Ilan 52

Taa nín̄ máká a-gaajati pu

1 Daafiidi di ŋmàn̄ nlan nee ki tīī bilaŋgaaliibi kpiliu. 2 Ueedoomja Dooweegi nìn cūtìi tùkū Sayuul yii: «Daafiidi cūtì Ayiimeeleeki cee.»

3 Ubaatandaan, ba pu ní a yòontí a-ba a-kpitii pu míǹ?

Unimbɔti ŋanti bí ní baabadal.

4 A-limbil sòoǹ ki bɔ́ntí min a làá ŋá ikpitee,

dì jītí kii bɔlfi un bi lōoǹee,

ní ki yáb̀ ki sòoǹ tinyimɔmbɔti.

5 A néeń tikpitil ki jítiǹ tiŋan,

ní ki néeń nnyimɔn ki jítiǹ mbaamɔn.

6 A néeń kí sòoǹ kí bīil̀ unil,

a-limbil ŋmàtíǹ binib ŋma ní.

7 Unimbɔti u-ba di làá nàan̄-si múb,

u làá dáaĺ-si kí nyāntí a-diikun,

ní kí lēē-si binifoobi tiŋki pu.

8 Deedeedambi làá dāá ká ní kí fàŋkì,

ní kí dāá nīn lāā ki lì yii:

9 «Kpèè ubaatandaan

un kaa nìn sáǹ ki kɔ́ Unimbɔti,

ama ní ki nìn máká u-gaajati pu,

ki dàkafī yii u pɔ̄ɔ̄yee sèé!»

10 Ama mamee, m bí kii ɔliifi subu

bun túkúee ní Unimbɔti diikun.

Unimbɔti neeŋkpaandi pu ní

m máká kí nīn cá jaanjaan.

11 M làá nīn pée nyɔ́ŋkí-si ní kí taa gbèen̄

kun ní a ŋée pu.

M làá nīn máká a-yindi pu bin yú nì si deedeeyee nimbiin,

di sá yii an ŋān̄ míǹ.

M làá nyɔ̄ŋkì-si deedeedambi nimbiin.