Eesiteer 6

Ubɔti tīī Maardoosee tinyool

1 Kunyeeu gbantee, ŋgeem nìn sáǹ ubɔti nimbiliŋ pu, ní u yāntì bi cáań kugbɔŋu kun poon bi ŋmàn̄ tibɔti tin nìn jítì bibɔtiibi pu dooooyee ki kàan̄ u-nimbiin. 2 Bi kàan̄ee ki ká laakin ubɔti Asuweerusi faabi bili, Bagitan nì Teereesi bin nìn cí ubɔti punyɔkɔkee nìn nyàab̀ kí kpɔ̀ ubɔtee, nì Maardoosee nín nìn bīitì bi-pu puee^a. 3 Ní ubɔti bí yii: «Maardoosee nín nìn ŋá mimmee, ba nyooti nì ba paati ní bi nìn tīī-u?» Ní ubɔti kpambaliŋ bí yii: «Baa nìn tīī-u tiba.» 4 Ni ubɔti bí yii: «Ŋma di bí dicindi?» Ŋyunti gbantee Amaani kóoń ubɔti cindi kí bàà tùkù-u yii u bɔ́ntì ndɔ ki cáań kí dūú lúntí Maardoosee dee. 5 Ní ubɔti kpambaliŋ kíí-u yii: «Amaani di bí dicindi.» Ní ubɔti bí yii: «Tùkùmaan-u yii ú kóoń.» 6 Ní Amaani kɔ́, ní ubɔti bālifì-u yii: «Ubɔti yaa là kí tīī unil ubɔ jilmee, u ŋáań-u mana ní?» Amaani nìn dākafì yii: «Ŋma di gíti bí ubɔti là kí tīī-u jilma an yaa kaa sá man?» 7 Ní Amaani kíí ubɔti yii: «Ti-baa ubɔti, a yaa là kí tīī unil ubɔ jilmee, 8 an sá bí cáań dibeebɔkutil din ubɔti pēeǹee, nì ubɔti taamuu un pu u kāl̀ee, ní kí dū ubɔti beefuuliiki kí cíkiń-u. 9 Ní bí lēē bikàliŋkpilib kansikin ubɔ, kí dū dibeebɔkutilee nì utaamu kí dūú ŋúbiǹ udaan ń dūú pèen̄ unil un ubɔti là kí tīī jilmee ní kí dū-u kí kàan̄ utaamuee pu. Ní ú cáá-u kí nīn yìiǹ kitiŋin, ní binib ń nīn līī u-nyɔkɔpu ki tátí yii: <Kpèèmaan, bi nín ŋáań unil un ubɔti là kí tīī jilmee puee sèé!>»

10 Ní ubɔti bí Amaani yii: «Too, malaa cùú yòon̄ dibeebɔkutil nì utaamu kí ŋá kii a nín pée sòon̄ pu nee kí tīī Maardoosee ujuudaja un kā dibeecindi punyɔkɔpuee. A nín pée lī puee, á ŋá míǹ deedee kí taa bàtī tiba.» 11 Ní Amaani cūtìi nyàab̄ dibeebɔkutil nì utaamu, ní ki dū dibeebɔkutilee ki pēeǹ Maardoosee, ní ki dū-u ki kāaǹ utaamu pu, ní ki cáá-u ki yìin̄ kitiŋin, ní ki līī u-nyɔkɔpu ki tátí yii: «Kpèèmaan, bi nín ŋáań unil un ubɔti là kí tīī jilmee puee sèé!»

12 Bi ŋá míǹ ki dóòyee, ní Maardoosee fātì dibeecindi punyɔkɔpu, ní Amaani nín kùǹ malaa u-dumpu nì icoo, u-yil tīī. 13 Amaani bàn̄ee ní ki máafì u-nimpuu Seereesi nì u-bɔɔbi tin jítèe kɔkɔ. Niinee ní u-bɔɔbi bin kpòotī-uee nì u-nimpuu Seereesi bí-u yii: «Maardoosee un nimbiin a kíĺ ki bíi gbàantí nee sá ujuudaja ní. An puee a pée gíti kpá kí ŋmā-u, sii làá mɔ̀tīí nīn sìntī taapu ní ki cá.» 14 Bi bí ki sòoǹee ní ubɔti faabi dɔ́miń ki yōoǹ Amaani malaa, bi búntì tican tin Eesiteer bɔ́ntì ki yíiń-bee laŋki.