Ilan 6

Ti-Dindaan, taa sòoǹ kí kpɔ̀ m-bɔti

1 Daafiidi di ŋmàn̄ nlan nee ki tīī bilaŋgaaliibi kpiliu. Bi gà-ŋu ki bɔ̀ɔ́ tibati tin cáá iŋmii iniiyee ní.

2 Ti-Dindaan, a gíí m-pu diŋuul,

ama á taa sòoǹ kí kpɔ̀ m-bɔti,

a fōō m-pu mbum, ama á taa dáaĺ m-tafal^a.

3 M-Dindaan, sɔ̄ m-saai, di sá yii maa ti cáá mpɔn.

Cáaǹ-mi m-Dindaan, di sá yii m yɔ̀l̄.

4 M-wunti kɔkɔ bíi jìkì.

Mimmee m-Dindaan,

kí cáá sāā ŋyunti ŋulɔŋu ní?

5 Gítiń kí fīī-mi kí líí, m-Dindaan.

A-neeŋkpaandi puee, fīī-mi.

6 Di sá yii ditaŋkpiilinee, ubɔ kaa ti téetí sii Unimbɔti pu.

Ŋma di ŋūǹ kí nyɔ̄ŋkì-si niin? Báà ubɔ!

7 M yáliŋkì ki tin kpáàa gīī.

M-siim yàntī kunyeeu kamaa m-dooŋu sù,

m-nyinnyim sɔ̀ŋkī m-yikuŋkul.

8 Maa ti wāĺ tiŋan,

m-nannanliibi nín yāntì m súń puee ŋmɔ́ ki bíil̀ m-nimbiliŋ.

9 Sútímaan kí wàatī-mi, nimbi bikpitiŋaliibee kɔkɔ,

di sá yii ti-Dindaan gbìl̀ m-siim^b.

10 Ti-Dindaan pílifì m-gbaamii,

ti-Dindaan fōō m-wimmeem.

11 Icoo làá cúú m-nannanliibi kɔkɔ

ní tifaandi ń gbí bi-pɔbiliŋ.

Kii dinimbil nín kábití puee,

míǹ ní bi làá sāǹ kí wàatī-mi nì icoo!