoma avaanu avo, nda haamu, kuvapumusa mu myedzi gihaanu. Uwuvafi wa mumuko idzo waali ngita wuvafi wa kulumwa ni kimununi. 6 Ifigono ifyo avaanu valayisakula ifuwa, neke kangi vasilayiwona. Valaadoboka ukufuwa, ifuwa nayo yilavanyila.7 Amadeede ago, gaahwaniine ni fwalasi ídzigelaniidzwe ukuhelela ku magoha.c Gaafwalile ikiinu ngita ngeela dza sahabu pa mituwe gyawo, kangi ku miiho kwawo gaahwaniine na vaanu. 8 Gaali ni fwili naali ngita dza vamwayuuva, na miino mataali ngita ga nyalupala. 9 Mu mambaga dzaawo gaafwalile ifisika-mambaga fya kyuma. Amapabatilo gaawo pe giiguluka, guuyaga ngita sawuti ya migeleti gyoloofu igiikwegwa ni fwalasi idziinyilila ku magoha. 10 Gaali ni mikila iginya mboolya idziiluma ngita fimununi, kangi wugendela wa mboolya idzo, gaali ni ngufu dza kulemadza avaanu mu myedzi gihaanu. 11 Gaali nu mutwa vaawo, umutwa uyo aali munyamwandza va lilindi ilya ku wulungu. Umunyamwandza uyo mu Kiebulaniya iitambulwa Abadoni, na mu Kigiliki iitambulwa Apolyoni, kwe kutigila Mutipudzi.
12 Lolage, ulutipulo lwa kutala lúhelaniidze, neke kangi mulukagulage ukutigila, dzaave ngʼali dzivili idziikwadza.
Umunyamwandza va mutanda iitova ulukwalimba lwakwe
13 Umunyamwandza va mutanda (6) iitovaga ulukwalimba lwakwe. Neke ndipulikage isawuti yiilonga ukuhuma mu membe dzitayi dzila idza kiteekelelo kya sahabu ikigenda pawutalo pa Nguluvi. 14 Isawuti iyo, yikumulongelaga umunyamwandza va mutanda umunya lukwalimba uyo yiitigilaga, “Muvaawulile avanyamwandza vatayi ávapingiilwe mu mukoga mukomi gwa Efulata.” 15 Avanyamwandza vatayi avo, avaagelaniidzwe mu kivalilo kiikyo ikya kigono kiikyo ikya mwedzi guugo gwa mwaka guugo, viikwawulwaga, ukuta vakome ulubali lumwinga mu dzidatu (1/3) ulwa vaanu mu nyi. 16 Giikwadzaga amalugu goloofu ga vakolakyanda ávahovile ifwalasi. Ndiipulikaga ukutigila, imbalilo yaawo yaali magana gavili mbilima mbilima (200,000,000). 17 Mu kiwoneko ndikudziwonaga ifwalasi na vahova-fwalasi nayula áfwalile ikyuma kya kukenga imambaga ikinya luduungʼu ngita mooto, yinyawulanga niitu, ni yinyalusweswe. Ndikugiwonaga imituwe gya fwalasi gili ngita gya nyalupala. Mu milomo gyawo, gwihumilaga umooto mukali hiilo ni lyosi. 18 Inipulod dzidatu idzi, kwe kutigila mooto mukali hiilo ni lyosi ukuhuma mu milomo gya fwalasi, dziikomaga lubali lumwinga mu dzidatu dza vaanu. 19 Ingufu dza fwalasi idzo, dzaali ku milomo na ku mikila gyawo, pakuva imikila gyawo gyali ngita mayoka idzinya mituwe gya kulemadza avaanu.
20 Avaanu avaasigiye, avasaafuwe ni nipulo idzo, vasaapelile kangi vasafilekile ifihwananguluvi fye vaawuyiipe na mawoko gaawo. Vasaalekile ukwifuunya ku mibepo imiviifu ni fihwananguluvi fye vaawuyiipe ni sahabu, amagoobeli, amadini ga saba, amaganga ni mibiki. Ifihwananguluvi ifyo fisiilola, nambe kupulika, nambe kugenda. 21 Kangi vasaapelile nambe kuwuleka uwuwuladzi waawo, uwuhavi, uwugoni nu wuhiidzi waawo.