Ilan 39

Unil maŋfal wiiŋyi kaa náaǹ

1 Daafiidi di ŋmàn̄ nlan nee ki tīī bilaŋgaaliibi kpiliu Jeedutun.

2 M nìn lī yii: «M làá nīn nyíǹ m-ba m-bimbim poon

kí taa sòoǹ tiba kí ŋá ikpiti.

M làá táb́ m-nyɔkɔ kí taa lì tiba

ŋyunti ŋun ní binikpitib bí ki kɔ́ĺ-mee.»

3 M táb́ m-nyɔkɔ ní ki ŋmí,

m yíì kaa pée sòon̄ tiba.

Ama ní m-wàlifii mɔ̀tīi kútí,

4 ní m-pɔbil píĺ kpaŋkpam m-poon.

An gíti lákatì ki kíǹ ki sèetī-mi kii ŋŋmee

ní m dāa wāaǹ m-nyɔkɔ ki sòon̄.

5 Ti-Dindaan, yàntī ḿ béé m-maŋfal wiiŋyi nín làá kúntí puee,

yàntī ḿ béé iwiin in kíǹ-mi ḿ dūú kàl̄ kitiŋ nee puee,

kí yàntī ḿ béé m-maŋfal wiiŋyi nín kaa pée náaǹ puee.

6 Kpèè, iwiin in a tīī-mi ḿ dūú kàl̄ kitiŋ puee

bí kii diŋaantil waaŋŋuee ní.

M-maŋfal wiiŋyi kaa pée sá a-cee tiba.

Tiŋman, unifoo kamaa bí kii kubuŋuee ní.

7 Tiŋman, unil cá ní ki gítiń kii kujiliŋuee!

U nín pée bìǹ ki nyàab̀ tin kɔkɔee sá kubuŋu ní.

U nyàab̀ tigaajati ki kpūkuntí,

ama waa nyí un làá dāá jī-tèe.

8 Mimmee, m-Dindaan, ba ní ḿ nīn gíti kā ki cí?

M máká sii pu ní.

9 Fīī-mi kí nyāntí m-kpitii kɔkɔn,

taa yàntī bigbaambi ń lā-mi.

10 M táb́ m-nyɔkɔ, maa ti làá wàan̄-kì,

di sá yii sii di yāntì m bí falaa nee poon^a.

11 Gbèen̄ kí taa ti fáá-mi,

a-ŋaŋkuliŋ làá yàntī ḿ kpú dee.

12 A wòoǹ unil ní ki dátí u-tafal u-kpitii pu.

Kii dikoosibil nín ŋmóò disubil puee,

míǹ ní a bíiĺ tin udaan néeńee.

Tiŋman, unil sá ba, an yaa kaa sá kubuŋu.

13 Ti-Dindaan, pīlifì m-wimmeem nì m-biilii,

kpòon̄ a-tafal kí pīlifì m-siim.

Di sá yii m sá unikɔkaa ní a-cee,

m sá unicaan ní kii m-naanjab kɔkɔ nín nìn sá puee.

14 Yàntī ḿ ŋùŋfì fiii kí ká tilaal

kí wàatī ní ḿ búntí kí kpántí un kpá nee.