Ilan 55

Unil un u-bɔɔ nyáń u-boonee wimmeem

1 Daafiidi di ŋmàn̄ nlan nee ki tīī bilaŋgaaliibi kpiliu. Bi bɔ̀ɔ́ tibati ní ki gà-ŋu.

2 Unimbɔti, pīlifì m-wimmeem,

m yaa bíi gbàam̄-see, á taa fàtī a-boon kí tīī-mi.

3 Pīlifì-mi kí kíí-mi.

Maa ti nyí tin poon m bée ní m bí ki yáliŋkí

4 m-nannanliibi nín sòoǹ puee,

nì bitɔŋfitiibi nín wɔ́b̀-mi puee.

Di sá yii bi cáá agìń ki tòó m-pu,

ní ki jáà nì mi nì diŋuul.

5 M-pɔbil máfí

ní ŋkúm nyoondi cúú-mi.

6 Kufaaŋŋu cúú-mi m bíi jìkì,

ní m-wunti dūu kpíì.

7 Niinee ní m lī m-ban yii:

«M kāntí la dibeenanjil feeŋyi!

M bàà làá ŋàaǹ kí cùú nīn bíń laaba.

8 Tiŋman, m bàà làá cù ndandati,

kí tin nín̄ kóò kuteeun.

9 M bàà làá ŋá malaa kí ká kibalilaŋ,

kí nīn dátiǹ kubuŋkpaaŋŋu nee.»

10 Ti-Dindaan, kɔ́ǹ-bi fìkil fikil poon,

kí yàntī bi-limbiliŋ ń nyìŋfì.

Di sá yii m ká tipɔmbɔti nì

kunikpɔŋkpɔkɔu kitiŋ nee poon.

11 Bi tɔ́kɔ́ digundi yilpu ki còom̄

ki màntī ŋwiimpu nì kunyeeu.

Kitiŋ ki-ba poonee, an sá digaŋgam nì dinimbinaamandi ní,

12 nnikpaakoon bí ki-poon.

Ki-sampaambi kaa lóotí tipɔmbɔti nì dikiildi.

13 An yaa bàà sá m-nannanliu di bíi sìí-mi,

m bàà ŋūǹ kí ŋmèè.

An yaa sá m-pulincɔnti di kpèé ki sìŋkīǹ-mi,

m bàà búntí kí wàatī-u.

14 Ama an sá sii, m-nabiki,

m-bɔɔmɔnti, unil un man nì u tāatée!

15 Ti nìn sòoǹ ní an mɔ̄

ní ki nìn còom̄ dicilpu míǹ kunimbɔtidiin.

16 Yàntī m-nannanliibi ń kpú ŋkúntuntukum!

Bí nīn wāĺ nì bi-nimbiliŋ ní kí sìntī ditaŋkpiilin,

di sá yii ntoom bí bi-dumpui ki bí bi-pɔbiliŋin.

17 Mamee, Unimbɔti ní m yíì,

ní úǹ ti-Dindaan di làá fīī-mi.

18 Kutaafaau nì ŋwiimpu nì kujoou,

m yáliŋkí ki fátí diniindi.

Ama u gbìl̄ m-neen pu,

19 ki fīī-mi ki wúń m-pu

ŋyunti ŋun bi nìn bíi jáà nì mee,

di sá yii m-nannanliibi nìn wīikí m-pu.

20 Unimbɔti ń pīlifiǹ-mi kí sìntīǹ-bi taapu,

úǹ un sá ubɔti kí nīn cá jaanjaanee!

Baa làá kpántí bi-ba,

baa fàŋkí Unimbɔti.

21 M-bɔɔmɔnti gbanti jáà nì u-bɔɔbi ní,

waa tɔ́ dipoondi din u pōoǹee.

22 U-nyɔkɔ mɔ̄ kii tisiilee ní,

ama ní u-poon tū kátí kati.

U-nyɔɔbuŋŋi mèeǹ kii dikpajundee ní,

ama ki jītí kii kitàataajikee.

23 Túutí a-waŋgul kí dūú túń ti-Dindaan^a,

u làá tíkiń-si,

u kpá kí yàntī tiba ń cìŋkì deedeedaan.

24 Ama sii Unimbɔti, a làá yàntī

binib gbanti ń sìntī ditaŋkpiilin.

Nnikpaakoon dambi nì binyimɔndambi nee

kaa làá bà bi-wiiŋyi dijandi gba.

Ama mamee, sii pu ní m máká.