Eesiteer 5

Eesiteer cūtì ubɔti cee

1 Bi bóob́ kinyɔkɔ míǹ winta dalee, ní Eesiteer dū unimpubɔti bɔkutiŋ ki pēeǹ ki nín cá ubɔti cee. U bàn̄ee ní ki kɔ́ ki yú ubɔti beecindin ki bíitiǹ kunaakoou. Ubɔti kā u-naakookun u-beejal pu ní u-nimbiin túĺ mmɔŋki punyɔkɔki. 2 U nín ká unimpubɔti Eesiteer yú dibeecindinee, ní u pú-u diyimɔɔl ki tāntì u-bɔtikpandɔŋu ŋun sá sindaariyee, ní Eesiteer sútìń ki gbēē nyɔkɔpu.

3 Ní ubɔti bālifì-u yii: «Unimpubɔti Eesiteer, ba ŋá? Ba ní a là ní? Báà an yaa sá m-beel dijandi ní a là, m làá tīī-si.» 4 Ní Eesiteer kíí-u yii: «An yaa bàà fáatì ti-baa ubɔti u nì Amaani ń bàà dāan̄ m-cee díǹ kí jī tican tin m bɔ́ntì kí ŋá kí tīī-uee.» 5 Ní ubɔti tú unil dicilpu niin ú tùkù Amaani yii ú bɔ́ntí malaa malaa kí dāan̄ bí cùú jī tican tin Eesiteer bɔ́ntì ki yíiń-bee. Ní Amaani dɔ́miń ki céeǹ ubɔti bí cùú jī tican tin Eesiteer bɔ́ntì ki yíiń-bee. 6 Bi jíń tijin ki dóòyee ní ubɔti bālifì Eesiteer yii: «Ba ní a là ní? Báà an yaa sá m-beel dijandi ní a yaa là, m làá tīī-si.» 7 Ní Eesiteer kíí-u yii: «Tin páb́-mi m là kí mèè-see sèé. 8 Ti-baa ubɔti, m yaa ká diyimɔɔl a-cee, ní an yaa fáatì-si yii á ŋá tin páb́-mi m là kí mèè-si á tīī-mee, sii nì Amaani ń fu gítiń fool kí dāá jī tican tin m làá fu tí bɔ́ntí kí tīī-nee. Niin ní m làá fu tùkù ti-baa ubɔti tin m là ú ŋá kí tīī-mee.»

Amaani bɔ́ntì ndɔ kí lúntí Maardoosee

9 Yaadalee Amaani nìn nyáń unimpubɔti dumpu an mɔ́ɔkiǹ-u u-pɔbil píil̀. Niinee ní u ká Maardoosee ubɔti naakooku nyɔkɔpu, ama ní úǹ kaa cīŋkì u-ba báà fiii ní kaa nín tīī-u disíndi. Niinee Amaani fōō Maardoosee pu diŋuul ŋkpitim pu. 10 Ní u cúú u-ba kaa lī tiba ní ki nín kùǹ. U bàn̄ee ní ki yíiń u-bɔɔbi nì u-nimpuu Seereesi. 11 Niinee ní Amaani bíi dàkà u-ba ki sòoǹ nì bi u nín cáá tigaajati tikpil nì jipɔmbi kupaau puee nì jilma un ubɔti tīī-u ki dū-u ki kāaǹ mpaan ŋun pu u jítiǹ u-kàliŋkpilib kɔkɔee. 12 Amaani nìn gíti bí yii: «Unimpubɔti Eesiteer nín ŋá tican ki yíiń ubɔtee, man baba ní u yíiń ḿ céeǹ ubɔti, ní ti cūtì díǹ ki jíń. U gíti tí yíiń-ti fool man nì ubɔti tí fu cù u-cee kí jī. 13 Ama tin bí nee kaa pée tìì-mi mmɔn ŋubɔ, ŋyunti ŋun ní Maardoosee ujuudaja gbíntìi kā u-paaŋŋu dibeecindi nyɔkɔpu m wāĺ-uee.» 14 Niinee ní u-nimpuu Seereesi nì u-bɔɔbi kɔkɔ bí-u yii: «Nyàab̀ ndɔ ŋun fɔ̀kɔ̀ kii meetab mmuŋku nì biŋmooyee. Fool kutaafaauee, á fu mèè ubɔti yii bí dū ŋŋmii kí kúĺ Maardoosee neen kí cáá-u kí lúntí ndɔ pu ní sii nì ubɔti ń nīn cá jiŋaal nì dipɔɔsɔŋkil.» An nyɔɔbundee mɔ́ɔkiǹ Amaani, ní u yāntì bi bɔ́ntì ndɔ ki yóoǹ.