Ilan 13

Unimbɔti, á taa súntí m-pu

1 Daafiidi di ŋmàn̄ nlan nee ki tīī bilaŋgaaliibi kpiliu.

2 Ti-Dindaan, a làá súntí m-pu

kí cáá sāā ŋyunti ŋulɔŋu ní?

Kí nīn pée cáa cá jaanjaanaaa?

A làá fàtī a-kpaŋkpamboon kí tīī-mi

kí cáá sāā ŋyunti ŋulɔŋu ní?

3 M làá nīn bí dipɔɔbiildin,

kunimbaau ń nīn gbí m-pɔbilin kutaa kamaa yéè

kí cáá sāā ŋyunti ŋulɔŋu ní?

Bin ná-mee làá nīn jáà ki pɔ́ɔkíǹ-mi yéè kí cáá sāā ŋyunti ŋulɔŋu?

4 Ti-Dindaan, m-Nimbɔtiu,

kpèè kí fōō m-wimmeem.

Tīī-mi mpɔn, an yaa kaa sá míǹ m làá gèeǹ kí taa ti fìntī.

5 Taa yàntī bin ná-mee ń lì yii: «Ti ŋúń-u.»

Taa yàntī ḿ lítí bin ná-mee ń ŋmā kí nīn fàal̀.

6 M làá nīn máká a-neendi din kaa sátée pu.

M-pɔbil làá nīn bí mmɔnni a-fiil pu.

M làá gāā ilan kí nyɔ̄ŋkì sii m-Dindaan

tiŋan tin a ŋá ki tīī-mee pu.