Atuŋkpiti ŋin binib ŋáańee
(Kpèè Ilan 53)
14
1 Daafiidi di ŋmàn̄ nlan nee ki tīī bilaŋgaaliibi kpiliu.Ugbaan di lì u-ban yii:
«Unimbɔti ubɔ kaa bía!»
Baa pée nyí tiba ní ki ŋáań ntimbiil tuuŋŋi,
ubɔ kaa pée bí ki ŋáań tin kítèe.
2 Doooo yilpu ní Unimbɔti gbóoń ki kpēē binib
kí kpèè ubɔ yaa bí ki cáá iciin ki nyàab̀ Unimbɔti.
3 Bi-kɔkɔ wáŋkì, ugàntil kpá ki ŋáań tin kítèe,
baa ubɔ kaa bí ki ŋáań tin ŋān̄ee,
baa uniseen, an kpáb.
4 «Bikpitiŋaliibi nee kɔkɔ kaa kalin nyí níii?
Bi mùul̄ m-nibul ki jīǹ,
ní kaa pée jáaḿ-mi jaanjaan.»
5 Unimbɔti làá kɔ́ǹ-bi dinyoondin,
di sá yii u bí u-nib bin yú nì u deedeeyee cee.
6 «Ni gbáà ki kpìtī unandaan mákal,
ama ti-Dindaan wúń u-pu.»
7 Ŋma làá nyānní doooo Siiyɔn kí fīī Isirayeel ní?
Unimbɔti yaa láa fātìi gíiǹní u-nib bin bi nìn cúú kuyuŋuee,
Jaakɔb naantiibi làá dāá nīn fàal̀,
Isirayeel yab làá dāá nīn bí mmɔnni.