Ilan 5

Ti-Dindaan, wúń m-pu

1 Daafiidi di ŋmàn̄ nlan nee ki tīī bilaŋgaaliibi kpiliu. Bi gà-ŋu ki búǹ awul ní.

2 M-Dindaan, pīlifì tin m bíi sòoǹ nì see,

kpèè m-yaliŋkii.

3 M-Nimbɔtiu un sá m-bɔtiuee,

m yaa kūuntí ki yíì-see, á pīlifiǹ-mi.

M-Dindaan, sii ní m mèé.

4 Ti-Dindaan, kutaafaauee, a gbìl̀ m-neen pu.

M kítí m-ba á ŋmā kí fōō-mi,

ní m kíǹ ki kā ki cí.

5 Di sá yii a sá Unimbɔti un ná ikpitee ní,

ukpitiŋal kaa kóò a-pu.

6 Bilambidambi kaa ŋūǹ kí sútí kí pìl̄-si,

a ná bin kɔkɔ ŋáań digaŋgam tuuŋŋee ní.

7 Ti-Dindaan, a nàantí binyimɔndambi,

ní kaa gèetíǹ binikpɔliibi nì biŋmatinliibi.

8 Ama a-neendi din a cáá m-puee wīikí tikpil,

an pu ní m ŋūǹ kí kɔ́ a-diikun.

M ŋūǹ kí gbàan̄ nì dibasintil poon

a-circir kɔŋkooŋŋu nyɔkɔpu kí jāam̀-si.

9 Ti-Dindaan, a-deedeeu puee, nín̄ kpòotī-mi,

kun puee m cáá binannanliibi tikpil.

Tàntī a-saŋŋu kí bíĺ m-nimbiin.

10 Ibaamɔn kaa nyēē m-nannanliibi nyɔmmun báà fiii,

tin pée kā bi-pɔbiliŋ poon bi dàkafēe di sá bí bīil̀ bi-jutiibi.

Tibɔti tin bí bi-neenee cáǹ binib dikaakulin,

ní bi-nyunculiŋ nín tábití ki sòoǹ tiŋyee sá diŋmatindi^a.

11 Unimbɔti, sòoǹ kí kpɔ̀ bi-bɔti kí dáaĺ bi-tafal!

Yàntī bíǹ bi-ba nín bɔ́ntì puee ń nàan̄-bi!

Jà-bi kí nyāntí a-nimbiin bi-kpitii pu,

kun puee bi jáà nì si.

12 Ama bin kɔkɔ sáǹ ki kɔ́-see làá nīn fàal̀,

bi làá nīn pée gà ilan nì dipɔɔpindi ní.

A làá nīn cí bin néeń-see ní bí nīn bí mmɔnni a-pu.

13 Di sá yii sii ti-Dindaan di bìintí deedeedambi pu,

ní u-ŋanti māntìi tú-bi kii digbampɔɔlee.