Ilan 17

Pīlifiǹ-mi, m-Dindaan, m bíi mèé-si á pɔ̀-mi ní

1 Daafiidi wimmeem.

Pīlifiǹ-mi, m-Dindaan, m bíi mèé-si á pɔ̀-mi ní.

Kpòon̄ a-tafal kí pīlifì m-wimmeem

min nyánní dipɔɔmɔntiilinee.

2 Sòoǹ m-bɔti kí pɔ̀-mi,

a nyí ibaamɔn laŋki.

3 A kpēē m-pɔbil poon,

ki dɔ́miń m-cee kunyeeu ki cɔ́ŋkì-mi,

kaa ká tikpitil tiba m-ni.

M lēē m-pɔbilin yii maa làá dū

m-nyɔkɔ kí sòoǹ kí ŋá ikpiti,

4 kii bin kíǹee nín ŋáań puee.

M tɔ́ a-marab kaa dī bin ŋáań tipɔmbɔtee saŋŋu.

5 M pée tàkā nsan ŋun a cátèe poon ní,

m-taal kaa ŋātì ki nyáń ŋu-poon.

6 Unimbɔti, sii ní m kūuntí ki yíì,

di sá yii a làá kíí-mi,

kpòon̄ a-tafal kí pīlifì tin m làá sòoǹee.

7 Dàkà a-nib dineeŋkpaandi din a cáá bi-puee,

sii un fìil̄ bin kɔkɔwoooo sáń bi-nannanliibi ki kóò-see.

8 Ŋúb́-mi kii sii a-ba nimbibulee,

dū-mi kí báĺ a-feeŋyi taapu^a

9 binikpitib bin là kí nàan̄-mee nì m-nannanliibi

bin māntìi tú-mi ki là kí kpɔ̀-mee ń taa ká-mi.

10 Bi cáá nnimbinaakulim kaa sūǹ isaa,

ní ki cáá bi-nyɔmmu ki sòoǹ tilambibɔti.

11 Bi tà ki kíbití-mi, bi kpáàa māntìi tú-mi.

Bi pée cɔ́ŋkí-mi ki nyàab̀ ŋyuntimɔnti kí kùl̄-mi kí yā kitiŋ ní.

12 Bi bí kii digbikintipɔmbil din bɔ́ntì ki cí kí cúú upeel kí tɔ̀ntēe ní,

a lì kii upeecuncuti un náká ki cée.

13 Yīkìm̄, m-Dindaan! Já kí pɔ̄ɔkiǹ bin ná-mee.

Dū a-janjajiki kí fīī-mi kí nyāntí binikpitib ŋaan.

14 Ti-Dindaan, dū a-ŋal pɔŋŋu kí jà-bi kí nyāntí binib kansikin.

Jà-bi kí nyāntí binib kansikin nì duulinyan.

Dū ditafadaaldi din a bɔ́ntì ki síiǹ-bee kí nyùntī-bi,

bi-biyaamu mun ń nyɔ̀ kí díkí

kí kíń kí tīī mu mun biyaamu.

15 Ama man jandi púee, m làá nīn bí a-nimbiin

kun puee maa cáá dibɔkpil diba m-ni.

M yaa láa fīntèe, m-pɔbil làá sɔ̀ŋkì

kun puee m bí laakin a bée.