Ilan 119

Unimbɔti marab nyɔŋkii

119

1 Unil un baa kāntí tikpitil tiba u-saŋkindi poon,

ní u ŋáań ti-Dindaan marab nín bí yii ú ŋá puee bí mmɔnneeee!

2 Bin ŋúb́ u-bɔkpaaŋi

ní ki nyàab̀-u nì bi-pɔbiliŋ kɔkɔee bí mmɔnneeee!

3 An nibee kaa ŋáań tikpitil,

bi nóó u-saŋŋu ní.

4 Sii ti-Dindaan di tīī-ti a-bɔkpaaŋi

ní ki là yii tí nīn ŋúb́-ŋi tiŋan.

5 Yàntī ḿ nīn cáá mbimbimɔntiim

kí nīn tɔ́ a-koobiliŋ.

6 Niinee, m-nimbikpeeŋu yaa bá a-marab kɔkɔ puee,

icoo kaa làá cúú-mi.

7 M làá nyɔ̄ŋkì-si nì dipɔbil diba

kí nīn bífí tin a sòon̄ ki síiǹ tì bí deedeeyee.

8 M làá nīn ŋúb́ a-koobiliŋ,

taa dū-mi kí fá kɔkɔ.

9 Mana ní unaacimpɔɔn ŋūǹ kí nīn cáá mbimbim min bí circiree?

- See ú nīn ŋúb́ a-nyɔɔbundi.

10 M nyàab̄-si nì m-pɔbil kɔkɔ,

taa yàntī ḿ kàkatī kí wàatī a-marab.

11 M kpáafí a-nyɔɔbundi m-pɔbilin

án nín làá ŋá pu ḿ taa yìntīǹ-see.

12 Ti-Dindaan, si nì ditundi,

a nín dàkā-mi a-koobiliŋee pu.

13 M-nyɔkɔ làá māafì

tin ní a sòon̄ ki síiǹee.

14 M yaa nóó a-bɔkpaaŋee, an mɔ̄ǹ-mi

kii m ká tigaajakpaandee.

15 M làá dàkafì a-bɔkpaaŋi pu

ní m-nimbikpeeŋu ń nīn bá a-saŋyi pu.

16 An mɔ̄ǹ-mi a-koobiliŋ pu,

maa súntí a-nyɔɔbundi pu.

17 Ŋá man a-tɔntɔnliu tiŋan

ḿ nīn bí dimaŋfalin, ní kí nīn ŋúb́ a-nyɔɔbundi.

18 Ŋúbití m-nimbiliŋ ní ḿ ŋmā kí wāl̀

maamaacib bin bí a-marab poonee.

19 Unicaan ní m sá kitiŋ nee pu,

taa dū a-marab kí báĺ-mi.

20 M-naŋki fèefī ki nyàab̀

tin a sòon̄ ki síiǹee ŋyunti kamaa.

21 A kpàtī bilambidambi bin bi tɔ́ mbusu,

bi fàtī bi-boon ki tìì a-marabee pu.

22 Kàkatī icoo nì kpeefam kí wàatī-mi,

di sá yii m ŋúb́ a-bɔkpaaŋi.

23 Báà abɔtibil yaa kpáfì ki bíi sòoǹ

ki bɔ́ntí m-pu tibɔkpitilaaa,

man a-tɔntɔnliu làá nīn pée dàkafī a-koobiliŋ pu ní.

24 An mɔ̄ǹ-mi a-bɔkpaaŋi pu,

ŋíǹ di sá m-saŋkiliibi.

25 M dɔ̄ kitiŋ ntamin,

fàtīí tīī-mi dimaŋfal kí nóó nì a-nyɔɔbundi.

26 M tùkū-si m-bimbim nín bí puee ní a kíí-mi,

dàkà-mi a-koobiliŋ.

27 Yàntī ḿ gbìl̄ a-bɔkpaaŋi taapu,

ní ḿ dàkafì a-maamaaci tuuŋŋi pu.

28 Kunimbaau yāntì nnyinnyim nyáń-mi,

fàtīí tīī-mi mpɔn kí nóó nì a-nyɔɔbundi.

29 Kàkatī nnyimɔn saŋŋu kí wàatī-mi,

ní a-laŋŋaŋfitiiku poonee, á yàntī ḿ béé a-marab.

30 M lēē ibaamɔn saŋŋu,

m tɔ́ tin a sòon̄ ki síiǹee.

31 M dū m-ba ki nákáǹ a-bɔkpaaŋi,

ti-Dindaan, taa yàntī icoo ń jī-mi.

32 M bìǹ ki nyàab̀ kí nóó a-marab saŋŋu,

di sá yii a yāntì m tɔ́ m-ba.

33 Ti-Dindaan, dàkà-mi a-koobiliŋ saŋŋu,

m làá nīn nóó-ŋu kí tin cáá kátí.

34 Tīī-mi dinyil ḿ dūú ŋúb́ a-marab,

m làá nīn tɔ́-bi nì m-pɔbil kɔkɔ.

35 Kpòotī-mi kí tàkan̄ a-marab saŋŋu pu,

di sá yii bi-poon ní m kāntí m-mɔŋŋu.

36 Kpòon̄ m-pɔbil kí gíiǹ a-bɔkpaaŋi watil pú

kí taa yàntī dí kpòon̄ kí gítí dulim gaajati pú.

37 Cúú m-nimbikpeeŋu kí páatí tin kaa bí tibanee pu,

kí yàntī ḿ nīn bí a-saŋŋu poon.

38 A nín pōoǹ kí ŋá kí tīī bin fàŋkí-see puee,

ŋá míǹ kí tīī man a-tɔntɔnliu.

39 Kàkatī m-cooi in fàantí-mi nee kí wàatī-mi,

di sá yii tin a sòon̄ ki síiǹee di ŋān̄.

40 Tiŋman, m lafun néeń a-bɔkpaaŋi,

a-deedeeu puee, fàtīí tīī-mi dimaŋfal.

41 Ti-Dindaan, dàkà-mi a-neeŋkpaandi,

fīī-mi kí nóó nì a nín lī puee.

42 Niinee m làá ká dinyɔɔbundi kí kíí bin sìí-mee,

di sá yii a-nyɔɔbundi pu ní m máká.

43 Yàntī ibaamɔn nyɔɔbuŋŋi ń nīn pée nyēē m-nyɔkɔn ŋyunti kamaa,

di sá yii tin a sòon̄ ki síiǹee pu ní m máká.

44 M làá nīn pée ŋúb́ a-marau ní

kí nīn pée cáa cá jaanjaan.

45 M làá nīn còom̄ ki tɔ́ m-ba,

di sá yii a-bɔkpaaŋi ní m nyàab̀.

46 M làá sòoǹ a-bɔkpaaŋi pu bibɔtiibi nimbiin

ní an kaa làá nīn cáá-mi icoo.

47 A-marab tìì mmɔn,

di sá yii m néeń-bi ní.

48 M yòontí m-ŋalii kí túĺ a-marab watil pú,

di sá yii m néeń-bi.

M làá dàkafì a-bɔkpaaŋi pu.

49 Téetí dinyɔɔbundi din a lī man a-tɔntɔnliu puee,

di-pu ní m máká.

50 Báà m yaa bí falaa poonaaa, m kāntí diŋmeendi,

di sá yii tin a sòon̄ee di tìì-mi dimaŋfal.

51 Bilambidambi bēel̀-mi tikpil,

ama maa fātì m-boon ki tīī a-marab.

52 Ti-Dindaan, m téetí tin a nìn sòon̄ ki síiǹ dooooyee pu,

an di tìì-mi diŋmeendi.

53 M yaa ká binikpitib nín féeń a-marab puee,

m fòol̄ mbum ŋkpitim pu ní.

54 Kitiŋ kin pu m kā kunicaŋu nee,

a-bɔkpaaŋi di kpántì m-laŋyi.

55 Ti-Dindaan, m téetí a-yindi pu kunyeeu,

ní ki ŋúb́ a-marab.

56 Tin di sá m-yatee

di sá ḿ nīn ŋúb́ a-bɔkpaaŋi.

57 Ti-Dindaan, m lī yii dijandi din m lēēyee

di sá ḿ nīn ŋúb́ a-nyɔɔbundi.

58 M nyàab̄ kí nīn fáatiǹ-si nì m-pɔbil kɔkɔ,

sɔ̄ m-saai kí nóó nì tin a sòon̄ee.

59 M dākafì m-saŋkindi pu,

m là kí fàtīí nīn tɔ́ a-bɔkpaaŋi.

60 M làá ŋá malaa, maa làá tàan̄

kí ŋúb́ a-marab.

61 Binikpitib ŋmiii māntìi tú-mi,

ama maa súntí a-marab pu.

62 M yíkí kunyataasiiu ní kí nyɔ̄ŋkì-si,

di sá yii tin a sòon̄ ki síiǹee bí deedee.

63 M-bɔɔbi di sá bin kɔkɔ fàŋkí-si

ní ki ŋúb́ a-bɔkpaaŋee.

64 Ti-Dindaan, a-neeŋkpaandi gbí kitiŋ kɔkɔ pu,

dàkà-mi a-koobiliŋ.

65 Ti-Dindaan, a ŋá man a-tɔntɔnliu tiŋan

ki nóó nì a-nyɔɔbundi.

66 Dàkà-mi nlandɔkɔmɔnti nì dinyil,

di sá yii m máká a-marab pu.

67 Kí wàatī á sìntīǹ-mi taapuee, m nìn gáatì ní,

ama kɔŋkɔnnee, m kíǹ ki ŋúb́ tin a sòon̄ee ní.

68 A ŋān̄ ní ki ŋáań tin ŋān̄ee,

dàkà-mi a-koobiliŋ.

69 Bilambidambi sòon̄ tinyimɔmbɔti ki bíil̀-mi,

ama mamee, m ŋúb́ a-bɔkpaaŋi nì m-pɔbil kɔkɔ ní.

70 Bi-pɔbiliŋ tīlifì,

ama mamee, a-marab di tìì-mi mmɔn.

71 A nín sīntiǹ-mi taapuee ŋá-mi tiŋan,

di sá yii an tútuǹ-mi m bífì a-koobiliŋ.

72 Marab bin nyáń a-nyɔkɔnee ŋān̄ m-cee

ki jítiǹ sindaariya nì animbil kúti kutukub cutimaanyi.

73 A dū a-ŋalii ní ki máń-mi ní ki tīī-mi mpɔn,

tīī-mi dinyil ḿ dūú bīfì a-marab.

74 Bin fàŋkí-see yaa ká-mee, bi fàal̀ ní,

di sá yii a-nyɔɔbundi pu ní m máká.

75 Ti-Dindaan, m nyí tin a sòon̄ ki síiǹee nín sá deedeeyee,

ní a cáá ibaamɔn a nín sīntiǹ-mi taapuee.

76 A-neeŋkpaandee ń dāan̄ kɔŋkɔnnee kí ŋméeǹ-mi,

kii a nín sòon̄ man a-tɔntɔnliu puee.

77 Dàkà-mi a-poommɔŋŋu ḿ nīn bí dimaŋfalin,

di sá yii a-marab di tìì-mi mmɔn.

78 Icoo ń cúú bilambidambi bin kɔ́kɔĺ-mi fámee!

Mamee, m làá nīn dàkafī a-bɔkpaaŋi pu.

79 Bin fàŋkí-see ń dāan̄ m-cee

kí béé a-bɔkpaaŋi.

80 M làá nīn ŋúb́ a-koobiliŋ nì m-pɔbil kɔkɔ,

án nín làá ŋá pu icoo ń taa cúú-mee.

81 M kāl̀ ki cíitì a-fiil ki tin kpáàa gīī,

m kā ki máká a-nyɔɔbundi pu.

82 M kpēē tin a sòon̄ee saŋŋu pú m-nimbiliŋ tin kpáàa lóoĺ,

ní m bàlifī yii: «Ŋyunti ŋulɔŋu ní a làá ŋméeǹ-mi ní?»

83 M sá kii kuloou kun ŋŋminyiim ŋɔ́fì ku bɔ̄ntèe ní,

ama maa súntì a-koobiliŋ pu.

84 Iwiin iŋa di kíǹ man a-tɔntɔnliu ḿ nīn bí dimaŋfalin ní?

Ŋyunti ŋulɔŋu ní a làá sòoǹ bin sàantí-mee bɔti ní?

85 Bin yòontí bi-ba yilpu kaa fātìi tɔ́ a-marabee

gbìn̄ mbòó ki píĺ kí sàl̄-mi.

86 A-marab kɔkɔ sá ibaamɔn marab ní,

maa ŋá tiba ní bi bíi sàantí-mi, dāá jòoń-mi.

87 Bi nìn ŋman kūū-mi ki dóò ní,

ama maa dū a-bɔkpaaŋi ki fá.

88 A-neeŋkpaandi puee, tīī-mi dimaŋfal

ní ḿ nīn ŋúb́ a-bɔkpaaŋi.

89 Ti-Dindaan, a-nyɔɔbundi bí ní ki cá jaanjaan,

dì bá yilpu ki pɔ̄ɔ̄ kiŋkiŋ.

90 A-deedeeu bí kí nīn cá abin abin.

A báaǹ kitiŋ ní kì bá ki pɔ̄ɔ̄.

91 Tikɔkɔ bí ti-laŋki ki dāa sāā díǹ ki nóó nì tin a sòon̄ ki síiǹee,

di sá yii tin kɔkɔ bí duulinyanee sá a-tɔntɔnliibi ní.

92 A-marab yaa kaa bàà sá kun tìì-mi mmɔnnee,

kɔnampu falaa bàà kūū-mi.

93 M kpá kí súntí a-bɔkpaaŋi pu jaanjaan,

di sá yii a dī ŋi-pu ní ki tīī-mi dimaŋfal.

94 Sii di yì-mi, fīī-mi,

di sá yii a-bɔkpaaŋi bɔti di páb́-mi.

95 Binikpitib cí kí lēē m-maŋfal,

ama m dàkafī a-bɔkpaaŋi pu.

96 M dáań ki ká yii ki kpáaǹ tin ŋān̄ee cáá kigbeennyɔkɔ,

ama a-marab bí ní ki cá talku.

97 M néeń a-marabeeee!

M dàkafī bi-pu ŋwiin kamaa.

98 A-marab yāntì m cáá iciin ki jítiǹ m-nannanliibi,

di sá yii m dū-bi ki gāā m-bindi kí nīn cá jaanjaan.

99 M nyíǹ m-dàkaliibi kɔkɔ,

di sá yii m dàkafī a-bɔkpaaŋi pu.

100 M nyíǹ bitikpilib,

di sá yii m kpáafí a-bɔkpaaŋi.

101 M yíì kí nóó isaŋkpiti

kí ŋmā kí nīn ŋúb́ a-nyɔɔbundi.

102 Maa fātì m-boon ki tīī a nín sòon̄ pu ki síiǹee,

di sá yii sii di dàkà-mi.

103 Tin a sòon̄ee mɔ̄ m-nyɔkɔn cɔ́ncɔŋ

ki jítiǹ tisiil.

104 A-bɔkpaaŋi puee, m cáá dinyil,

an pu ní m ná tinyimɔmbɔti kɔkɔ.

105 A-nyɔɔbundi sá fitila ní ki ŋmíntí laakin m còom̄ee,

ŋwalifi ki ŋmíntí m-saŋŋu.

106 M pūtì ki pōoǹ kí ŋúb́ tin a sòon̄ ki síiǹ tì bí deedeeyee,

ní ki lafun làá ŋá míǹ.

107 M jíń falaa tikpilku,

ti-Dindaan, tīī-mi dimaŋfal kí nóó nì a-nyɔɔbundi.

108 Ti-Dindaan, nlammɔntiim saraau un nyēē m-nyɔkɔnee ń fáatíǹ-si,

kí dàkà-mi tin a sòon̄ ki síiǹee.

109 M bí dinimbinaamandin ní baabadal,

ama maa súntì a-marau pu.

110 Min kamaa binikpitib píĺ-mi kutaliŋŋuee,

maa kākatì ki wāatì a-bɔkpaaŋi.

111 A-bɔkpaaŋi di sá m-fakal kí nīn cáa cá jaanjaan,

ŋíǹ di tìì m-pɔbil mmɔn.

112 M lēē m-pɔbilin kí ŋá a-koobiliŋ nín bí yii ḿ ŋá puee,

m-paatii dee kí nīn cáa cá jaanjaan.

113 M ná milimilidambi,

ama ní ki néeń a-marau.

114 Sii di sá m-balilaŋki nì m-gbampɔɔl.

M máká a-nyɔɔbundi pu.

115 Binikpitibee, sútímaan kí wàatī-mi,

ní ḿ nīn ŋúb́ m-Nimbɔtiu marab.

116 Nín̄ tíkí-mi kii a nín sòon̄ puee ní ḿ nīn bí dimaŋfalin,

taa kɔ́ǹ-mi icoo m-mákal poon.

117 Tíkiń-mi ní ḿ ká difiil,

m-nimbikpeeŋu làá nīn pée cɔ́ a-koobiliŋ pu ní.

118 A dū bin kɔkɔ kākatì ki wāatì a-koobiliŋee ki fá,

di sá yii bi-ŋáaǹtam sá nnyimɔn ní.

119 A féeń kitiŋ pu nikpitib kɔkɔ kii timool tin bi féeń ditampundi puee ní,

an pu ní m néeń a-bɔkpaaŋi.

120 M-wunti kɔkɔ jìkì nì kufaaŋŋu a-nimbiin,

ní a nín sòon̄ pu ki síiǹee fàantí-mi.

121 M tɔ́ tin a sòon̄ ki síiǹee ki ŋá tin bí deedeeyee,

taa dū-mi kí ŋá bin sàantí-mee ŋaan.

122 Líí man a-tɔntɔnliu dimákal yii m làá ká nnaam,

yii bilambidambi kaa ti làá sàaǹ-mi!

123 M kpēē a-jòońdi nì difiil din a pōoǹee saŋŋu pú

m-nimbiliŋ tin kpáàa gīī.

124 Dàkà man a-tɔntɔnliu a-neeŋkpaandi,

bīfì-mi a-koobiliŋ.

125 M sá a-tɔntɔnliu ní, tīī-mi dinyil

ḿ béé a-bɔkpaaŋi.

126 Ti-Dindaan, ŋyunti bàn̄ á tɔ̄ a-tundi:

bi yīntiǹ a-marau.

127 An pu ní m néeń a-marab ki jítiǹ sindaariya,

ki jítiǹ sindaariyamɔmmɔnti pu.

128 M ká yii a-bɔkpaaŋi kɔkɔ bí deedee ní,

m ná tinyimɔmbɔti kɔkɔ.

129 A-bɔkpaaŋi sá maamaaci bɔkpaaŋi,

an pu ní m pɔ̄ɔntí ki dī-ŋi.

130 Unil yaa ká a-nyɔɔbundee, dì tìì-u ŋwalifi ní,

dì tìì sɔkɔmii nib dinyil.

131 M-nyɔkɔ wāā bàaa m fátí diniindi,

di sá yii m baasii néeń a-marab ní.

132 Fàtīń a-ba kí túĺ-mi kí sɔ̄ m-saai,

kii a nín sòon̄ ki síiǹ kí ŋá bin néeń-see puee.

133 Dū a-nyɔɔbundi kí tīī-mi dimákal,

taa yàntī tikpitil tiba ń nyàŋkiǹ-mi.

134 Fōō-mi bin sàantí-mee ŋaan kí líí,

ní ḿ nīn ŋúb́ a-bɔkpaaŋi.

135 Bútí man a-tɔntɔnliu pu nnimbiin,

ní kí bīfì-mi a-koobiliŋ.

136 M-nyinnyim pùub̀ kii mbunee,

di sá yii baa ŋúb́ a-marab.

137 Ti-Dindaan, a sá deedeedaan ní,

ní tin a sòon̄ ki síiǹee tèen̄.

138 A-bɔkpaaŋi ŋin a tīīyee sá deedee

ní bi ŋūǹ kí nīn máká ŋi-pu.

139 M-bum fòol̄ m-ni lìblib kii ŋŋmee,

kun puee m-nannanliibi súntí a-nyɔɔbundi pu.

140 Bi cɔ́ŋkì ki béè tin a sòon̄ee baamɔŋyi,

ní man a-tɔntɔnliu néeń-tì.

141 Maa bí tiban ní bi kpèé-mi fám,

ama maa súntì a-bɔkpaaŋi pu.

142 A-deedeeu sá deedee un bí ki cá jaanjaanee,

ní a-marab sá ibaamɔn marab.

143 Dinimbinaamandi nì kunimbaau cúú-mi,

ama a-marab di tìì-mi mmɔn.

144 A-bɔkpaaŋi bí deedee ní ki cá jaanjaan,

tīī-mi dinyil ḿ nīn bí dimaŋfalin.

145 M kúuǹ ki yíiń-si nì m-pɔbil kɔkɔ,

kíí-mi, ti-Dindaan, m làá nīn ŋúb́ a-koobiliŋ.

146 M kúuǹ ki yíiń-si, dāá fīī-mi

ní ḿ nīn ŋúb́ a-bɔkpaaŋi.

147 M yíkì ntaafaabɔmbɔm ki kúuǹ ki yíiń-si,

m máká a-nyɔɔbundi pu.

148 Kunyamɔŋu kɔkɔee, maa pée dáb́,

ki bí ki dàkafī tin a sòon̄ee pu.

149 Pīlifiǹ-mi a-neeŋkpaandi poon, ti-Dindaan,

tīī-mi dimaŋfal kí nóó nì tin a sòon̄ ki síiǹee.

150 Bin sáń ki pá ikpiti boonee sútì ki pìlīń-mi,

bi sáǹ ki wāatì a-marab.

151 Ama sii ti-Dindaan pìlīǹ-mi,

ní a-marab kɔkɔ sá ibaamɔn.

152 Dooooyee ní m nyí yii a tīī a-bɔkpaaŋi

ŋí nīn bí ki cá jaanjaan.

153 Kpèè m-falaau kí fīī-mi,

di sá yii maa súntì a-marab pu.

154 Mɔ̄tì m-pu ní kí dā-mi kí líí,

tīī-mi dimaŋfal kii a nín sòon̄ puee.

155 Difiil dátiǹ binikpitib,

di sá yii baa nyàab̀ a-koobiliŋ.

156 Ti-Dindaan, a-poon mɔ̄ tikpilku.

Tīī-mi dimaŋfal kí nóó nì tin a sòon̄ ki síiǹee.

157 Bin sàantí-mee nì m-nannanliibi wīikí tikpil,

ama maa fātì m-boon ki tīī a-bɔkpaaŋi.

158 M ká bin nyēē binib boonee ní m-naŋki nyáń nì bi,

di sá yii baa ŋúb́ a nín sòon̄ puee.

159 Ti-Dindaan, kpèè m nín néeń a-bɔkpaaŋi puee.

Tīī-mi dimaŋfal kí nóó nì a-neeŋkpaandi.

160 A-nyɔɔbundi nyeel di sá ibaamɔn,

ní tin a sòon̄ ki síiǹee bí deedee kí nīn cá jaanjaan.

161 Abɔtibil sāaǹ-mi an kaa cáá taapu,

ama kun m-pɔbil fàŋkée di sá a-nyɔɔbundi.

162 M fàal̀ tin a sòon̄ee pu,

a lì kii tigaajakpaandi tiba ní m kée.

163 M ná nnyimɔn, an cáá-mi titantan,

ama a-marab ní m néeń.

164 M nyɔ́ŋkí-si ŋfunyɔm mita ní ŋwiin

tin a sòon̄ ki síiǹee nín sá deedeeyee pu.

165 Bin néeń a-marabee bí dipɔɔsɔŋkilin ní,

tiba kaa ŋūǹ kí yàntī bí gbéetí kí lítí.

166 Ti-Dindaan, m máká a-fiil pu,

ní ki tɔ́ a-marab.

167 M ŋúb́ a-bɔkpaaŋi,

m baasii néeń-ŋi ní.

168 M ŋúb́ a-bɔkpaaŋi nì a-bɔkpaafikaati,

di sá yii a nyí tin kɔkɔ m ŋáańee.

169 Ti-Dindaan, yàntī m-kuŋkuuntii ń bàń-si,

tīī-mi dinyil kí nóó nì a-nyɔɔbundi.

170 Yàntī m-gbaamii ń bàń-si,

fīī-mi kí nóó nì a nín sòon̄ puee.

171 M-nyunculiŋ ń tábití kí nyɔ̄ŋkì-si,

di sá yii a dàkà-mi a-koobiliŋ.

172 M-nyɔkɔ làá dū tin a sòon̄ee kí gāā ilan,

di sá yii a-marab kɔkɔ bí deedee ní.

173 Tàntī a-ŋal kí jòoń-mi,

di sá yii a-bɔkpaaŋi ní m lēē.

174 Ti-Dindaan, kun m baasii lèe di sá á fīī-mi,

ní tin tìì-mi mmɔnee di sá a-marau.

175 Tīī-mi dimaŋfal ḿ ŋmā kí nyɔ̄ŋkì-si,

ní kí yàntī tin a sòon̄ ki síiǹee ń tūtuǹ-mi.

176 M tú ki yìiǹ kii dipibil din wáŋkèe.

Nyàab̀ man a-tɔntɔnliu,

di sá yii maa súntì a-marab pu.