Yoob 41

1 Kpèè, u-nimbiinee unil mákal ŋáań fám ní,

unil yaa pée wál̀-uee, u-wunti kúù ní^a.

2 Ubɔ kaa wáatì kí táká-u tibɔti.

Too, ŋma di sá-u kí jáǹ-mi?^b

3 Ŋma di pīnnì-mi tiba ní an sá ḿ téeǹ udaan?

Tin kɔkɔ bí kitiŋ puee, man di yì!

4 M làá sòoǹ kɔŋkɔnnee Leefiyatan taaŋi pu,

ní kí sòoǹ u-pɔŋkpaaŋŋu nì u-nyaaŋku pu.

5 Ŋma di ŋūǹ kí cúú u-wampeeŋkaati kí cátí nyɔkɔpu pú?

Ŋma di ŋūǹ kí sāā kí pùutī u-gbampɔɔl?

6 Ŋma di ŋúń ki cúú u-nyɔkɔ ki tábitì?

Unil yaa pée wál̀ u-nyiŋŋee, dinyoondi cútí-u ní.

7 Agbampɔɔ ikuul kupaau di bīī u-boon

ki síkí ki cúú tɔb tiŋan.

8 Ipɔkɔ pìl̄ tɔb ní ki síkí síkí

áli gba kubuŋu kaa ŋūǹ kí jītí i-kansikin.

9 Mpɔkɔ kamaa dàb̄ ŋun dī-ŋuee

ní i cúú tɔb an píkí, tiba kaa ŋūǹ kí yàkatī-i.

10 Leefiyatan yaa cíiǹee, ŋwalifi nyēē ní,

ní u-nimbiin jìl̀ kii ntaafaawìińee.

11 Aŋmilimbil nyēē u-nyɔkɔn

ní ki ŋmóò an kɔkɔ pu làka laka.

12 Nnyiim nyēē u-maŋfataabuŋyin,

a lì kii daansee un tɔ́kɔ́ ŋŋmi puee,

àá ikuŋkum in fōō ŋŋmi ki dùkùee.

13 U yaa fōotèe, akoon fòol̄ ŋŋmi

ní aŋmilimbil nyēē u-nyɔkɔn.

14 Mpɔn ŋubɔ bí u-sil pu,

u-nimbiinee, see tifaandi ń cúú-si.

15 Áli gba u-wunti pu laakin bí màlmalee

pɔ̄ɔ̄ ki jítiǹ tikúti pu gba.

16 U-pɔbil pɔ̄ɔ̄ ní kaŋkaŋ kii ditaŋkpalee,

di pɔ̄ɔ̄ ní kaŋkaŋ kii kunaauee.

17 U yaa yíkìi síl̀ee, inimbɔti fàŋkí,

ní i-wunti ń kpú ní í sāǹ.

18 Báà kpaca yaa gāā-uaaa, an kaa kóò,

míǹ mbaantiim ní kikpaŋ nì kitàataajiki

nì ipiin kaa ŋáań-u tiba.

19 Úǹ ceeyee, kukúluu bí kii timɔkulindee ní,

ní tasa kúti bí kii ndɔ ŋun bùkūee.

20 Mpiin kaa ŋūǹ kí yàntī ú sāǹ,

ní kujaataafuŋ taŋkpal bí kii timɔkulindee.

21 Ditambɔndi sá u-cee kii ŋkpaŋkpaanee ní,

kikpaŋ wooku mɔ̄ úǹ cee tilaal ní.

22 Ataŋkpee ŋin nyɔkɔ cɔ́m̀ee di bīī u-pool pu,

u yaa cōom̀ ki jítì tikpati puee, a lì kii dikool ní bi dūu kùn̄ee.

23 U yaa kɔ́ nnyiminee, mi nùuǹ kii bi tɔ́kɔǹ-mì ŋŋmi puee ní,

dimɔɔl kpántì kii kikumbɔbiki kin bi cáa tɔ̄kɔntí ŋkpamee ní.

24 U yaa jítèe, u yàntī ŋwalifi sàmbiki u-boon,

a lì kii tiyikpipin ní bi bóob́ an dēē nnyim min nyóòyee yilpuee.

25 Waa cáá juti kitiŋ pu,

m náań-u ú taa nín̄ pée fàŋkí tiba ní.

26 U kpèé ki sìŋkīǹ u-nannanliibi bin sá bikpaambee,

úǹ di sá ipeecuncuti kɔkɔ bɔtiu.