Yoob 35

Yoob kaa cáá tibɔmɔntiil tiba kí sòoǹ

1 Eeliiwuu nìkī ki lī yii:

2 Yoob, mimmee a dàkafī yii an kítì á lì yii:

«Unimbɔti, m bí deedeeee?»

3 Di sá a bàlifī-u yii: «M-kpitii kaa ká-si,

m nín kaa bíi ŋáań ikpitee, m páatì ba?»

4 Man m-ba di làá kíí-si,

ní kí kíí kí kpáaǹ a-bɔɔbi mun!

5 Wáaǹ kí kpèè kutaa,

kpèè atagban nín bí a-yilpu puee!

6 A yaa bíi ŋáań ikpitee, an ŋáań Unimbɔti tibaaa?

A yaa jáń nì u ki kūbitì ki jáń nì u, an ŋáań-u ba? Báà tiba!

7 A yaa ti bí deedee, ba ní an kútí-u?

Ba paatii ní u kāntí poon?

8 A-nijutiibi di làá jī a-kpitii pu falaa,

a yaa tí bíi ŋáań tiŋanaaa, binib ní án làá kèetī^a.

9 Binib bin bi wɔ́b́ an tin nyāŋkèe bí ki yáliŋkí,

bi yáliŋkí ki nyàab̀ ubɔ ń dāá fīī-bi kí nyāntí upɔɔl ŋaan.

10 Ama bi-kansikin ubɔ kaa bàlifī yii: «Unimbɔti un náań-mee bí la?

Úǹ un yàntī binib gà ilan kunyataasiiu,

11 ki dì ipeel pu ki dàkà-ti,

nì inoon pu ki yàntī ti kāntí dinyilee?»

12 Binib gbáà ibiil an kɔkɔ pu

ki nyàab̀ bí fīī-bi kí nyāntí binikpitib

bin yòontí bi-ba yilpuee ŋaan,

ama Unimbɔti kaa kíí-bi.

13 Bi gbáà ibiil fám, ama Unimbɔti kaa pílifiǹ-bi,

Unimbɔti Mpɔŋkɔdaan kaa fātìi tɔ́ gba.

14 An yaa sá mimmee, Yoob,

kin mana ní Unimbɔti làá pīlifiǹ-si

ŋyunti ŋun ní a lì yii: «Maa wāĺ-u,

u nyí man bɔti, m làá nīn pée kā ní ki cí-u.»

15 Tiŋman Unimbɔti kaa bíi dàkà u-ŋuul,

an bí kii u-tafal kpá binib nín yíkì ki jáà nì u pu puee ní.

16 Di sá yii tin Yoob sòoǹee sá kii kubuŋuee ní,

u sòoǹ tikpil ama ní kaa nyí tin u sòoǹee.