Yeesaya 1

Kugbɔŋu kun sòoǹ

Yeesaya

puee

DIJAMPEEPEEKAAL

1 Yeesaya, Amɔtisi jipɔɔn nín nìn ká tibɔti tin Juuda beel nì Jeerusaleem tiŋki puee sèé. Ŋyunti gbantee, Oosiyasi nì Yootam nì Akaasi nì Eeseekiyaasi nìn kāl̀ kāl̀ Juuda beel pu tibɔtiil ki fōol̀ tɔb.

Ti-Dindaan nibul kaa nyí di-Nimbɔtiu

2 Kutagbɔŋu, pīlifì!

Kitiŋ, kpòon̄ a-tafal kí pīlifì!

Ti-Dindaan di bíi sòoǹ nee.

«M lōō mbiyaamu,

ki kpēē-mu mu cíkitì,

ní mu kíǹ ki bíi jáà nì mi.

3 Unaa nyí u-dindaan,

ní kimaŋ nyí laakin ki-dindaan ŋáań-kì tijin kì jīǹee.

Ama Isirayeel yab kaa nyí báà tiba,

m-nibul kaa gbìl̀ tibɔti taapu.»

Juuda tiŋki kíǹ ki náań nì Soodoom ní

4 Mbusu dɔ̄ ki cí-ni, nimbi ditimbundi din ŋáań ikpitee,

dinibul din yīntèe,

nnibool ŋun ŋáań tin kaa ŋān̄ee,

mbiyaamu mun yiliŋ gáatèe.

Ni dū ti-Dindaan ki fá,

ki kpēē Isirayeel Circir Nimbɔtiu^a fám,

ki fātì ni-boon ki tīī-u.

5 Ni nín gbíntìi jáà nì u nee,

ni-la ní u làá gíti fáá ní?

Diyil kɔkɔ fōō tiweendi,

dipɔbil kɔkɔ gīī ki yúl̀.

6 Kí yòon̄ titafati kí cáá sāā diyilee,

laaba kaa ti bí mmɔm.

Tiwun kɔkɔ fōō tiweendi,

ki lākatì lākatì, ki kpántì ibuun.

Ubɔ kaa fíntì-i, kaa póob́-i,

kaa ŋá-i ŋkpam kí bàtī iween pu.

7 Ni-tiŋki kpántì kuteeu,

ni-timmu wùn̄ ŋŋmi kɔkɔ múb.

Ni-nimbilaaliyin ní binicambi

bí ki ŋàfī ni-kpaajinti.

An kpéelikì ni-sati nyíki nyiki

kii binannanliibi di jítèe.

8 Siiyɔn^b tiŋki baba di pée kíǹ,

kii kibiŋ di yú fiinyi kpaabunee,

kii uciitil bìŋ́ki di yú aputaajul kpaabunee,

kii kitiŋ ní bijanjaliibi māntìi túee.

9 Ti-Dindaan Mpɔŋkɔdaan yaa kaa bàà yāntì

ti-kansikin binikaaŋkaabi ŋmátèe,

ti bàà làá nīn bí kii Soodoom yabee ní,

kí nīn náań nì Goomoora yab^c.

Ti-Dindaan ná binikpitib saraabi

10 Pīlifìmaan ti-Dindaan nyɔɔbundi, Soodoom kpilib.

Ní ŋátí ni-tafal kí pīlifì ti-Nimbɔtiu dàkatam, Goomoora nibul^d.

11 Ti-Dindaan bí yii:

«Ba ní m làá ŋá nì saraabi bin ni ŋáań tikpil nee?

M núutiǹ ipijaa saraawɔkaabi nì anabil kpam.

M gīī nì inajaa nì apibil nì iŋoobu fatikuu^e.

12 Ni nín dòoń ki yūlifí m-nimbiinee,

man di bí yii ni-taal ń tāā m-cindinaaa?

13 Ní taa ti cáań-mi saraabi,

an kaa kèetī tiba.

M ná talaalub bin ni tùutēe nyiim!

Ni jīǹ uŋmapɔɔn nì ŋwiŋŋuŋfikaa jiŋaalib

ki kpáfí ki jīǹ jiŋaalib

ki ŋáań ikpiti.

Maa ti là kí ká míǹ.

14 M ná uŋmapɔɔn jiŋaalib bin ni jīǹee,

ni-kpafiŋ kpántì diwaŋgul ní ki tīī-mi,

ní m túǹ ki gīī m-naŋki nyáń^f.

15 Ni yaa tāntì ni-ŋalii kí mèèyee,

m fàtī m-kpaŋkpamboon ní kí tīī-ni.

Báà ní mèè kí gíti mèè, maa làá pīlifì-ni,

kun puee ni-ŋalii táká fatiku.

16 Ní fàl̀maan, kí ŋámaan ni-ba circir.

Ní nyāntí ni-tuŋkpitiŋ m-nimbiin,

kí gbèen̄ kí taa ti ŋá ikpiti.

17 Ní bīfì kí nīn ŋáań tin ŋān̄ee.

Ní nyàab̀ kí nīn nóó deedee saŋŋu.

Ní nīn kpòotī bin wɔ́b̀ bi-jutiibee.

Ní sòoǹ kí pɔ̀ ditaŋkpiibil,

kí sòoǹ kí mɔ̄tì ukpiipu pu.»

Ní taa ti já nì ti-Dindaan

18 Ti-Dindaan bí yii:

«Ní dāam̄maan tí sòoǹ kí gbìlīǹ tɔb.

Báà ni-kpitii yaa yāntìi máǹ cíncinciŋ kii fatikuee,

i làá pīil̀ káŋkaŋkaŋ kii ntaayimee.

Báà i yaa máǹ kii ŋwɔmee,

i làá pīil̀ kii upipiin kutee ní.

19 Ni yaa kíí ki pílifì m-nyɔkɔ,

ni làá jī tijin tin kitiŋ nee lòon̄ee.

20 Ama ni yaa yíì kaa pílifì,

ní ki gbíntìi jáà nì mee,

kitàataajiki ní bi làá dūú kúntí-ni.»

Ti-Dindaan di sòon̄ míǹ.

Ti-Dindaan làá ŋá Jeerusaleem tiŋki circir

21 An ŋá mana ní kitiŋ kin kaa nìn cáá tijɔkɔndee

dūu kpántì kii kinimpulaakpaayee ní?

Dooooyee, ki-nib nìn nóó ibaamɔn saŋŋu,

ní ki nìn bí deedee.

Ama kɔŋkɔnnee, binikpɔliibi

di kíǹ ki gbí ki-ni.

22 A-nimbiliŋ kúti kaa ti nyìm̀,

ní bi cēeǹ a-damɔmmɔntiimin nnyim!

23 A-bɔtiibi sá pɔɔgaatib ní,

bi nì binaayub di pēē kinyɔkɔ.

Bi-kɔkɔ néeń tiwampɔkaal,

ki jòó ki pá dinyɔɔŋeebil jim boon.

Baa pɔ̀ ditaŋkpiibil,

kaa mɔ́tí ukpiipu pu.

24 An pu ní ti-Dindaan Unimbɔti Mpɔŋkɔdaan

un di sá Isirayeel Nimbɔtikpaaŋwuee lī yii:

«Mbusu dɔ̄ ki cí-ni! M làá téeǹ nimbi bin ná-mee!

M làá tɔ̀ nimbi m-nannanliibi ipɔntoon!

25 Jeerusaleem, m làá tāā kí bīikì a-pu.

M làá dū kaŋwa kí fàl̀-si á nyā,

m làá nyāntí-si a-jɔkɔnti kɔkɔn.

26 M làá yàntī a-bɔsoonliibi ń kpántí kii njamin yabee,

kí yàntī a-saŋkiliibi ń nīn bí kii cannaaku yabee.

Ní bí dāá nīn kíǹ ki yíì-si yii <Ibaamɔn Tiŋki,

Kitiŋ kin yú nì Unimbɔti deedeeyee>».

27 Ibaamɔn làá fīī Siiyɔn tiŋki,

ní deedee ń yàntī ki-nib bin kpántì bi-bee ń ŋmátí.

28 Ama pɔɔgaatib nì bikpitiŋaliibi làá nàan̄,

ní bin dū ti-Dindaan ki fée ń kúntí.

29 Icoo làá cúú-ni iwaasufi in ni néeń tikpilee pu.

Ni-wunti làá yɔ̀tī ni-kpaaŋŋi ŋin ni lēē

kí nīn tòotī awaayee poon.

30 Kun puee ni làá dāá nīn sá kii

buwaasubu bun faati yɔ́ĺee ní,

kii bukpaa bun poon ní nnyim fóotèe.

31 Upɔɔl làá dāá nīn sá usá,

ní u-tuuŋŋi dāa sá kii ŋŋmiyatiyaalee.

Bi-liitil làá dāá fōō ŋŋmi,

ní ubɔ kaa dāa bí kí gbíntí.