Unil un ŋmátì ŋkúm ŋaanee wimmeem
116
1 M néeń ti-Dindaan,di sá yii u pílifì m-gbaamii.
2 U kpōoǹ u-tafal ki túĺ m-watil pú.
M-maŋfal wiiŋyi kɔkɔ poonee, m làá nīn kūuntí ki yíì-u.
3 Ŋkúm kusakai nìn fìn̄-mi,
ditaŋkpiilin laaŋku nìn sàl̄-mi.
M nìn bí dinimbinaamandi nì kunimbaaun.
4 Niinee ní m kúuǹ ki yíiń ti-Dindaan yindi yii:
«M-Dindaan, m gbàam̄-si, fīī-mi!»
5 Ti-Dindaan sá usaasɔl ní ki bí deedee,
ti-Nimbɔtiu poon mɔ̄.
6 Ti-Dindaan wúǹ ŋwɔsɔfimu pu,
m nìn pēefì tikpil ní ti-Dindaan fīī-mi.
7 M làá fàtīí ká m-ŋuŋfil,
di sá yii ti-Dindaan ŋá-mi tiŋan.
8 Tiŋman, a fīī-mi ki nyántì ŋkúm ŋaan,
a pítì m-nyinnyim, kaa yāntì m lítì.
9 M làá nīn còom̄ sii ti-Dindaan nimbiin,
binifoobi tiŋki nee poon.
*
10 M nìn gbíntìi cáá fookii min kamaa m nìn bí ki lì yiia:
«M gbí isaa tikpilee!»
11 M-pɔbil nìn bíil̀ ní m nìn lì yii:
«Binib kɔkɔ sá binyimɔndambib!»
12 Mana ní m làá ŋmā kí téeǹ ti-Dindaan
tiŋan tin kɔkɔ u ŋá-mee?
13 M làá yòon̄ difiil kɔŋkɔnnyɔkaau yilpu
ní kí yíiń ti-Dindaan yindi.
14 M làá pà ti-Dindaan m-pooŋyi pɔndi
u-nibul kɔkɔ nimbiin.
15 Bin yú nì ti-Dindaan deedeeyee
kúm cáá kunyampoou u-nimbiin.
16 Áù ti-Dindaan, m sá a-tɔntɔnliu ní,
m lafun sá a-tɔntɔnliu, a-tɔntɔnliu unimpu jipɔɔn!
A cúú m-kusakai ki bútì.
17 M làá ŋá ijaam saraau kí tīī-si,
ní kí yíiń sii ti-Dindaan yindi.
18 M làá pà ti-Dindaan m-pooŋyi pɔndi
u-nibul kɔkɔ nimbiin,
19 u-diiku cindin,
sii Jeerusaleem tiŋki kansikin.
Aleeluya, nyɔ̄ŋkìmaan ti-Dindaan!