Yoob 36

Unimbɔti nín dàkà binib puee

1 Eeliiwuu nìkī ki lī yii:

2 Jɔɔbi, jī m-pu kimɔtii fiii ḿ dàkà-si.

M gíti cáá kí sòoǹ Unimbɔti yil pu.

3 M-nyil nyánní ndandati ní,

m làá pɔ̀ Unimbɔti m-náanliu.

4 Tin m cáá kí tùkù-see sá ibaamɔn páaa ní,

uciŋfiti páaa di bí kɔ́ĺ-si nee.

5 Unimbɔti sá mpɔndaan ní, waa kpèé ubɔ fám,

u sá mpɔŋkpaandaan ní, u yaa lēē kí ŋá tiŋyee míǹ ní u ŋáań.

6 Waa yàntī binikpitib ń nīn bí dimaŋfalin ki cá,

ama u pɔ̀ binandambi.

7 Waa fàtī u-boon kí tīī deedeedambi.

U kàantí bibɔtiibi dibeel

ní ki tìì-bi tinyool ki cáa cá jaanjaan.

Ama bíǹ dūú kpántí bilambidambi ní.

8 Báà bi yaa kpántì bisarkadambi bi bóob́-bi ikusakaaa,

bi bíi jīǹ falaayaaa,

9 Unimbɔti di bíi dàkà-bi atuŋkpiti ŋin bi ŋée,

bi nín ŋá ikpiti in dilambil poonee.

10 U pìitī bi-tafaliŋ bí gbìl̄ tin u bíi wòoǹ-bee taapu,

ní ki bàlifī-bi bí fàtī bi-boon kí tīī ikpiti.

11 Bi yaa pílifì ki sīntì bi-ba taapu ki tīī Unimbɔtee,

bi làá kúntí bi-maŋfal wiiŋyi dipɔɔpindin

ní kí kúntí bi-biŋŋi mmɔnni.

12 Ama bi yaa kaa pílifèe,

bi làá tàkan̄ nsan ŋun cáǹ unil ditaŋkpiilinee,

ní kí kpú, di sá yii baa béè.

13 Bin kaa fōō Unimbɔti ki kíí bi-pɔbiliŋinee gbíntí bi-ŋuul poon ní,

Unimbɔti yaa bóob́-bi ikusakee, baa yíì-u ú jòoń-bi.

14 Bi dáá pɔ̀ɔǹ ní kí kpú,

bi-maŋfal wiiŋyi kúntí kii nlaakpaamuee ní.

15 Unimbɔti dù disool ní kí fīī usoodaan,

u ŋátí bi-tafaliŋ dinimbinaamandi poon ní.

16 Dinimbinaamandin ní Unimbɔti nyántìń-si

ní ki nìn yāntì a nìn bí digbilin.

Tijimmɔntiil di nìn tɔ́kɔ́ a-teebiliu pu.

17 Ama Unimbɔti kūū a-bɔti kii binikpitibee,

ní aa ŋūǹ kí kpántí tiba ibɔsoon in poon a bée.

18 Taa yàntī tigaajati ń kīil̀-si!

Taa dàkafì yii a ŋūǹ kí dū tiwampɔkaal kí dā Unimbɔti.

19 A-gaajati nì a-sindaariyau kaa ŋūǹ kí tɔ̄ ditundi,

míǹ mbaantiim ní a-pɔ́ɔǹtam kaa ŋūǹ kí tūtuǹ-si.

20 Taa nín kā ki cɔ́tí yii kunyeeu kun

bi làá kpìkitī atimbun kí fée ń mɔ́.

21 Á nīn nyíǹ a-ba kí taa fàtī a-ba kí túĺ ikpiti,

di sá yii an pu ní a bí nnaabu nee poon.

Unimbɔti ŋáań min u lèe ní

22 Tiŋman, Unimbɔti sá ukpaan ní ki cáá mpɔn.

Udakal ulɔu di ŋūǹ kí dàkà kí jītíǹ-u?

23 Ŋma di ŋúń ki tùkū-u tin u máaǹ kí ŋée?

Ŋma di ŋúń ki tùkū-u dalba yii: «A ŋá tin kaa kítèe»?

24 Binib pée gà ilan ní ki nyɔ́ŋkí-u.

Si mun téetí kí nyɔ̄ŋkì-u u-tuuŋŋi pu.

25 Báà ŋma ŋūǹ kí wāl̀ tin Unimbɔti ŋée,

bi kāntí-tì ndan ní.

26 Di sá yii Unimbɔti sá ukpaan ní taa ŋūǹ kí gbìl̄ taapu,

taa ŋūǹ kí kàaǹ u-biŋŋi.

27 U dátí nnyim ki cāabìń u-cee,

ní kí dūú kpántí ntaanyim.

28 Nnyim gbanti ní atagban cáa yàantí

ní mì jòotī kitiŋ nib pu.

29 Ŋma di ŋūǹ kí gbìl̄ atagban nín còom̄ puee taapu?

Kí gbìl̄ ditaadundi nín fátí pu kutagbɔŋunee taapu?

30 Úǹ di yàntī utaa ŋmóò ki ŋmíntí ki pùntī kutagbɔŋu,

ama ní ki cáá dibɔmbɔndi ki bìintí tiŋku taapu.

31 Atagban gbanti ní u cáa sòoǹ binib bɔti

ní ki tìì-bi tijin tikpil.

32 U dū ntaaŋmɔŋmɔ ki bál̀ u-ŋaan

ní ki tìì-ŋi mara ŋí yā laakin u dàkà-ŋee.

33 Ditaadundi di dàkà yii utaa làá nì kubuŋkpaaŋŋu dòoń,

ki kpáaǹ tiwaŋkuti