Tí nyɔ̄ŋkì Unimbɔti
(B. 14-18. kpèè 70.2-6)
40
1 Daafiidi di ŋmàn̄ nlan nee ki tīī bilaŋgaaliibi kpiliu.2 M dū m-mákal kɔkɔ ki páaǹ ti-Dindaan pu,
ní u tīntìń ki pílifì m-biilii.
3 U dáaĺ-mi ki nyántì ŋkúm booŋŋun,
u dáaĺ-mi ki nyántì tikpati tin nyóòyee poon.
U yáatì-mi ki tɔ́kɔǹ ditaŋkpal pu,
m yaa còom̄ee maa ti fàŋkí.
4 U dū nlampɔɔn ki ŋá m-nyɔkɔn
ḿ gāā kí nyɔ̄ŋkì úǹ ti-Nimbɔtiu.
Binib tikpil làá ká ní kí fàŋkì,
ní kí nīn kíǹ ki máká ti-Dindaan pu.
5 Unil un máká ti-Dindaan pu,
kaa fàtī bilambidambi
binyimɔndambee puee bí mmɔnneeee!
6 Ti-Dindaan m-Nimbɔtiu, a-maamaaci tuuŋŋi
ŋin a ŋá ki tīī-mee wīikéeee! Aa cáá juti.
A bɔ́ntì tiwan tikpil kí tīī-ti.
Maa làá ŋmā kí sòoǹ tin kɔkɔ a ŋée,
kun puee tì wīikí tikpil.
7 An kaa sá kuwaŋkuluu saraau
àá tijimpin saraau ní a làa,
kaa tí sá saraawɔkaa àá ikpiti pɔ̄tam saraau ní a bàlifī.
Ama a tīī-mi atafal ḿ pīlifiǹ-si.
8 An pu ní m bí yii: «M sèé, m dòoń a-cee.
Kugbɔŋu poonee bi ŋmàn̄ tin m máaǹ kí ŋée.»
9 M-Nimbɔtiu, an mɔ̄ǹ-mi ḿ ŋá min fáatiǹ-see,
m kpáafí a-marab m-pɔbilin.
10 Samaa kpafikpaandi poonee, m sòon̄ a-deedeeu pu.
Kpèè maa ŋūǹ kí ŋmèè kí taa sòoǹ,
ti-Dindaan, sii a-ba nyí míǹ.
11 Maa dū a-deedeeu ki bál̀ m-pɔbilin,
m sòon̄ a-baamɔŋyi nì a-fiil pu.
Maa dū a-neeŋkpaandi nì a-baamɔŋyi ki bál̀
samaa kpafikpaandi poon.
12 M-Dindaan, á taa kàkatī a-poommɔŋŋu kí wàatī-mi,
yàntī a-neeŋkpaandi nì a-baamɔŋyi ń nīn pée wúń m-pu.
*
13 Agìń tikpil lúuń-mi ajan kɔkɔ pu,
m-kpitii māntìi gíb́-mi ní maa ti wāĺ.
I wīikí ki jítiǹ m-yikpiti, ní m-wunti yɔ̄tì.
14 Ti-Dindaan, m gbàam̄-si, fīī-mi!
Ti-Dindaan, dāá jòoń-mi malaa.
15 Bin nyàab̀ kí lēē m-maŋfalee,
kɔ́ǹ bi-kɔkɔ icoo dicilpu!
Bin m yaa bí agìń poon an mɔ̄ǹ-bee,
yàntī bí sāǹ kí fá bi-nyooti!
16 Nàan̄ bin bèel̄-mi ki lāāyee,
bi-cooi ń nīn dī-bi!
17 Ama yàntī bin kɔkɔ nyàab̀-see
ń nīn bí mmɔnni ki fàal̀.
Yàntī bin néeń sii, ufiilee ń nīn pée lì yii:
«Ti-Dindaan sá ukpaaneeee!»
18 Mamee, m sá ufalaadaan nì unandaan ní.
Ti-Dindaan, taa súntí m-pu.
Sii di sá m-jòońliu nì m-fiiliu,
m-Nimbɔtiu, taa tàan̄.