KUGBƆNLILIITIIU
M-mákal bí Unimbɔtin ní
42
1 Koora dicaŋkun yab di ŋmàn̄ nlan nee ki tīī bilaŋgaaliibi kpiliu.2 Kii upeeman di tíkì ki fèefī ki nyàab̀ mbun nyim puee,
míǹ ní ma mun tíkì ki fèefī ki nyàab̀-si, Unimbɔti.
3 Kii nnyinnyoo nín cútí unil u nyàab̀ nnyim puee,
míǹ ní m nyàab̀ sii dimaŋfal Nimbɔtiu.
Ba dal ní m làá ŋmā kí kɔ́ kunimbɔtidiin,
kí yūĺ Unimbɔti nimbiin ní?
4 M-nyinnyim di kpántì m-jinti ŋwiimpu nì kunyeeu,
di sá yii bi bàlifī-mi kaa gbèentí yii: «A-Nimbɔtiuee baasii bí la ní?»
5 Niinee ní án kɔ́ m-pɔbilin ní ḿ téetí dooooyee pu,
ŋyunti ŋun samaa yaa nìn bí jiŋaal poon,
m līī bi-nyɔkɔpu tí tin kɔ́ kunimbɔtidiin,
ki gà ilan ki nyɔ́ŋkí Unimbɔti nì ifaalee.
6 «Ba pu ní m bí kunimbaaun míǹ?
Ba pu ní m yáliŋkí nì m-ba míǹ?»
M làá nīn máká Unimbɔti pu.
Tiŋman m làá nīn bí ki nyɔ́ŋkí-u,
úǹ di sá m-fiiliu nì m-Nimbɔtiu.
7 M-Nimbɔtiu, m-pɔbil bíil̀,
an pu ní m téetì a-pu
doooo dimɔɔl Jɔɔdan tiŋkin nì
Eermɔn nì Miiseeyaar jooŋŋi yilpu.
8 A yàntī inyiŋfi sìtī ki gà kuwoou,
ní tinyiŋgban tiba cāabìń ti-juti.
Tì nín lítí ki pùub̀ puee,
tì dòoń ki bìintí m-pu.
9 Ŋwiimpuee, ti-Dindaan dàkà-mi u-neeŋkpaandi,
ní kunyeeuee, m gà ilan ki nyɔ́ŋkí-u,
ki mèé Unimbɔti un tìì-mi dimaŋfalee.
10 M tùkū Unimbɔti un sá m-taŋkpanaakookuee yii:
«Ba pu ní a súntì m-pu?
Ba pu ní ḿ nīn bí kunimbaaun m-nannanliibi wɔ́b́-mi?»
11 M-nannanliibi ŋá-mi tiweendi ki tin bàn̄ m-kpabiŋ.
Bi sìí-mi ní ki bàlifī-mi baabadal yii:
«A-Nimbɔtiuee bí la?»
12 «Ba pu ní m bí kunimbaaun míǹ,
ba pu ní m yáliŋkí nì m-ba míǹ?»
M làá nīn máká Unimbɔti pu.
Tiŋman m làá nīn bí ki nyɔ́ŋkí-u,
úǹ di sá m-fiiliu nì m-Nimbɔtiu.