M-Nimbɔtiu, dū m-kpitii kí pɔ̄-mi
51
1 Daafiidi di ŋmàn̄ nlan nee ki tīī bilaŋgaaliibi kpiliu. 2 Daafiidi dōoǹ nì Urii nimpuu Batiseeba ní Unimbɔti bɔnaatiliu Naatan cūtì u-cee ki sòon̄ nì ua. Ŋyunti gbanti ní u gāā nlan nee.3 Unimbɔti, a-neeŋkpaandi puee, á sɔ̄ m-saai.
Sii un poon mɔ̄ tikpilee, pítí m-yìntitam.
4 Fíntí-mi kí nyāntí m-kpitiin ḿ nyā dándan,
ní kí pítí m-yìntitam kí ŋá-mi circir.
5 Di sá yii m nyí m nín yīntiǹ-see,
m-kpitii dɔ̄ m-nimbiin ní baabadal.
6 Sii baba nì a-baba ní m yīntiǹ,
di sá yii m ŋá tin kaa ŋān̄ a-ceeyee.
Míǹ puee báà a yaa sòon̄ m-bɔtaaa, a cáá nsan,
a yaa sòon̄ ki kūū m-bɔtaaa, a cáá mbaamɔnb.
7 Tiŋman, ikpitin ní bi màl̄-mi,
m-na nín cáá m-poolee, m sá unikpiti ní.
8 Tiŋman, min kamaa a dū ibaamɔn ki bál̀ dibɔmbɔndinee,
tibɔbalkaal gbanti poon ní a dàkà-mi iciin.
9 Dū kifaapibiki kin bi yíì isɔpeec kí yàaǹ
m-kpitii pu ḿ nīn bí circir,
fàl̀-mi, ní ḿ nīn kíǹ ki pīiǹ káŋkaŋ.
10 Yàntī ḿ gbìl̄ mmɔn nì dipɔɔpindi m-ni,
ní akpab ŋin a nàn̄ dúsi dusee ń yīkì kí nīn ŋōō.
11 Fàtī a-boon kí tīī m-kpitii,
pítí m-yìntitam kɔkɔ.
12 Unimbɔti, náań dipɔbil din bí circiree kí tīī-mi,
dū ŋfam min pɔ̀ɔǹee kí ŋá m-nid.
13 Taa dū-mi kí fá,
kí taa fàtīí fōō a-circir Fam m-cee.
14 Fàtīí tīī-mi mmɔn ŋun bí a-fiil poonee,
ní nlammɔntiim fam ń nīn tíkí-mi.
15 M làá dàkà bikpitiŋaliibi a-saŋŋu,
ní ikpitidambi ń fàtīí gítiń a-cee.
16 M-Nimbɔtiu, Unimbɔti m-fiiliu, fīī-mi nnikpaakoon bɔkpilin
ní ḿ gāā ilan mpɔn kí sòoǹ a-deedeeu pu.
17 Ti-Dindaan, tábití m-nyunculiŋ
ní ḿ dū m-nyɔkɔ kí gāā ilan kí nyɔ̄ŋkì-si.
18 Di sá yii a yaa là saraabi, m bàà ŋáań kí tīī-si.
Bisaraawɔkaabi gba kaa fáatiǹ-si.
19 Saraa un di fáatiǹ Unimbɔtee
di sá dipɔbil din sīntiǹ di-ba taapuee.
Unimbɔti, aa fàtī a-boon kí tīī dipɔbil din sīntiǹ di-ba kɔkɔee.
20 Án nīn mɔ̄ǹ-si á ŋá Siiyɔn tiŋki tiŋan,
fàtīí mā digundi kí tū Jeerusaleem.
21 Niinee a làá fōō deedee saraabi,
nì bisaraawɔkaabi kɔkɔ.
Ŋyunti gbantee ti làá dū inajaa kí ŋá saraa nsaraafan pu.