Ilan 105

Unimbɔti deedee tuuŋŋi bɔti

(B. 1-15. kpèè 1 Kroo 16.8-22)

105

1 Ní nyɔ̄ŋkìmaan ti-Dindaan kí yòon̄ u-yindi yilpu,

ní yàntīmaan anibul kɔkɔ ń béé u-tuŋkpaaŋŋi.

2 Ní gāāmaan ilan kí pàkà-u, kí gāā ilan kí nyɔ̄ŋkì-u,

ní dàkafìmaan u-maamaaci tuuŋŋi kɔkɔ pu.

3 Nimbi bin nyàab̀ ti-Dindaanee,

án nīn mɔ̄ǹ-ni u-circir yindi pu,

ní nīn bí dipɔɔpindin.

4 Ní nyàab̀maan ti-Dindaan nì u-pɔŋŋu,

nyàab̀maan kí nīn bí u-nimbiin.

5 Ní téetímaan maamaaci tuuŋŋi ŋin u ŋáaǹee

nì u-tuŋkpaaŋŋi pu,

nì ibɔsoon in kɔkɔ ní u sòon̄ee.

6 Nimbi u-tɔntɔnliu Abraam naantiibi,

nimbi Jaakɔb naantiibi bin u lēēyee, téetímaan.

7 Úǹ di sá ti-Dindaan ti-Nimbɔtiu,

úǹ di sòoǹ kitiŋ pu nib kɔkɔ bɔti.

8 Waa pée súntí u-poondi pu dalba dalba,

tibɔti tin u yóoǹ án nīn sá mara ki tīī anaantitɔntɔkɔ kutuku puee^a.

9 Dipoondi gbanti ní u nìn pōoǹ Abraam,

díǹ ní u nìn pūtì ki pōoǹ Isaaki mun^b,

10 díǹ ní u nìn dūu síiǹ Jaakɔb dibɔkpaal,

talku poondi gbanti ní u nìn pōoǹ Isirayeel^c,

11 ki lī-u yii: «M làá tīī-si Kanaan tiŋki,

án nīn sá sii nì a-naantiibi wanti^d.»

12 Baa nìn náaǹ báà fiii,

bi nìn pée sá binikaaŋkaabi ní ki kāl̀ niin kunicaŋu^e.

13 Bi nìn kàal̀ atimbun ní ki kpántí,

ki kàal̀ dibeel diba poon ní ki yíkí ki nìkì din kíǹ poon.

14 Ama Unimbɔti kaa kíí báà unil ń sàaǹ-bi,

bi-pu ní u dáaĺ bibɔtiibi tafal ki lī yii:

15 «Ní taa gbēē bin m lēēyee,

ní taa pée ŋá m-bɔnaatiliibi tikpitil tiba^f.»

16 U nìn cáań ŋkùm kitiŋee pu,

tijin kaa nìn gíti bí binib ń jī.

17 U nìn dū unil ubɔ ki tú bi-nyɔkɔpu,

Jooseefi un bi nìn nyáfì u kpántì uyumbuee^g.

18 Bi nìn bá u-taaŋi akpambaa,

bi nìn dū ikusaka ki tɔ́ u-neen^h,

19 ki cáá sāā ŋyunti ŋun ní tin u nìn sòon̄ee

dāa jítì míǹ deedeedeeyee.

Ti-Dindaan nyɔɔbundi nìn cɔ́ŋkì-u ki pɔ̀n̄-uⁱ.

20 Ubɔti nìn pú kinyɔkɔ bí báatí-u u-kpambaaŋi,

anibul kpiliu nìn yāntì bi líì-u^j.

21 U nìn dū-u ki kāaǹ u-dicaŋku pu ukpil,

ní ki nìn yāntì u kpòotī tin kɔkɔ u cááyee^k,

22 kí ŋmā kí dàkà u-bɔtibiliŋ u nín là puee,

ní kí ŋmā kí tīī bitindaŋkpilib iciin.

23 Míǹ boonee, Isirayeel nìn cūtì Eejipiti tiŋkin,

Jaakɔb nìn kpántì unicaan Kaam tiŋkin^l.

24 Ti-Dindaan nìn pú u-nibul mmaal

ní ki tīī-bi mpɔn ki jítiǹ bi-nannanliibi.

25 U nìn cúú Eejipiti yab pɔbiliŋ ki kpántì,

bi nìn kíǹ ki ná u-nibul

ní ki nìn ŋmātiǹ u-tɔntɔnliibi^m.

26 Niinee ní u dū u-tɔntɔnliu Mooyiisi

nì Aarɔn un u nìn lēēyee ki túⁿ.

27 Unimbɔti nìn yāntì bi ŋáaǹ maamaaci daanti Eejipiti tiŋkin,

bi nìn ŋáaǹ maamaaci tuuŋŋi Kaam tiŋkin.

28 Unimbɔti nìn cáań dibɔmbɔndi ní an dūu mɔ́,

ama báà ubɔ kaa nìn kpákáǹ u-nyɔɔbundi.

29 U nìn yāntì nnyim kpántì fatiku

ní ki yāntì ijɔm in bí mi-poonee kpíì^o.

30 Kpaabi nìn gbí Eejipiti tiŋkin

ki kpáaǹ bi-bɔtiu diiŋŋin^p.

31 Unimbɔti nìn sòon̄ ní ikpiŋki dɔ́miń

ní inaacib gbí kitiŋ kɔkɔ pu^q.

32 An nín bàà sá utaa ń nèe, u nìn yāntì ataanyiŋkumbil di lítì,

ní utaa tɔ́ ní bi-tiŋki fōō ŋŋmi,

33 ki bíil̀ bi-fiinyi nì bi-fiigi sufii,

ní ki kɔ́fì bi-tiŋki pu sufii^r.

34 Unimbɔti nìn tí sòon̄ ní inaakicaan,

nì inaakitoon in baa ŋūǹ kí kàaǹee dɔ́miń.

35 I nìn ŋmɔ́ bi-tiŋki pu mooti kɔkɔ,

i nìn ŋmɔ́ kitiŋ nín lòon̄ tikpaajin tiŋyee^s.

36 U nìn kūū Eejipiti yab biseebiyaamu nninjabiyaamu kɔkɔ,

mun bi péé ki màl̄ ŋyunti ŋun bi-fatikuu dáá tùm̀ee^t.

37 U nìn nyántì u-nibul bi tú animbil nì sindaariya^u.

Bi-naakɔti kansikinee, ubɔ kaa nìn gbíntì boon.

38 Bi nín nyáńee, an nìn mɔ́ɔkiǹ Eejipiti yab,

di sá yii dinyoondi nìn kɔ́-bi^v.

39 U nìn kpátì ditagbandi ki bīiǹ bi-pu,

ní ki dū ŋŋmi ki ŋmíntì-bi kunyeeu^w.

40 Bi nìn mēē ní u yāntì njikpacimamu dɔ́miń,

u nìn dū yilpu jinti ki kpíiǹ-bi^x.

41 U nìn yāntì ditaŋkpal poon nnyim nyáń^y,

ki pùub̄ ki jítì kuteeu pu kii mbunee.

42 Di sá yii waa nìn súntì u-circir poondi

din u nìn pōoǹ u-tɔntɔnliu Abraamee pu^z.

43 U nìn nyántì u-nibul nì ifaal,

bin bin u nìn lēēyee iwiliili poon.

44 U nìn fōō atimbun aba timmu ki tīī-bi,

ní bíǹ jíń anibul aba tuuŋŋi paati^a,

45 án nín làá ŋá pu bí nīn ŋúb́ u-bɔkpaaŋi

kí nīn tɔ́ u-marabee.

Aleeluya, nyɔ̄ŋkìmaan ti-Dindaan!