Ilan 56

M máká Unimbɔti pu ní kaa fàŋkí tiba

1 Fiiliistii yab nín cúú Daafiidi Gaati tiŋkinee, boon ní u ŋmàn̄ nlan nee ki tīī bilaŋgaaliibi kpiliu. Bi gà-ŋu kii dibeenanjil nín sūǹní ndan puee ní^a.

2 Unimbɔti, sɔ̄ m-saai, di sá yii bi kā m-pu,

ŋwiin kamaa, bi jáà nì mi ki wɔ́b̀-mi.

3 M-nannanliibi kā m-pu baabadal.

Bin bí ki jáà nì mee wīikí tikpil.

4 Ama ŋyunti ŋun kufaaŋŋu yaa cúú-mee,

m dù m-mákal kí páań sii pu ní.

5 M nyɔ́ŋkí Unimbɔti u-nyɔɔbundi pu,

m máká u-pu ní kaa fàŋkí tiba.

Ba ní nisaaleen ŋūǹ kí ŋá-mi?

6 Ŋwiin kamaayee, bi cútí m-nyɔɔbuŋŋi ki kpántí,

bi pée dàkafī m-pu tikpitil ŋma ní.

7 Bi bāal̀ ki cɔ́ŋkí-mi

ní ki kpèé tin kɔkɔ m ŋáańee

ki pée nyàab̀ kí lēē m-maŋfal.

8 Atuŋkpiti nee puee, bi làá ŋmátáaa?

Unimbɔti, a-ŋuul ń fáá binib nee kí lúkú!

9 A kàan̄ ŋfunyɔm min m sáǹee.

Tíkiń m-nyinnyim kí ŋá a-lookun.

Aa kàan̄-mì ki ŋá a-gbɔŋkunaaa?

10 Ŋwiin ŋun m làá dāá yíiń-see,

m-nannanliibi làá dāá fàtīí gítí bi-boon.

Tin m nyée di sá yii Unimbɔti bí m-jandi pú.

11 M nyɔ́ŋkí Unimbɔti tin u sòon̄ee pu,

m nyɔ́ŋkí ti-Dindaan u-nyɔɔbundi pu.

12 M máká Unimbɔti pu ní kaa fàŋkí tiba.

Ba ní unil ŋūǹ kí ŋá-mi?

13 Unimbɔti, m nín pōoǹ-si puee, m làá ŋá míǹ.

M làá ŋá ijaam saraau kí tīī-si.

14 Di sá yii a fīī-mi ki nyántì ŋkúmin,

kaa yāntì m lítì.

Míǹ puee, m làá nīn còom̄ Unimbɔti nimbiin

ŋwalifi ŋun ŋmíntí binifoobee poon.