Ilan 45

Ubɔti nimpucanti laŋŋu

1 Koora dicaŋkun yab di ŋmàn̄ nlan nee ki tīī bilaŋgaaliibi kpiliu. Bi bɔ̀ɔ́ kubeeu ní ki gà-ŋu. Dineendi laŋŋu.

2 Anyɔɔbunnyaan di gbí m-pɔbilin.

M làá gāā nlammɔnti kí tīī ubɔti tinyool.

M-nyɔkɔ ń nīn yáb̀ kí gāā nlan

kii ugbaŋŋmal un yáb̀ee ŋmamɔɔŋŋuee.

3 Sii di ŋān̄ ki jítiǹ binib kɔkɔ, a nyí isoon.

An pu ní Unimbɔti bīiǹ a-boon kí nīn cá jaanjaan.

4 Ubaatandaan, yòon̄ a-gbajau kí gbìn̄.

An di sá a-nyooti nì a-kpaanti daaŋku.

5 Jàkà nì kunyaaŋŋu kí mɔ̄tì

ibaamɔn nì dibasintil nì deedee pu.

A-ŋaŋgiil ń dàkà a-tuuŋŋi ŋin sá maamaaci tuuŋŋee.

6 A-piiŋyi cɔ́m̀ tiŋan,

- i sàatī ki kóò sii ubɔti nannanliibi pɔbiliŋ poon.

Atimbun nib làá lítí a-taaŋi taapu.

7 Unimbɔti, a-beel bí ní ki cá jaanjaan.

A jīǹ a-beel nì deedee ní.

8 A néeń tin bí deedeeyee ní ki ná tin kaa ŋān̄ee,

an pu ní Unimbɔti, a-Nimbɔtiu^a lēē-si,

ki sītì a-pu dipɔɔpindi kpam a jítiǹ a-jutiibi kɔkɔ.

9 A-wampeeŋkaati kɔkɔ sɔ́fì miiri

nì disaaweendi nì kasiya talaalub ní,

ní a-bɔtinaakooku kun bi dū

kunti nyiŋŋi ki nákáǹ nákáǹee poonee,

bi bɔ̀ɔ́ tibati ki gà ilan in tìì-si dipɔɔpindee.

10 Ubɔti sapɔmbi bí ki ŋúb́ a-wanleeŋkaati,

ní ubɔti nimpuu yú a-ŋaŋgiil pú

ki lá sindaariyamɔnti wanléeŋkaati.

11 Pīlifì m-bisal, kpèè kí kpòon̄ a-tafal kí pīlifì.

Súntí a-nibooliŋu nì a-baa dicaŋku yab pu.

12 Yàntī a-nyaaŋku ń fáatíǹ ubɔti!

Úǹ di kíǹ ki sá a-dindaan,

gbàan̄ u-nimbiin.

13 Tiir yab bin sá bigaajakpaambee

làá dāá pɔ̄-si tiwan á nīn kíǹ ki là-bi.

14 Ubɔti bɔɔn di kóòń nì tinyookpaandee,

sindaariya ní bi dūu nyūntì u-bɔkutil.

15 Dibɔkutil din u pēēyee cáá inyiŋfi kutuku pu,

ní bi cáǹ-u ubɔti cee.

Bisapɔmbi bin pá u-boon ki tútúǹ-uee

mun kɔ́nní a-cee.

16 Nì mmɔn nì ifaal ní bi kɔ̄ntí-bi

ubɔti naakooku poon.

17 Ubɔti, a-jipɔmbi làá dāá fōō a-naanjab yil kí kàl̄ dibeel,

a làá dāá yàntī bí kpántí kitiŋ kɔkɔ pu abɔtibil.

18 M làá yàntī bí nīn téetí a-yindi pu abin abin.

Niinee báà ŋma làá nīn nyɔ́ŋkí-si kí taa gbèen̄.