Ilan 50

Unimbɔti páaǹní kí sòoǹ kitiŋ kɔkɔ bɔti

1 Asaafi^a di ŋmàn̄ nlan nee.

Unimbɔti Mpɔŋkɔdaan, ti-Dindaan sòon̄,

u yíiń kitiŋ kɔkɔ tibuul,

kí yòon̄ ŋwìiń nyalaŋki pú kí cáá sāā ŋu-jeetilaŋki.

2 Doooo Siiyɔn, kitinnyaaŋŋi poon

ní Unimbɔti páaǹní ŋwalifi māntìi tú-u.

3 Ti-Nimbɔtiu ń dāan̄

kí taa nín̄ ŋmí!

Ŋŋmi ŋun fòol̄ bìlbilee līī u-nyɔkɔpu,

ní kubuŋkpaaŋŋu māntìi tú-u.

4 Unimbɔti yíiń kutagbɔŋu kun dàn̄ yilpu nee,

nì kitiŋ bí dāá kpèè u nín làá sòoǹ u-niboolii bɔti puee.

5 U bí yii: «Kóom̀maan bin yú nì mi deedeeyee kí kpāfì,

bin ŋá saraa ki pūtì ki pōoǹ dipoondi nì mee!»

6 Kutagbɔŋu sòoǹ Unimbɔti deedeeu pu,

di sá yii Unimbɔti u-ba di sòoǹ binib bɔti!

7 M-nibul pīlifì, m làá sòoǹ,

Isirayeel, m làá sòoǹ kí kpɔ̀ a-bɔti,

man di sá Unimbɔti, a-Nimbɔtiu.

8 M làá wòoǹ-si,

ama an kaa nín sá a-saraabi pu,

di sá yii a pée ŋáań-mi bisaraawɔkaabi ní baabadal.

9 Maa làá lēē unaja a-dumpuɔɔɔ,

kaa làá tí lēē iŋɔjaa a-naabakakun.

10 Di sá yii man di yì kupɔɔun peelii

nì ajoon kutukub kutukub pu peelii.

11 M nyí inoon in kɔkɔ bí ajoon puee,

man di tí yì kumooun peelii kɔkɔ.

12 Ŋkùm yaa bàà cáá-mee, an kaa sá sii ní m làá tùkù,

di sá yii duulinya nì tin kɔkɔ bí u-poonee, man di yì.

13 M ŋmóò inajaa nantaaa,

iŋɔjaa fatikuu ní m nyù ní?

14 Ijaam ń nīn sá saraa un a làá ŋá kí tīī man Unimbɔtee,

ní kí ŋá a nín pōoǹ yii a làá ŋá puee

kí tīī man Yilpu Fɔ́ŋŋŋ Nimbɔtiu.

15 Niinee a yaa kɔ́ dinimbinaamandin ní ki yíiń-mee,

m làá fīī-si ní á nyɔ̄ŋkì-mi.

16 Ama Unimbɔti bíi tùkù unikpiti yii:

«Ba pu ní a sòoǹ ki bùsī m-marab?

Ba pu ní a sòoǹ m-poondi pu?

17 Sii ná m-dàkatam

ní ki féeń m-marab.

18 A yaa ká unaayuuyee ní u-bɔti mɔ̄ǹ-si,

sii nì bilaakpaadambi di kpáfí ki kàal̀.

19 A yāntì a-nyɔkɔ sòoǹ tibɔkpitil,

ní a-limbil sòoǹ tinyimɔmbɔti.

20 A yaa kāl̀ee, a-juti bɔti ŋma ní a sòoǹ,

ní ki cāab̀ a-nabiki kiŋkiŋ disambiil.

21 Kpèè kun ní a ŋáań ki là ḿ nīn ŋmée.

A dàkafī yii m bí kii siiyee níii?

M làá wòoǹ-si ní kí bìitī a-tuŋkpitiŋ kɔkɔ pu kí bíĺ a-nimbiin.»

22 Nimbi bin súntí man Unimbɔti puee,

ní gbìl̄maan tibɔti gbanti taapu!

An yaa kaa sá míǹ, m làá tɔ̀ntī-ni,

ní ubɔ dāa kpá kí fīī-ni.

23 Un cáá ijaam ki ŋáań-mi saraayee, úǹ di tìì-mi tinyool.

Udaan dī nsan ŋun poon m làá yàntī

ú ká man Unimbɔti fiilee dee.