Yoob 1

Kugbɔŋu kun sòoǹ

Yoob

puee

Unimbɔti yāntì Sitaan cɔ́ŋkì Yoob

1 Uninja ubɔ nìn bí Uusi tiŋkin bi yíì-u Yoob. Baa nìn kāntí u-pu tikpitil tiba ní u-pɔbil nìn bí diba nì Unimbɔti. U nìn fàŋkí Unimbɔti ní ki nìn fàtī u-boon ki tìì ikpiti. 2 U nìn cáá mbininjabiyaamu mululi nì nnimpubiyaamu muta. 3 U nìn cáá ipii kutukub biluli, igutaamu kutukub bita, inajaa kutuku nì mmansalimu alaataa aŋmoo nì bitɔntɔnliibi tikpil. Ŋwìiń nyalaŋki púee, ubɔ kaa nìn cáá tigaajati ki bàn̄ Yoob.

4 Yoob jipɔmbi kansikin ubɔ nìn ŋáań tijin u-dumpu ní u nì bin kɔkɔ kíǹee ń kpāfì kí jī. Bi nìn ŋáań míǹ ní ki kpántí ní ki nìn yíì bi-niisalib bitee, ní bí kpāfì kí jī kí nyɔ̀. 5 Bi yaa nìn jíń jíń míǹ ki dóòyee ní Yoob ń yíiń-bi ní kí ŋá-bi circir. U nìn yíkí kutaafaau pɔ̀lpɔl ní kí ŋá saraawɔkaa u-biyaamu kɔkɔ yil pu, di sá yii u nìn lì yii: «An yaa yíì m-jipɔmbi ŋá ikpiti ki tɔ́ Unimbɔti mbusu bi-pɔbiliŋin.» Míǹ ní Yoob nìn pée ŋáań ŋyunti kamaa.

6 Dalba, Unimbɔti tuuŋyi dɔ́miń ti-Dindaan kpafil. Sitaan, ukuŋfil mun nìn bí bi-kansikin. 7 Ti-Dindaan nìn bālifì Sitaan yii: «La ní a nyánní ní?» Ní Sitaan kíí ti-Dindaan yii: «M cūtìi yìin̄ yìin̄ ki māntì kitiŋ pu ní.» 8 Niinee ní ti-Dindaan bí Sitaan yii: «A ká m-tɔntɔnliu Yoobaa! Waa cáá juti kitiŋ pu. Baa kāntí u-pu tikpitil tiba ní u-pɔbil bí diba nì mi. U fàŋkí man Unimbɔti ní ki fàtī u-boon ki tìì ikpiti.» 9 Ama ní ukuŋfil kíí-u yii: «A nyí yii an sá fám ní Yoob fàŋkí-saaa? 10 Sii di kaa dū a-wundi ki bàkā u nì u-dicaŋku nì u-gaajati kɔkɔ pu kii digundeeee? A bīiǹ u-tuuŋŋi kɔkɔ pu ní ki yāntì u-waŋkuti būtì ki gbí kitiŋ kɔkɔ. 11 Ama a yaa là, á tàntī a-ŋal kí fōō tin kɔkɔ u cááyee kí kpèè u yaa kaa sòon̄ ki bíil̀-si^a!» 12 Niinee ní ti-Dindaan bí ukuŋfil yii: «Too, tin kɔkɔ u cááyee bí a-ŋaan. Ama á nīn nyíǹ a-ba kí taa gbēē úǹ u-ba.»

Niinee ní ukuŋfil nyáń ti-Dindaan nimbiin ki nín cá.

13 Dalba Yoob bisalib nì u-jipɔmbi kpáfì bi-maan ukpil cee ki bíi jīǹ ki nyù, 14 ní ntuun dūu bāań Yoob cee ki bí-u yii: «Inaa bàà bíi kù tikpaal ní mmansalimu bí ki kɔ́ĺ-i ki ŋmóò timool, 15 ní Seeba yab péetì-i ní ki kūū a-tɔntɔnliibi. Man baba di pée ŋmátì ní ki dɔ́miń kí tùkù-si.»

16 Yoob tɔntɔnliuee nìn dáá bíi sòoǹ u-nyɔkɔ kaa láá ŋmíl̀ ní ubɔ mun dūu bāań ki bí-u yii: «Unimbɔti ŋmiŋu ŋubɔ nyánní yilpu ki wùn̄ ipii nì a-tɔntɔnliibi kɔkɔ. Man baba di pée ŋmátì ní ki dɔ́miń kí tùkù-si.»

17 U nìn dáá bíi sòoǹ kaa láá ŋmíl̀ ní ubɔ mun tí bāań ki bí yii: «Kaaldee yab ŋá akiti ata ki dɔ́miń ki jéetì a-gutaamui pu ki péetì-i ní ki dū ntàataajimu ki kūū a-tɔntɔnliibi kɔkɔ. Man baba di pée ŋmátì ní m dɔ́miń kí tùkù-si.»

18 U nìn dáá bíi sòoǹ kaa láá ŋmíl̀ ní ubɔ mun tí bāań ki bí yii: «A-bisalib nì a-jipɔmbi bàà bí bi-maan ukpil cee ki bíi jīǹ ki nyù 19 ní kubuŋkpaaŋŋu kubɔ nyánní kuteeu pú ki yá kudii jannaatiliŋ. Kudiiyee lítì ki tàb̄ binipɔmbee ki kūū-bi. Man baba di pée ŋmátì ní m dɔ́miń kí tùkù-si.»

20 Niinee Yoob nyīī yíkì ki cúú u-bɔkutikpaandi ki dáaĺ ki cátì ní ki kōol̀ u-yil diyibaakpandi ní ki tātìi gbāaǹ u-yigbeel tūū kitiŋ 21 ki lī yii:

«M nyáń m-na poon dicancaŋgbeel ní,

dicancaŋgbeel ní m làá tí fàtīí gítí.

Ti-Dindaan di tīī,

ti-Dindaan di cúú ki fōō.

Ti-Dindaan yindi ń ká tinyool!»

22 Agìń gbanti kɔkɔ poonee, Yoob kaa nìn ŋá ikpiti. Waa nìn sòon̄ ki bíil̀ Unimbɔti.