Ilan 49

Unil yaa kpíì, waa kpāantí tiba

1 Koora dicaŋkun yab di gāā nlan nee ki tīī bilaŋgaaliibi kpiliu.

2 Anibul kɔkɔ ń pīlifì tin bí nee,

duulinya kɔkɔ nib ń kpòon̄ bi-tafaliŋ kí pīlifì,

3 binifantantiibi nì binikpaambi,

bigaajab nì bisoodambi kɔkɔ:

4 m làá sòoǹ iciin nyɔɔbuŋŋi,

tin kā m-pɔbilin m dàkafēe cáá taapu.

5 M kpōoǹ m-tafal ki pílifì dilaŋkpandi,

m làá bɔ̀ɔ̀ m-beeku kí lēē m-pɔɔŋŋu taapu kí dàkà.

6 Ba pu ní ḿ nīn fàŋkí iwiŋkpiti dal,

ŋyunti ŋun m-nannanliibi māntìi tú-mee?

7 Bi máká bi-gaajati pu,

ní ki yòontí bi-ba yilpu bi-gaajati nín wīikí puee pu.

8 Ama báà unil mun kaa ŋūǹ

kí dā Unimbɔti cee u-juti maŋfal,

àá kí pà úǹ u-ba maŋfal pu.

9 Báà unil yaa tīī pu kí dā u-maŋfalee,

dì làá dāá pée kúntí ní kí nīn cá jaanjaan.

10 Unil ŋūǹ kí nīn bí jaanjaan

kí taa kpú dalba dalbaaa?

11 Ti ká ki gíti káa! Biciŋfitiibi kúù,

ní bigbaambi nì biwaatiibi mun kúù,

ní kí búntí kí yàntī bi-gaajati ní biba ń dāá yòon̄.

12 Min kamaa bi dū bi-yiŋŋi ki pú bi-tampaaŋyee,

dikaakul di làá nīn sá bi-dumpui kí nīn cá jaanjaan,

ní bí nīn kóò niin kí nīn cá abin abin.

13 Unil nyooti kaa làá ŋmā kí yàntī ú taa kpú,

u làá pée kpú kii kuwaŋkuluuee ní.

14 Kpèè bin máká bi-ba puee kúntitam dee,

nì bin pá bi-boon ki néeń bi nín sòoǹ puee.

15 Bi téekí-bi ki cáǹ ditaŋkpiilin kii ipiiyee,

ŋkúm di làá nīn kpàá-bi.

- Kutaafaauee, deedeedambi làá nīn tà-bi, -

ní bi-nyaaŋku ń wāŋkì ditaŋkpiilin,

ní bí nīn kíǹ ki dátiǹ bi-dumpui.

16 Ama Unimbɔti làá dā m-naŋki kí nyāntí ditaŋkpiilin,

tiŋman, u làá fīī-mi.

17 Ubɔ yaa kpántì ugaajee, án taa kɔ́-si nnimbitaataam,

báà u-gaajati gbanti yaa mɔ̀tīi wīintí ki cá.

18 Di sá yii u yaa kpíì, waa làá kpáaǹ báà tiba^a

ní u-nyooti kaa làá táá-u kí kɔ́ dikaakulin.

19 Ŋyunti ŋun u nìn dáá bí dimaŋfalinee, u nìn pàkà u-ba ki lì yii:

«Bi nyɔ́ŋkí-si, di sá yii an bútì-si tikɔkɔ poon!»

20 U làá cùú ŋàl̄ u-naanjab ditaŋkpiilin,

bíǹ bin gíti kpá kí ká ŋwalifi dalba dalbee.

21 Unil nì u-nyooti kɔkɔee, u yaa kaa gbìl̀ taapuee,

u làá kpú kii kuwaŋkuluuee ní.