Yoob 40

An sá Yoob nín kíí

1 Ti-Dindaan yíiń Yoob ní ki bālifì-u yii^a:

2 Sii un di jáà nì Unimbɔti Mpɔŋkɔdaanee,

a làá gíti kpákáǹ-uaaa?

Sii un di tìì Unimbɔti isaŋkee, a làá ŋmā kí kíí-uaaa?

3 Niinee ní Yoob kíí ti-Dindaan yii:

4 Maa pée bí tiban. Tilati ní m cáá kí kíí-si ní?

M dū m-ŋal ki bīiǹ m-nyɔkɔ pu.

5 M bàà sòon̄, ama maa ti làá sòoǹ.

M sòon̄ tikpil, kɔŋkɔnnee maa ti làá sòoǹ.

Yoob kalin ŋèeǹ nì Unimbɔti níii?

6 Ti-Dindaan kíí Yoob kubuŋkpaaŋŋun yii^b:

7 Bɔ́ntí a-ba! Nín̄ sá uninja!

M làá bàlifì-si tibɔti ní á kíí-mi.

8 A là kí lì yii maa sá deedeedaan deeyaa!

A là kí kpɔ̀ m-bɔti kí pɔ̀ a-baaa?

9 A cáá mpɔn kii mama Unimbɔteeee?

A-nyɔkɔ cá ndan kii ditaadundeeee?

10 An yaa sá mimmee, dū tinyool nì tikpaandi kí nyɔ̀kɔntì a-ba,

dū kunyaaŋŋu nì jilma kí pèen̄^c!

11 Yàntī a-ŋuul ń pōō,

kpèè bilambidambi dibaba kí sìntīǹ-bi taapu.

12 Pée kpèè-bi dibaba ja kí nyīī bi-kɔkɔ kí gùl̄!

Nà bikpitib dibool pu niin dúsi dusi.

13 Dū-bi kí síb́ ntamin dicilpu,

dū-bi kí pìin̄ ŋkúm sarka diikun.

14 Niinee ma mun làá gāā ilan kí nyɔ̄ŋkì-si,

di sá yii a bàà pɔ́ɔǹ ki jáń ki jíń!

Unaapuyiin bɔti

15 Kpèè unaapuyiin, kupeebiliŋŋu.

Man di náań-u kii m nín náań si mun puee.

U ŋmóò timool kii unaayee ní.

16 Ama kpèè u-caŋ pu pɔŋŋu,

kpèè mpɔn ŋun bí u-pool pu nambiliŋ puee!

17 U-juul pɔ̄ɔ̄ kii Seedir dɔŋuee,

u-tapaŋŋi cáá igiin in dàfèe.

18 U-kpabiŋ pɔ̄ɔ̄ kii tasa kútee,

u-takakal kpabiŋ náań nì tikúti piiŋyi ní.

19 Tin kɔkɔ m náańee poonee, úǹ di līī.

Man u-náanliu baba di ŋūǹ kí pɔ̄ɔkiǹ-u.

20 Ajoon di tìì-u timool u ŋmóò,

ní ipeel māntìi tú-u ki gbíiĺ.

21 Ama isufi taapu ní u dɔ̀,

kupuun, tikati kansikin ní u bāal̀.

22 Isufi cáá i-booŋŋu ki bìintí u-pu,

peepiliiyee sufii in bí mbun caŋinee māntìi tú-u.

23 Báà nnyinjil yaa pɔ̄ɔ̄yaaa, an kaa ká-u,

báà gba nnyim yaa jɔ́m̀ ki tin bàn̄ u-nyɔkɔnaaa,

an kaa sòoǹ nì u tiba.

24 Ŋyunti ŋun u yaa wāĺee, ŋma di ŋūǹ kí cúú-u?

Ŋma di ŋūǹ kí sàl̄-u kí sāā kí cíĺ u-maŋfal?

Leefiyatan kupeebiliŋŋu

25 A ŋūǹ kí dū njɔmpiin kí cúú Leefiyatan kupeebiliŋŋuaaa^d?

A ŋūǹ kí dū ŋŋmii kí bóob́ Leefiyatan nyɔkɔ kí táb́aaa?

26 A ŋūǹ kí dū kukaluu kí bɔ̄ u-maŋfalinaaa?

A ŋūǹ kí dū mpiin kí sāā kí cíĺ unyɔɔkpaweenaaa?

27 A dàkafī yii u làá gbàam̀-si kí yúntáaa?

U làá sòoǹ nì si anyɔɔbummɔɔnaaa?

28 U nì si làá ŋá mpèé

ú kpántí a-yumbuu talkuɔɔɔ?

29 A làá gbīiliǹ-u kii unooneeee?

Àá a làá cúú-u kí gbìn̄ a-binimpubiyaamu ń nīn cáa gbíiĺ?

30 Bijɔncuuliibi làá kpāfì kinyɔkɔ kí dū-u kí nyāfàaa?

Binyafiliibi làá càkà-u kí nyāfàaa?

31 A ŋūǹ kí dū mpiin kí sāā kí cíĺ u-gbaŋŋu,

àá kí dū kikpaŋ kí sāā kí pùutī u-yilaaa?

32 Dū a-ŋal kí páań u-pu:

a yaa téetì dimool din ni làá mɔ̀ee puee,

a pée gíti kpá kí ŋá míǹ jaanjaan!