M-Nimbɔtiu, fīī-mi kí nyāntí m-nannanliibi ŋaan
59
1 Daafiidi di ŋmàn̄ nlan nee ki tīī bilaŋgaaliibi kpiliu. Bi gà-ŋu nì nneen ŋun sá «Taa yàntī bí bīil̀ee...» ní. Saayuul nìn tú binib bí cù Daafiidi dumpu kí kpèè yii u yaa bée, bí kpɔ̀-ua.2 Unimbɔti, fīī-mi kí nyāntí m-nannanliibi ŋaan,
wúń m-pu bin jáà nì mee ń taa ŋmā kí ŋá-mi tiba.
3 Fīī-mi kí nyāntí binikpitib nee ŋaan,
fīī-mi binikpɔliibi nee ŋaan.
4 Kpèè! Bi cí kí lēē m-maŋfal,
bin pɔ̄ɔ̄yee bíi jáà nì mi.
Ma mun kaa ŋá ikpiti ibaaa,
kaa tí yīntì mun, ti-Dindaan!
5 Maa ŋá tikpitil tiba, ama bi sáń kí cùú bɔ́ntí kí cīití-mi.
Fìntī! Dāan̄ m-cee kí kpèè.
6 Sii ti-Dindaan, Unimbɔti Mpɔŋkɔdaan, Isirayeel Nimbɔtiuee,
fìntī kí dáaĺ atimbun nee kɔkɔ tafal.
Taa sɔ̄ bin nyēē bi-bɔɔbi booŋyi nee saai.
7 Bi fàtīi gítiń kujoou kamaa
ki mùuǹ kii ibooyee,
ní ki còom̄ ki màntī kitiŋ.
8 Ntoonam di gbí bi-nyɔmmun,
ní bi-nyɔɔbuŋŋi bí kii kitàataajikee.
Bi dàkafī bi-ni yii: «Ŋma di làá gbìl̄?»
9 Ama sii ti-Dindaan, a bí ní ki lāā-bi,
a bèel̄ atimbun nee kɔkɔ nib.
10 Sii ní m kpèé, man pɔŋŋu.
Unimbɔti di sá man taŋkpanaakooku.
11 Man Nimbɔtiu néeń-mi ní ki làá dāá fīī-mi.
Man Nimbɔtiu làá yàntī ń jī m-nannanliibi pu dinyandi.
12 Taa nàan̄-bi kɔŋkɔnnee,
an yaa kaa sá míǹ, m-nibul làá súntí a-jajil pu.
Dū a-pɔŋŋu kí gbāfì-bi kí fá
ní kí sìntī-bi taapu,
ti-Dindaan, ti-gbampɔɔl.
13 Bi yaa pée kíĺ isoonee,
ikpiti ŋma di nyēē bi-nyɔmmun,
yàntī bi-lambil ń kpántí kii kutaliŋŋuee kí sàl̀-bi,
kun puee bi tòó mbusu ki mɔ́ntí inyimɔn!
14 Nàan̄-bi a-ŋuul poon,
kpɔ̀ kí céetí-bi múb ubɔ ń taa ti kíń.
Yàntī bí béé yii Unimbɔti di sá Jaakɔb bɔtiu
kí cáá sāā kitiŋ kúntilaŋki.
15 Bi fàtīi gítiń kujoou kamaa
ki mùuǹ kii ibooyee,
ní ki còom̄ ki màntī kitiŋ.
16 Bi còom̄ ki nyàab̀ kun ní bi làá jēe,
ní bi yaa kaa jíń ki díkée,
ní bí kíĺ ki bíi gbóoĺ.
17 Ama mamee, m làá nīn gà ilan ki pàkà a-pɔŋŋu,
m làá nīn gà ilan kutaafaau ki lì yii: «A ŋān̄,»
di sá yii sii di sá m-taŋkpanaakooku,
dinimbinaamandi yuntiŋuee, sii Unimbɔti ní m sáń ki kóò.
18 Sii un sá m-pɔŋŋuee, m làá nīn nyɔ́ŋkí-si.
Man taŋkpanaakooku di sá Unimbɔti,
Unimbɔti gbanti di néeń-mi.