Ilan 115

Unimbɔti baba di máaǹ inyɔŋki

115

1 An kaa sá kí tīī timbi, ti-Dindaan, an kaa sá kí tīī timbi,

ama a-yindi ní á tīī tinyool

a-neeŋkpaandi nì a-baamɔŋyi pu.

2 Ba pu ní atimbun lì yii:

«Bi-Nimbɔtiuee bí la ní?»

3 Ti-Nimbɔtiu bí yilpu ní,

u yaa là puee, míǹ ní u ŋáań.

4 Animbil kúti nì sindaariya ní bi dūu mɔ́ɔ́ bi-waaŋi,

unil di dū u-ŋalii ki mɔ́ɔ́-ŋi.

5 Ŋi cáá kinyɔkɔ ní kaa sòoǹ,

ŋi cáá animbil ní kaa wāĺ.

6 Ŋi cáá atafal ní kaa gbìl̀,

ŋi cáá dimaŋfal ní kaa gbìl̀ nsɔnsɔfi àá nnunnu.

7 Ŋi cáá iŋal ní kaa ŋūǹ kí gbēē tiwan,

ŋi cáá ataa ní kaa ŋūǹ kí còom̀.

Ŋaa ŋūǹ kí nyāntí tibɔti ŋi-neeŋyin.

8 Bin mɔ́ɔ́-ŋee ń nīn bí kii ŋi nín bí puee,

ki kpáaǹ bin kɔkɔ máká ŋi-puee^a.

9 - Nimbi Isirayeel yab,

nín̄ mákámaan ti-Dindaan pu.

- Úǹ di sá bi-jòońliu nì bi-gbampɔɔl.

10 - Aarɔn naantiibi, nín̄ mákámaan ti-Dindaan pu.

- Úǹ di sá bi-jòońliu nì bi-gbampɔɔl.

11 - Nimbi bin fàŋkí ti-Dindaanee,

nín̄ mákámaan ti-Dindaan pu.

- Úǹ di sá bi-jòońliu nì bi-gbampɔɔl.

12 - Ti-Dindaan téetí ti-pu, u làá bìin̄ ti-pu.

- U làá bìin̄ Isirayeel yab boon,

- u làá bìin̄ Aarɔn naantiibi boon.

13 U làá bìin̄ bin fàŋkí ti-Dindaanee boon,

mbiyaamu nì bikpaambi kɔkɔ^b.

14 - Ti-Dindaan ń yàntī ní bùtī,

ni nì ni-biyaamu!

15 Ti-Dindaan ń bìin̄ ni-boon,

úǹ un di náań yilpu nì taapuee!

16 Ti-Dindaan di yì yilpu,

ama ní ki dū kitiŋ ki tīī binib.

17 An kaa sá bitaŋkpiibi di nyɔ́ŋkí ti-Dindaan,

kaa tí sá bin kɔkɔ sìntī diŋmiŋŋmidikil tiŋkinee.

18 Ama timbee, ti làá jāam̀ ti-Dindaan,

kí yòon̄ kɔŋkɔnnee kí nīn cáa cá jaanjaan!

Aleeluya, nyɔ̄ŋkìmaan ti-Dindaan!