Ilan 97

Ti-Dindaan sá ubɔti, kitiŋ pu nib kɔkɔ ń nīn fàal̀

1 Ti-Dindaan sá ubɔti,

kitiŋ pu nib kɔkɔ ń nīn fàal̀,

bin kóò ntimu mun kɔkɔ nnyim

māntìi túee poonee ń nīn bí mmɔnni!

2 Ditagbandi nì dibɔmbɔndi māntìi tú-u.

U-beejal tɔ́kɔ́ deedee nì tin tèen̄ee pu ní^a.

3 Ŋŋmi līī u-nyɔkɔpu,

ní ki wù u-nannanliibi bin māntìi tú-uee.

4 U yàntī itaaŋmɔŋmɔ ŋmíntí duulinya pu,

kitiŋ kāntí-i ní ki jìkì nì tifaandi.

5 Ajoon dùntī kii nsikampimuee

kitiŋ kɔkɔ Dindaan nimbiin.

6 Yilpu sòoǹ u-deedeeu pu,

ní anibul kɔkɔ kāntí u-nyooti.

7 Icoo ń cúú bin kɔkɔ tòotī awaayee,

bin nyɔ́ŋkí awaa ŋin kaa bí tibanee!

Inimbɔti kɔkɔ, gbàam̄maan ti-Dindaan nimbiin.

8 Siiyɔn yab gbìl̄ ní an mɔ́ɔkiǹ-bi.

Ti-Dindaan, a-bɔsooŋyi puee,

Juuda timmu bíi fàal̀.

9 Di sá yii sii ti-Dindaan,

Yilpu fɔ́ŋŋŋ Nimbɔtiu un kpòotī kitiŋ kɔkɔee,

sii di tɔ́kɔ́ inimbɔti kɔkɔ pu.

10 Nimbi bin néeń ti-Dindaanee, nín̄ námaan ikpiti.

Ti-Dindaan wúǹ u-deedeedambi maŋfal pu,

u fìil̄-bi ki nyāntí binikpitib ŋaan.

11 Ŋwalifi ŋmíntí deedeedambi,

ní bin pɔbil bí diba nì Unimbɔtee fàal̀.

12 Deedeedambi, ti-Dindaan puee, nín̄ fàal̀maan,

ní kí nīn nyɔ́ŋkí u-circir yindi.