Unimbɔti tɔ̀ tin kaa bí deedeeyee ipɔntoon
94
1 Ti-Dindaan, sii Unimbɔti un tɔ̀ ipɔntoonee,lēē a-ba kí dàkà, sii Unimbɔti un tɔ̀ ipɔntoonee.
2 Yīkìm̄, kitiŋ pu nib bɔsoonliu,
kí pà bilambidambi bi-tuuŋŋi paati.
3 Kí cáá sāā ŋyunti ŋulɔŋu ní binikpitib làá nīn bí ki fàal̀ ní?
Kí cáá sāā ŋyunti ŋulɔŋu ní, ti-Dindaan?
4 Bi yòontí bi-ba yilpu ki sòoǹ tilambibɔti,
bikpitiŋaliibi nee kɔkɔ dàkà bi-ba.
5 Ti-Dindaan, bi wɔ́b̀ a-nibul,
bi sàantí bin sá a-yabee.
6 Bi kù ukpiipu nì unicaan,
ki kù ataŋkpiibil.
7 Ní ki bí ki lì yii: «Ti-Dindaan kaa wāĺ,
Jaakɔb Nimbɔtiu kaa fātìi tɔ́a.»
8 Nimbi bigbaambi nee, ní cúúmaan ni-ba,
nimbi bin kaa dàkafī nee, ba dal ní ni làá gbìl̄ taapu ní?
9 Un di ŋá unil tafalee kaa gbìl̀aaa?
Úǹ un náań unil nimbilee kaa wāĺaaa?
10 Úǹ un dátí atimbun tafalee di kaa ŋūǹ kí dáaĺ unil tafalaaa?
Ti-Dindaan un tìì unil dinyilee,
11 u nyí unil landɔkɔi kɔkɔ!
U nyí i nín kaa bí tibaneeb.
12 Ti-Dindaan, unil un tafal a dátí,
ki cáá a-marab ki dàkà-uee bí mmɔnneeee!
13 Dinimbinaamandi yuntiŋuee, a yàntī u bí ŋgbansɔŋfin,
ki cí bí gbà mbòó kí cīití binikpitib.
14 Di sá yii ti-Dindaan kaa dù u-nibul kí fá,
waa fàtī u-boon kí tīī bin sá u-yabee.
15 Bi làá dāá fàtīí sòoǹ binib bɔti nì ibaamɔn,
ní bin kɔkɔ pɔbil bí dibee ń dāá kíí míǹ.
16 Ŋma di làá sòoǹ m-bɔti bikpitib nee cee kí tīī-mi?
Ŋma di làá mɔ̄tì m-pu bikpitiŋaliibi nee cee?
17 Ti-Dindaan yaa kaa bàà jòoń-mi,
an bàà kíǹ fiii m-naŋki ń kɔ́ diŋmiŋŋmidikil tiŋkinc.
18 M yaa bí yii: «M-taaŋi bíi yɔ̀tēe»,
ní sii ti-Dindaan neeŋkpaandi ń tíkiń-mi.
19 Ilandɔkɔ yaa bàà wíiǹ m-ni ki nyīŋfì m-puee,
ní á ŋméeǹ-mi kí tīī-mi dipɔɔsɔŋkil.
20 Sii nì bibɔsoonliibi binikpitib nee ŋá mpèéee?
Bíǹ bin nāantí falaa kaa dū mara ki yíiń tibee.
21 Bi kpáfí kinyɔkɔ ki lèekī deedeedaan maŋfal,
ki sòoǹ maanyiiba bɔti ki kù-u.
22 Ama ti-Dindaan di nìn kpántì m-balilaŋki.
M-Nimbɔtiu di nìn sá kutaŋkpanaakoou
kun m sáǹ ki kɔ́ee.
23 U yāntì bi-kpitii gítì bi-pu,
u dū bi-kpitii ki nāaǹ-bi.
Ti-Dindaan ti-Nimbɔtiu di nāaǹ-bi.