Yoob 12

Yoob nín kíí puee: Kun Unimbɔti lèe ní u ŋáań

1 Niinee ní Yoob kíí yii:

2 Tiŋman, ni lafun nyí tikɔkɔ!

Ni nì iciin di làá kpāfì kí kpú.

3 Ama ma mun cáá dinyil kii nimbee ní,

naa jítiǹ-mi.

Tin ni sòon̄ee, báà ŋma pée nyí-tì ní.

4 M kūuntí ki yíì Unimbɔti ki máká yii u làá kíí-mi,

ama ní m-bɔɔbi ŋúb́-mi ki bèel̄.

Man un máká Unimbɔti pu,

baa kāntí m-pu tibee, bi ŋúb́-mi ki bèel̄.

5 Binib bin bí mmɔnnee dàkafī yii:

«Tí kpèè bin bí agìńnee fám.»

Bi sòoǹ nì bin cá kí lítée tibɔbaantiil.

6 Tiba kaa páb̀ digaŋgam dambi bi-dumpui,

bin tákà Unimbɔtee bí ŋgbansɔŋfin ní.

Bi-pɔŋŋu di sá bi-nimbɔtiu.

7 Bàlifì tiwaŋkuti, tì làá dàkà-si,

bàlifì inoon in ŋàaǹee, i làá tùkù-si.

8 Sòoǹ nì kitiŋ, kì làá dàkà-si,

tiŋkun jɔmii làá māafì-si tibɔti tikpil.

9 Tiwaŋkuti nee kɔkɔ kansikinee,

kulɔkɔ di kaa nyí yii ti-Dindaan di ŋá tin bí nee kɔkɔ?

10 Tin kɔkɔ cáá kufoouee maŋfal

nì unil kamaa fooku kā u-ŋaan ní.

11 Bi lì yii: «Ditafal tundi di sá dí nīn pílifí tibɔti,

a lì kii dilimbil mun nín dákafí tijin kí béé ti-mɔŋŋu puee.

12 Binicikitikaabi cee ní a kāntí iciin,

ní utikpil di cáá dinyil.»

13 Ama Unimbɔti di yì iciin nì mpɔn,

úǹ di tí yì isaŋki nì dinyil.

14 Kun Unimbɔti yaa gbáń ki wīīyee, ubɔ kaa ŋūǹ kí fàtīí mā,

un u yaa cúú ki tɔ́ sarkee, ubɔ kaa ŋūǹ kí nyāntí-u.

15 U yaa cúú utaayee, ŋweel nyáń dee.

U yaa tí cúú utaa ki pīitèe, kitiŋ mun bíil̀ dee.

16 Unimbɔti cáá mpɔn nì iciin.

Úǹ di yì un kíiĺ u-ba nì un kíiĺ bin kíǹee.

17 U yàntī kitiŋ pu yidambi còom̄ atakulim,

u kɔ̄ntí bibɔsoonliibi inaatuu.

18 U fòol̄ bibɔtiibi cee bi-pɔŋŋu

ní kí dū disarkabɔkutil kí pèen̄-bi.

19 U yàntī bisaraaŋaliibi còom̄ atakulim,

ní ki lábití abee dambi ki cìb̀.

20 U pìintí bin nyí isoonee nyɔmmu,

ní ki fòol̄ bitikpilib cee bi-nyil.

21 U kɔ̄ntí duulinya nikpaambi icoo,

ní ki gbákaĺ bipɔndambi bi-pɔŋŋu.

22 U nyāntí abɔɔn ŋin bí dibɔmbɔŋkpaandi poonee

ki pāantí mpaampiin pu,

ní ki bìitī tin bí ŋkúm booŋŋunee.

23 U yàntī atimbun ŋáań akpaan, ní boonee kí fàtīí nàan̄-ŋi.

U yàntī ŋí wíiǹ ní ú cúú ŋi-nib kí cùnnì kuyuŋu.

24 U yàntī kitiŋ pu kpootiliibi yiliŋ lábití,

ní ki yàntī bi tú ki yìiǹ kuteeu kun poon nsan kpée^a.

25 Bi táfí dibɔmbɔndin laakin ŋwalifi kpée,

ní ki còom̄ ki kpìntī kii bi gbí ndaamee.