Yoob 11

Soofaar nín sòon̄ puee: Fàtīí gítiń Unimbɔti cee

1 Niinee ní unaamaja Soofaar fōō dinyɔɔbundi ní ki bí Yoob yii:

2 Unil un sòoǹ tikpil kii a nín sòoǹ pu nee kaa kāntí ubɔ ń kíí-uaaa?

A yaa nyí isoonee di dàkà yii a cáá ibaamɔnaaa?

3 A nín cáá kinyɔkɔee di làá yàntī binib ń kpántí bimuumbaaa?

A làá bèel̀ binib ubɔ ń taa wòoǹ-saaa?

4 A lī gba yii: «Tin m sòoǹee sá ibaamɔn,

Unimbɔti kaa làá ká m-pu tiba kí sòoǹ.»

5 M bàà pée là yii Unimbɔti ń wàan̄ kinyɔkɔ

kí sòoǹ kí kíí-si u-ba!

6 U bàà làá lēē dinyil bɔɔŋŋi kí dàkà-si.

Abɔɔn gbanti jítiǹ unil ciiŋyi ń ŋmā kí gbìl̄ taapu.

A bàà làá gbìl̄ niin yii

Unimbɔti súntì a-kpitii dijandi pu.

7 Ŋma ŋūǹ kí béé kí cíĺ Unimbɔti?

Ŋma di ŋūǹ kí béé Unimbɔti Mpɔŋkɔdaan

nín sá ukpaan puee gbeennyɔkɔ?

8 Unimbɔti ciiŋyi nyóò kii yilpu nín dátiǹ kitiŋ puee ní,

ba ní a ŋūǹ kí ŋá?

I nyóò ki jítiǹ ditaŋkpiilin.

Tilati ní a ŋūǹ kí béé?

9 I wāā ki jítiǹ kitiŋ,

ki wāā ki jítiǹ tiŋku.

10 Unimbɔti yaa cúú dibɔkpil daan ki pīiǹ kudii,

ní ki yaa yíiń udaan ibeeyiinee,

ŋma di ŋūǹ kí pìin̄ nsan?

11 Di sá yii Unimbɔti nyí binib bin kaa bí tibanee.

An kaa bàlifī ú kpèè címmm ní kí nín ká laakin ikpiti bée.

12 Ama ugbaan kaa ŋūǹ kí kpántí uciŋfiti dalba dalba,

a lì kii kumooun maŋki di kaa ŋūǹ kí kpántí kimɔŋkimaŋ puee ní.

13 Yoob, dū a-pɔbil kí tīī Unimbɔti,

ní kí yòon̄ a-ŋalii kí túĺ-u kí mèè-u.

14 Ikpiti yaa táká a-ŋaliiyee, á pítí-i kí fá,

kí taa yàntī tin kaa bí deedeeyee ń ká mpaan a-dumpu.

15 Niinee a làá gántí a-yil kí nyā icoon,

tiba kpá kí cìŋkì-si, ní aa làá fàŋkì tiba mun.

16 Di sá yii a làá súntí a-nimbinaamandi pu,

a làá dāá súntí kii nnyim min pùub̄ ki búntèe ní.

17 A-maŋfal wiiŋyi làá wāl̀ bɔ́iii kí jītíǹ kuwiŋkaŋu pu,

ní dibɔmbɔndi ń kpántí kii kutaafaauee.

18 A làá dāá nīn cáá dimákal ní kaa làá fàŋkì tiba.

Báà icoo boonee, a làá dāá gèeǹ nì ŋgbansɔŋfi.

19 A yaa láa bíi ŋùŋfēe, ubɔ kaa làá dāá pìkil̀-si.

Binib tikpil gba làá dāá nyàab̀ kí pàkà-si.

20 Ama binikpitib làá dāá nyàab̀ dijòońdi áli bi-nimbiliŋ ń lóoĺ.

Baa làá dāá ká kibalilaŋ.

Bi-mákal kɔkɔ di dāa sá ŋkúm.