Yoob 2

Sitaan gíti cɔ́ŋkì Yoob nliliitiim

1 Dalba muee, Unimbɔti tuuŋyi tí dɔ́miń ti-Dindaan kpafil. Sitaan, ukuŋfil mun nìn tí bí bi-kansikin kí dū u-ba kí dàkà. 2 Ti-Dindaan nìn bālifì-u yii: «La ní a nyánní ní?» Ní Sitaan kíí ti-Dindaan yii: «M cūtìi yìin̄ yìin̄ ki māntì kitiŋ pu ní.» 3 Niinee ní ti-Dindaan bí Sitaan yii: «A ká m-tɔntɔnliu Yoobaa! Waa cáá juti kitiŋ pu. Baa kāntí u-pu tikpitil tiba ní u-pɔbil bí diba nì mi. U fàŋkí man Unimbɔti ní ki fàtī u-boon ki tìì ikpiti. U gbíntìi yú nì mi nì dipɔbil diba, min kamaa a yāntì m nāaǹ-u fámee.» 4 Ama ní Sitaan kíí ti-Dindaan yii: «Iween iba kaa wù ki bàn̄ an yaa kā sii a-ba puee! Unil kíikí kí dū tin kɔkɔ u cááyee kí tīī kí ŋmā kí fīī u-ba. 5 Míǹ puee dū igbaŋween kí tɔ̄ u-pu kí kpèè u yaa kaa sòon̄ ki bíil̀-si!» 6 Niinee ní ti-Dindaan bí ukuŋfilee yii: «Too, u bí a-ŋaan, ama á taa nín gbēē u-maŋfal ní.»

7 Sitaan nyáń ti-Dindaan nimbiinee ní ki nín cá, ní ki cūtìi dū ibunsoon ki tɔ́ Yoob pu kí kíĺ u-taaŋi taapu kí cáá sāā u-yil kansikin. 8 Niinee ní Yoob tātìi kāl̀ ŋfantamin ní ki nyàab̄ abɔkati ki kɔ́tí u-ba.

9 Ní u-nimpuu bí-u yii: «A gbíntìi dáá máká Unimbɔti puɔɔɔ? Pùtì sòoǹ kí bīil̀ Unimbɔti kí kpú!» 10 Ama ní Yoob kíí-u yii: «A sòoǹ kii unimpu un yil kaa bí kudiinee. Ti fòol̄ nnaam min Unimbɔti tìì-tee, kin ba pu ní tí yíí kí taa fōō nnaabu ŋun u tīī-ti nee?»

Tin bí nee kɔkɔ poonee, Yoob kaa nìn wāaǹ u-nyɔkɔ ki sòon̄ ki yīntiǹ Unimbɔti.

Yoob bɔɔbi bita dɔ́miń ki māntì u-pu

11 Yoob bɔɔbi bita gbìl̄ agìń ŋin jéetì u-puee ní báà ŋma yíkìń u-tiŋkin ki ŋá kinyɔɔbaantii kí cùú sɔ̄ kí tūtuǹ Yoob kí ŋméeǹ-u. Bíǹ di sá uteemanja Eeliifaasi nì usuwaja Biilidaadi nì unaamaja Soofaar. 12 Bi nín wálìń-u ndanee, baa ti béè-u. Niinee ní bi kíĺ ki bíi sūǹ mpɔn. Bi nìn cúú tiwan tin bi pēēyee ki cátì ní ki nìn dū ŋfantam ki pùkū bi-yiliŋ kí dàkà bi-nimbaaku. 13 Bi ŋá míǹ ki dóòyee ní ki dɔ́miń ki kāl̀ kitiŋ ki kɔ́ĺ Yoob ki ŋá iwiin iluli ŋwiimpu nì kunyeeu. Báà ubɔ kaa nìn wāaǹ kinyɔkɔ ki sòon̄ nì u, di sá yii bi nìn ká yii u bíi jīǹ falaa tikpil.