Ilan 46

Ti-Dindaan bí ti-cee

1 Koora dicaŋkun yab laŋgaakpiliu laŋŋu, bi gà-ŋu nì kineejaka ní.

2 Unimbɔti di sá timbi balilaŋki nì ti-pɔŋŋu,

dinimbinaamandi yuntiŋuee, u pée bí ní kí jòoń-ti.

3 An pu ní taa fàŋkí tiba,

báà kitiŋ yaa bíi cìŋkāaa,

ajoon yaa bíi kpìkitī ki lítí tiŋkunaaa,

4 tiŋku nyiŋgbanti yaa yāŋkí tɔb ki ŋáań kuwoou

ajoon cìŋkī.

5 Mbun ŋubɔ bí ki cāabìń dipɔɔpindi Unimbɔti tiŋkin,

laakin sá Yilpu Fɔ́ŋŋŋ Nimbɔtiu circir kɔŋkooŋŋu páaayee.

6 Unimbɔti bí kitiŋ gbantin, tiba kpá kí ŋá-kì,

kutaa tin pée lì yii ku wúntée,

Unimbɔti bí kí jòoń-kì.

7 Atimbun kɔ́ fìkil fikil poon, abee cīŋkì,

Unimbɔti téeń ní kitiŋ dūntì.

8 Unimbɔti Mpɔŋkɔdaan bí ti-cee,

Jaakɔb Nimbɔtiu di sá timbi balilaŋki.

9 Dāá kpèèmaan tin ti-Dindaan ŋée,

maamaaci tuuŋŋi ŋin ní u ŋá kitiŋ puee.

10 U yàntī tijáti gbèentí duulinya kɔkɔn,

u kɔ́fí itɔfi, ki nyìitī ki gífí ŋkpamu,

ní ki tùutī agbampɔɔ ŋŋmi.

11 Ti-Dindaan téeń yii: «Gbèem̄maan kujaauee!

Béémaan yii man di sá Unimbɔti!

Man di jīǹ atimbun pu dibeel,

man di jīǹ kitiŋ kɔkɔ pu dibeel.»

12 Unimbɔti Mpɔŋkɔdaan bí ti-cee,

Jaakɔb Nimbɔtiu di sá timbi balilaŋki.