Ilan 106

Isirayeel yab bíi bìitī bi-kpitii pu

(B. 1,47-48. kpèè 1 Kroo 16.34-36)

106

1 Aleeluya, nyɔ̄ŋkìmaan ti-Dindaan!

Tí nyɔ̄ŋkì ti-Dindaan, di sá yii u ŋān̄,

ní u-neeŋkpaandi bí ki cá jaanjaan^a.

2 Ŋma di ŋūǹ kí sòoǹ ti-Dindaan tuŋkpaaŋŋi pu?

Ŋma di làá yàntī bí gbìl̄ u-nyɔŋkii pu?

3 Bin ŋúb́ Unimbɔti marab,

ki ŋáań ŋyunti kamaa tin bí deedeeyee bí mmɔnneeee!

4 Ti-Dindaan, a yaa bíi dàkà a-nibul a-ŋantee,

á téetí m-pu!

Jòoń-mi a-fiil pu.

5 Yàntī ḿ ká bin a lútèe naam,

kí yàntī ḿ fàal̀ nì a-nibul

ní kí nīn bí dipɔɔpindin nì bin sá a-yabee.

6 Ti ŋá ikpiti kii ti-baabee,

ti ŋá tin kaa kítèe ki fōō dibɔkpil.

7 Ŋyunti ŋun ti-baabi nìn bí Eejipiti tiŋkinee,

baa nìn gbìl̄ ti-Dindaan maamaaci tuuŋŋi taapu.

Bi nìn súntì u-neeŋkpaandi din u dàkā-bi ŋfunyɔm tikpilee pu,

bi nìn jáń nì u dimɔɔl caŋin, Tikati mɔɔl caŋin^b.

8 Ama úǹ u-ba yindi puee, u nìn fīī-bi,

ki lēē u-pɔŋŋu ki dàkā.

9 U nìn kpātì Tikati mɔɔl pu

ní díǹ fóotì.

U nìn yāntì bi cōom̀ dimɔɔl poon

kii bi nín còom̄ kuteeun puee.

10 U nìn fīī-bi ki nyántì bin kaa nìn là bi-bɔtee ŋaan,

u nìn dá-bi bi-nannanliibi ŋaan ki líì.

11 Nnyim nìn fātìi gbí ki léeǹ bi-nannanliibi pu,

bi-kansikin báà ubɔ kaa nìn kíǹ^c.

12 Niinee ní bi fōō Unimbɔti nyɔɔbundi ki kíí,

ní ki gāā ilan ki nyɔ́ŋkì-u^d.

13 Ama an kaa nìn pée súŋkì ní bi súntì tin u ŋée pu,

baa nìn cíitì ú ŋá tin u nìn bɔ́ntì kí ŋée.

14 Bi nìn ŋá nnimbitaataam kuteeun.

Laakin ubɔ kaa nìn bée, bi nìn cɔ́ŋkì Unimbɔti.

15 U nìn tīī-bi tin bi nìn bālifèe,

ama ní ki dū didúntil weeŋŋu ki tɔ́ bi-pu.

16 Bi nìn ŋá Mooyiisi pu ipoompoon dinaapaal pu

ki kpáaǹ Aarɔn un ní bi nìn dūu sú ti-Dindaanee.

17 Kitiŋ nìn cúu látì ní ki dū Daatan ki náĺ,

kì nìn bīiǹ Abiiram kitil pu.

18 Ŋŋmi nìn wùn̄ dikitil gbanti kɔkɔ,

aŋmilimbil nìn wùn̄ binikpitib gbanti^e.

19 Bi nìn mɔ́ɔ́ dinabil Ooreeb jool taapu,

bi nìn dū tikúti ki mɔ́ɔ́ diwaal ki gbāaǹ ki jáam̀-dì.

20 Bi nìn dū unaa un ŋmóò timoolee naŋku

ki kpántì Unimbɔti un sá bi-nyootee.

21 Bi nìn súntì Unimbɔti bi-fiiliu

un di nìn túń atuŋkpaan Eejipiti tiŋkinee pu.

22 Bi nìn súntì maamaaci tuuŋŋi ŋin u nìn ŋá Kaam tiŋkinee,

titumbilindi tin u nìn ŋá Tikati mɔɔl caŋinee.

23 Unimbɔti nìn lēē yii u làá kúntí-bi,

ama Mooyiisi, unil un u nìn lēēyee

nìn yúl̀ u-nimbiin ki pīiǹ-u nsan

ú taa kpɔ̀-bi u-ŋuul poon.

24 Míǹ boonee, bi nìn kpēē kitimmɔntii nee fám,

di sá yii baa nìn fōō Unimbɔti poondi ki kíí.

25 Bi nìn bí bi-tantibin ki gbùkum̄,

baa nìn tɔ́ ti-Dindaan nyɔkɔ.

26 Niinee ní u yōoǹ u-ŋal yilpu ki pūtì

kí kpɔ̀-bi kuteeun^f,

27 kí jà bi-naantiibi bí yàl̄ atimbun kɔkɔn,

ní kí yàntī bí kpú nnicantimun^g.

28 Bi bàn̄ Peewɔɔree ní ki kíĺ ki bíi tòotī diwaal Baal,

ní ki ŋmɔ́ tiwaŋkuti tin bi dūu tōotì bitaŋkpiibee nanti.

29 Bi nìn ŋá míǹ ki gbítì Unimbɔti ŋuul

ní nnaabu jéetì bi-pu.

30 Ama Piinaasi nìn yíkìi yúl̀ ki ŋáŋkì tibɔti,

ní nnaabuee gbēeǹ.

31 An pu ní ti-Dindaan yíiń-u deedeedaan

kí nīn pée cáa cá abin abin^h.

32 Bi nìn tí gbítì ti-Dindaan ŋuul

Meeriiba nyimbuliŋu caŋin,

ki kɔ́ǹ Mooyiisi digìńdin.

33 Bi nìn kɔ́ Mooyiisi poon ki lēē baadakam,

ní úǹ sòon̄ kaa dākafìⁱ.

34 Ti-Dindaan nín nìn bí-bi yii bí kpɔ̀ kí céetí atimbun ŋiŋyee,

baa nìn ŋá míǹ^j.

35 Ama bi nì binib bin kaa nyí Unimbɔtee nìn ŋá mpèé

ní bi bífì bi-koobiliŋ ki kíǹ ki ŋáań míǹ.

36 Bi nìn tōotì bi-waaŋi

ní ŋíǹ kpántì-bi kutaliŋŋu^k.

37 Bi nìn kūū bi-jipɔmbi nì bi-bisalib

ki ŋá saraabi ki tīī arasiniibi^l.

38 Bi kūū maanyiibab,

ki kūū bi-jipɔmbi nì bi-bisalib

ki ŋá saraa ki tīī Kanaan yab waaŋi.

Bi kūū binib míǹ ki kɔ́ǹ kitiŋ tijɔkɔndi^m.

39 Bi-tuuŋŋi gbanti kɔ́ǹ-bi tijɔkɔndin,

bi-bimbim yāntì bi kpántì kii kinimpulaakpaayeeⁿ.

40 Niinee ti-Dindaan fōō u-nibul pu diŋuul,

u nìn kíǹ ki ná bin sá u-yabee.

41 U nìn dū-bi ki líì nì atimbun aba,

u nìn dū-bi ki ŋá bi-nannanliibi taapu.

42 Bi-nannanliibi nìn sāaǹ-bi

ní ki nyīī-bi ki múĺ bi-taapu.

43 Iyunti tikpilee, ti-Dindaan nìn fīī-bi,

ama bíǹ nìn gbíntìi jáà nì u,

ní ki nìn mɔ̀tīi múl̀ bi-kpitii poon.

44 Ti-Dindaan nìn ká dinimbinaamandi din poon bi bée

ŋyunti ŋun ní u gbìl̄ bi-biilii puee.

45 U nìn téetì dipoondi din u nìn pōoǹ-bee pu.

U-neeŋkpaandi puee, u nìn kpántì u-landɔkɔŋu.

46 U nìn yāntì bin kɔkɔ cúú-bi

ki cūnnì kuyuŋuee súń bi-saai^o.

47 Ti-Dindaan ti-Nimbɔtiu, fīī-ti!

Nyāntí-ti atimbuncaan ŋaan kí kóoǹ-ti kí kpāfì.

Niinee ní tí jāam̀ a-circir yindi,

ní kí nīn nyɔ́ŋkí-si dipɔɔpindin.

48 Tí jāam̀ ti-Dindaan, Isirayeel Nimbɔtiu

kí nīn cáa cá jaanjaan.

Ní samaa kɔkɔ ń kíí yii:

«Ameeni! Tiŋman, an lafun ŋá míǹ!

Aleeluya, Nyɔ̄ŋkìmaan ti-Dindaan!»