Ilan 58

Unimbɔti di sá un sòoǹ binib bɔtee

1 Daafiidi di ŋmàn̄ nlan nee ki tīī bilaŋgaaliibi kpiliu. Bi gà-ŋu nì nneen ŋun sá «Taa yàntī bí bīil̀ee...» ní.

2 Tiŋman, ni yaa sòoǹee, ibaamɔn ŋmí ní.

Nnibiyaamu, ni sòoǹ binib bɔti deedeeee?

3 Aayee! Ni pée nyí ní ki ŋáań ikpiti,

nimbi ni-ba di ŋáań tipɔmbɔti kitiŋ pu.

4 Binikpitib pée sá bikpitib doooo bi-na poon ní,

bi tin pée lì yii bi màal̀-bee, bi kíĺ bi bíi mɔ́ntí.

5 Bi cáá tilool kii ukoobuee ní.

Bi bí kii ukoowaati un kpáá u-tafaliŋ,

6 kaa pílifí ikoobu laŋgaaliu laŋŋu^a,

àá ukpaŋkpanti un bīń tiŋanee.

7 Unimbɔti, gbá kí wūkul̀ bi-nyiŋŋi bi-nyɔmmun,

ti-Dindaan, gbá kí fúkutí agbikintipɔmbil gbanti nyiŋŋi.

8 Yàntī bí wāŋkì kii nnyim min dɔ̄ ki pùub̀ee!

Yàntī bi-piiŋyi in bi tòóyee ń kpántí ipincal.

9 Bí nīn bí kii yaaweel un còom̄ ki kōō ki cée!

Bí taa wāl̀ ŋwìiń kii kibiki kin bi màl̄ kaa yōoǹee!

10 Kí wàatī bi-bɔjanaakuŋŋi ń wíiǹ kí ŋá akpaanee,

kunaakpaabuŋŋu kubɔ ń dāá yòon̄-ŋi,

báà ŋi yaa dá láá sɔ̀m̀aaa, ŋi yaa kūńaaa, an kaa páb́.

11 Deedeedaan yaa láa ká Unimbɔti bíi dátí binikpitib tafalee,

án làá dāá mɔ̄ɔkiǹ-u ní ú dāá fíntí u-taaŋi bi-fatikuu poon.

12 Binib làá dāá lì yii: «Deedeedaan lafun cáá tipaal.

Tiŋman, Unimbɔti ubɔ lafun bí kitiŋ nee pu ki sòoǹ binib bɔti.»