Ilan 98

Tí nyɔ̄ŋkì ti-Dindaan un dòońee

1 Inyɔŋki laŋŋu.

Gāāmaan nlampɔɔn kí pàkà ti-Dindaan,

di sá yii u ŋáań maamaacib.

U-ŋaŋgiil, u-ŋal ŋun bí circiree yāntì u jáń ki jíń.

2 Ti-Dindaan dàkā yii u sá u-fiil,

u lēē u nín bí deedee puee ki dàkā atimbun kɔkɔ.

3 U téetì u-neeŋkpaandi nì u-deedeeu

un u cáá Isirayeel yab puee pu.

Kí cáá sāā kitiŋ gbeennyɔkɔee,

bi ká ti-Nimbɔtiu fiil.

4 Kitiŋ pu nib kɔkɔ, fáámaan iwiliili kí dàntì ti-Dindaan,

gāāmaan ilan mpɔn nì dipɔɔpindi kí nyɔ̄ŋkì-u.

5 Bɔ̀ɔ̀maan kubeeu kí nyɔ̄ŋkì ti-Dindaan,

bɔ̀ɔ̀maan kubeeu kí gāā ilan kí kìntī.

6 Ní búḿmaan akantán nì iyin kí nyɔ̄ŋkì-u,

ní fáámaan iwiliili kí dàntì ti-Dindaan, ubɔti.

7 Tiŋku ń nīn gà kuwoou, ki kpáaǹ tin kɔkɔ bí u-poonee!

Kitiŋ nì tin kɔkɔ bí ki-puee mun ń gāā kuwoou.

8 Ibun ń kpāafì abaal,

ajoon ń kpāfì dicilpuee kí gāā ilan nì dipɔɔpindi

9 ti-Dindaan nimbiin. Di sá yii u dòoń

kí sòoǹ kitiŋ pu nib bɔti.

U làá sòoǹ duulinya bɔti nì ibaamɔn,

ní kí sòoǹ anibul bɔti deedee.